បន្ទាប់ពីបំបាក់ក្រុម «Leipzig» របស់គ្រួសារ «Red Bull» បង្កើត ដើម្បីឡើងមកវគ្គ១ភាគ២ផ្ដាច់ព្រ័ត្រ កាលពីពីរសប្ដាហ៍មុនរួច ក្រុម ម៉ាសីយ៍ (Olympique Marseille) របស់ប្រទេសបារាំង បានបំបាក់ក្រុម សាលស្បួរ (Salzbourg - អូទ្រីស) របស់គ្រួសារ «Red Bull» ដដែលទៀត ក្នុងយប់នេះ នៅលើទឹកដីរបស់ខ្លួន សម្រាប់ការប្រកួត «ទៅ» វគ្គពាក់កណ្ដាលផ្ដាច់ព្រ័ត្រ ក្របខណ្ឌដណ្ដើម «Europa League»។

ក្រុម ម៉ាសីយ៍ មិនមានកីឡាករល្បី កម្រិតពិភពលោកទេ តែក្រុមនេះមានវិន័យ និងការទាត់បាល់ ប្រកបដោយប្រសិទ្ធិភាព ដែលជាចំណុចពិសេស ក្នុងការស្វែងរកជ័យជំនះ ២-០ ទល់នឹងក្រុម សាលស្បួរ ដែលធ្លាប់បំបាក់ក្រុម «Lazio» របស់ប្រទេសអ៊ីតាលី ដើម្បីឡើងមកដល់វគ្គនេះ។ ខាងក្រោមនេះ ជាវីដេអូសង្ខេប នៃការប្រកួតរវាងក្រុមទាំងពីរ នៅក្នុងកីឡដ្ឋាន «Vélodrome» នៃក្រុង ម៉ាសីយ៍ ភាគខាងត្បូងប្រទេសបារាំង៖

ចំណែកឯការប្រកួតមួយទៀត សម្រាប់ក្របខណ្ឌដដែល ក្នុងចក្រភពអង់គ្លេស រវាងក្រុម អាសឺណល់ (Arsenal) និងក្រុម អាត្លេទីកូម៉ាឌ្រីត (Atletico Madrid - អេស្ប៉ាញ) ក្រុមកាំភ្លើងធំ ដែលជាម្ចាស់ផ្ទះ បានគ្រប់គ្រងបាល់បានច្រើន ដោយសារកីឡាករ «Sime Virsaljko» របស់ក្រុម អាត្លេទីកូ ត្រូវអាជ្ញាកណ្ដាលជាតិបារាំង បណ្ដេញចេញពីការប្រកួត តាំងពីនាទីទី១០។

ការវាយសម្រុក ជាបន្តបន្ទាប់ បានធ្វើឲ្យក្រុម អាសឺណល់ រកគ្រាប់បាល់ បានមួយគ្រាប់នាំមុខ នៅនាទីទី៦០ តែផ្ទុយទៅវិញ ក្រុមម្ចាស់ផ្ទះមួយនេះ បែរជាទន់ជើង ការពារបាល់មិនបាន បណ្ដាល​ឲ្យខ្សែប្រយុទ្ធ​ជាតិបារាំង​ដ៏ល្បី របស់ក្រុម អាត្លេទីកូ កីឡាករ អន់ទ័ន គ្រីស្មាន (Antoine Griezmann) ឆ្លៀតឱកាសរកគ្រាប់បាល់បាន នៅនាទីទី ៨២ រកពិន្ទុស្មើ​ត្រឡប់មកវិញ។ ខាងក្រោមនេះ ជាវីដេអូសង្ខេប នៃការប្រកួតរវាងក្រុមទាំងពីរ នៅក្នុងកីឡដ្ឋាន «Arsenal Stadium» នៃរាជធានី ឡុងដ៍ ចក្រភពអង់គ្លេស៖

ចុងបញ្ចប់នៃការប្រកួត ស្មើគ្នា ១-១ រវាងក្រុមទាំងពីរ តែមួយគ្រាប់នៅក្រៅផ្ទះ របស់ក្រុម អាត្លេទីកូ នឹងជួយឲ្យក្រុមនេះ មានប្រៀបជាងក្រុម អាសឺណល់ សម្រាប់ការប្រកួត «ត្រឡប់» ក្នុងសប្ដាហ៍ខាងមុខ។ ក្រុម ម៉ាសីយ៍ ដែលឈ្នះក្រុម សាលស្បួរ ២-០ ក៏មានក្ដីសង្ឃឹមច្រើនដែរ សម្រាប់ការប្រកួត យកឈ្នះចាញ់ ក្នុងការឈានទៅប្រកួត​ផ្ដាច់ព្រ័ត្រ នៃក្របខណ្ឌ «Europa League» ដែលនឹងប្រព្រឹត្តិទៅ ក្នុងកីឡដ្ឋាន «Parc Olympique Lyonnais» ដ៏ធំ របស់ក្រុង លីយ៉ុង (Lyon) ប្រទេសបារាំង នាថ្ងៃទី១៦ ខែឧសភាខាងមុខ៕