ហេតុការណ៍បានកើតឡើង ចំពោះរថភ្លើង «RER B» នៅចន្លោះក្រុង «Saint-Rémy-lès-Chevreuse» និងក្រុង «Orsay»​ ដែលស្ថិតនៅប្រមាណជាង ៣០​គីឡូម៉ែត្រ ភាគខាងត្បូងនៃរដ្ឋធានីប៉ារីស (បារាំង)។ ស្ថានភាពឧត្តុនិយមដ៏អាក្រក់ នៅក្នុងតំបន់ជុំវិញរដ្ឋធានី ប៉ារីស បានបង្កឲ្យមានទឹកជំនន់ និងបានហូរច្រោះ​យកដីកំណល់ផ្លូវរថភ្លើង គឺជាមូលហេតុ ដែលធ្វើឲ្យទូរថភ្លើងចំនួនបី ក្រឡាប់។

អ្នកស្រី «Elisabeth Borne» រដ្ឋមន្ត្រីដឹកជញ្ជូនបារាំង បានថ្លែងឡើងថា៖ «ការបាក់ដី បានបង្កឲ្យទូរថភ្លើងចំនួនបី នៃរថភ្លើង "RER B" មួយខ្សែរ ក្រឡាប់នៅលើផ្លូវ។ ជាសំណាងល្អ មានមនុស្សតែ៧នាក់ ដែលបាន​រងរបួសស្រាល។»។

អ្នកនាំពាក្យរបស់ក្រុមហ៊ុនស្វ័យតអាយស្ម័យាន «RATP» បានថ្លែងឲ្យដឹងថា នៅមុនម៉ោង ៥ភ្លឺ ព្រឹកថ្ងៃអង្គារនេះ រវាងស្ថានីយ៍ «Saint-Rémy-lès-Chevreuse»​ និងស្ថានីយ៍ «Courcelle-sur-Yvette»​ ការដួលរលំ នៃទំនប់កល់ផ្លូវដែកមួយ ដែលបណ្ដាលមកពីទឹកភ្លៀង បានបណ្ដាលឲ្យរថភ្លើងរត់ខុសផ្លូវ មុននឹងរថភ្លើងមួយកំណាត់ បានក្រឡាប់ដេកនៅលើដី។

ដំណឹងចុងក្រោយ ដែលទើបនឹងធ្លាក់មកដល់ ក្នុងយប់ថ្ងៃដដែលនេះ បានអះអាងថា ការស៊ើបអង្កេតមួយ ត្រូវបានការិយាល័យ​អយ្យការក្រុង វែកសៃយ៍ (Versailles)​ បើកធ្វើ ដើម្បីស្វែងរកពីមូលហេតុច្បាស់លាស់ និងផ្លូវការ ដែលបង្កឲ្យមានពលរដ្ឋបារាំង​ទាំង៧រូប រងរបួស។

ហេតុការណ៍នេះ បានធ្វើឲ្យការរត់ទៅមក រវាងស្ថានីយ៍ទាំងពីរខាងលើ ត្រូវបានកាត់ផ្ដាច់ ហើយនឹងត្រូវរងការរអាក់រអួល សម្រាប់រយៈពេលជាច្រើនថ្ងៃ។ ក្រុមហ៊ុនស្វ័យតអាយស្ម័យាន បានយករថយន្ដក្រុងជាច្រើនគ្រឿង មករត់ភ្ជាប់ស្ថានីយ៍ទាំងពីរ ដើម្បីជាប្រយោជន៍ដល់អ្នកដំណើរ៕