ជូស្ទីន ប៊េប៊័រ និងរ៉ៃយ៉ាណា មានទំនាក់ទំនងនឹងគ្នា?
ស្ដាប់ទៅដូចជាមិនសម តែទស្សនាវដ្ដី ជីវិតនិងរចនា (Life & Style) បានបញ្ជាក់ពីរឿងនេះ គាលពីថ្ងៃទី០៦ខែកុម្ភះកន្លងទៅនេះ នៅលើគេហទំព័ររបស់ខ្លួន។
ជូស្ទីន ប៊េប៊័រ និងរ៉ៃយ៉ាណា ក្នុងពិធី«គ្រប់តារាល្បែងទាំងអស់»។
តាមទស្សនាវដ្ដីនេះ កំពូលតារាចម្រៀងទាំងពីរ ដែលមានអាយុខុសគ្នាប្រាំមួយឆ្នាំនោះ ទំនងជាមានទំនាក់ទំនងជាមួយគ្នា កាលពីឆ្នាំ២០១១។ នៅពេលនោះ អ្នកទាំងពីរត្រូវបានគេមើលឃើញថា នៅជិតល្អូកល្អឺននឹងគ្នា ធ្វើអោយគេអាចច្រឡំបានយ៉ាងងាយ នៅពេលទៅចូលរួម ក្នុងពិធី«គ្រប់តារាល្បែងទាំងអស់» របស់ក្រុមហ៊ុន អ៊ិនប៊ីអេ (NBA)។ តែរហូតមកទល់នឹងបច្ចុប្បន្ននេះ ចំណងទាក់ទងនេះ នៅតែបន្តរហូតមក បើទោះជាគេដឹងថា ជូស្ទីន ប៊េប៊័រ (Justin Bieber) នៅជាមួយនឹងនាងកញ្ញាដ៏ប្រិមប្រិយ សេឡេណា ហ្គោមេស (Selena Gomez) នោះក៏ដោយ។
ទស្សនាវដ្ដី ជីវិតនិងរចនា បានទៅឆ្ងាយជាងនេះទៅទៀត ដោយបានពន្យល់ថា ទំនាក់ទំនងសម្ងាត់រវាងជូស្ទីន និងរ៉ៃយ៉ាណា (Rihanna) នេះ ជាហេតុផលមួល ដែលធ្វើអោយ ជូស្ទីន និងសេឡេណា បែកប្រេះឆាពីគ្នា។ ឥឡូវនេះ សំនួរដែលមនុស្សទាំងអស់ បានចោទសួរ ថាតើហេតុអីបានជា គេមិនបានលឺរឿងនេះនៅមុននឹង? «ជូស្ទីន មិននិយាយទៅប្រាប់នរណាម្នាក់ឡើយ ព្រោះខ្លាចគេដៀលថា នាយជាប្រុសសាវ៉ា» ទស្សនាវដ្ដីបានប្រកាស យ៉ាងដូច្នេះ។
តែទោះជាយ៉ាងណាក៏ដោយ ក៏តារាចម្រៀងទាំងពីរ តាមរយះអ្នកនាំពាក្យរបស់ផងខ្លួន បានចេញមុខ មកច្រានចោល នូវដំណឹងដ៏អាស្រូវនេះ។ សូមបញ្ជាក់ថា រ៉ៃយ៉ាណា អាយុ២៤ឆ្នាំ ជាអ្នកចម្រៀង អ័រអេនប៊ី (R&B ) និងផប (pop) ជាអ្នករាំ និងអ្នកសម្ដែងភាពយន្ដម្ដងម្កាលម្នាក់ មកពីប្រទេសបាបាដូ (ផ្នែកអាគ្នេយ៍នៃសហរដ្ឋអាមេរិក)។ នាងចាប់ផ្ដើមល្បីខ្លាំង ក្នុងអំឡុងឆ្នាំ២០០៦ ជាមួយនឹងថាសចម្រៀងលើកទីពីរបស់នាង ហើយនាងបានទទួលនូវ ពានរង្វាន់ចម្រៀងជាច្រើននៅឆ្នាំបន្ទាប់មក ពីទស្សនាវដ្ដីធំៗ នៅអាមេរិក និងអង់គ្លេស។ ជាពិសេសទៅទៀត នាងបានជាប់ឈ្មោះ ជាតារាដែលមានឥទ្ធិពលជាងគេ នៅឆ្នាំ២០១២កន្លងទៅនេះ។
ចំណែកយើងជាអ្នកតាមដានវិញ ជឿឬមិនជឿ ក៏យើងមិនអាចដឹងថា តើតារាចម្រៀងល្បី និងមានរូបស្អាត ដូចនាង រ៉ៃយ៉ាណា នឹងអាចមានចំណងទាក់ទង អោយជាប់លាប់យ៉ាងដូចម្ដេច ជាមួយ ជូស្ទីន ប៊េប៊័រ នោះ?
--------------------------------------------------
ដោយ ឈូករ័ត្ន - ប៉ារីស ថ្ងៃទី១០ ខែកុម្ភះ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ