អ្នកយកភាស៊ី នៅផ្សារដើមគ មានវិធីសាស្ត្រមកយកភាស៊ី តាមបែបចល័តគ្នា ​យ៉ាងពិសេស ចេញមួយ​ចូលមួយ បន្តគ្នា​មិនចេះដាច់។ នេះបើតាមការរអ៊ូរទាំ របស់ក្រុមអាជីវករមួយចំនួន នៅទីនោះ។

ស្រ្តីអាជីវករម្នាក់ នៅលើបណ្ដោយផ្លូវ ៣៣៦ បានរៀបរាប់ ប្រាប់ទស្សនាវដ្ដីមនោរម្យ.អាំងហ្វូថា អ្នកស្រីលក់​មិនបាន​ចំណេញ​ប៉ុន្មាន​ទេ ព្រោះត្រូវចំណាយប្រាក់ សម្រាប់ភាស៊ីប្រចាំថ្ងៃច្រើនហួស ។ នេះ អ្នកស្រីនៅមិន​ទាន់និយាយ ដល់ថ្ងៃខ្លះ ដែលលក់មិនដាច់នោះផង។ អ្នកស្រី បានលើកឡើងថា អ្នកយកភាស៊ីម្នាក់ ដើរចេញ​មិនទាន់ផុត ពីកន្លែងលក់ផង ស្រាប់តែមានម្នាក់ទៀត មកយកបន្តពីក្រោយ។

អ្នកស្រីមិនដឹងថា អ្នកយកភាស៊ីទាំងនោះ មកពីខាងណាឲ្យច្បាស់ទេ ព្រោះមានអ្នកខ្លះ ពាក់ឯកសណ្ឋាន ហើយ​អ្នកខ្លះ គ្មានឯកសណ្ឋានទេ គឺស្លៀកពាក់ស៊ីវិល។ អ្នកខ្លះខុសកន្លែង ក៏មកយកភាស៊ីដែរ បើទោះ​ជា​កន្លែង​នេះ មិនមែនជាទីតាំង របស់ខ្លូនក៏ដោយ។

អ្នកលក់រូបនេះ បានបញ្ជាក់ទៀតថា មួយថ្ងៃអ្នកស្រីចំណាយ លើថ្លៃអ្នកដើរយកភាស៊ីនេះ ប្រមាណ ៥ពាន់​រៀល ទៅ៧ពាន់រៀលហើយ។ អ្នកស្រីអះអាងថា មានថ្ងៃខ្លះ មិនមានចំណេញអ្វីទាំងអស់ ខណៈដែលលក់មិន​ដាច់​ហើយ ត្រូវបង់ថ្លៃភាស៊ីឲ្យរដឹកទៀតនោះ។

ទស្សនាវដ្តីមនោរម្យ.អាំងហ្វូ មិនអាចសុំការបំភ្លឺ ពីលោកអភិបាលរង ខណ្ឌទួលគោកបានទេ ពាក់ព័ន្ធនឹង​ករណី​អ្នកយកភាស៊ី មានចំនួនច្រើន រហូតដល់អាជីវកររអ៊ូនេះ ដោយទូរស័ព្ទរបស់លោក មិនអាចទាក់​ទង​បាន។ តែ​យ៉ាង​ណា អាជីវករបានសំណូមពរថា សូមឲ្យអ្នកដែលពាក់ព័ន្ធ មេត្តាដោះស្រាយបញ្ហានេះផង ព្រោះ​អាជីវករ​ខ្លះ មិនមានប្រាក់ចំណូលគ្រប់គ្រាន់ សម្រាប់បង់ថ្លៃភាស៊ី ដែលបានចល័តជាប់គ្នា ឲ្យរដឹកដូច្នេះឡើយ៕