តាមពិតទៅ កម្មវិធី«ទិវាគ្រួសារអាស៊ាន (Asean Family Day)»នេះ មិនមែនទើបនឹងរៀបចំធ្វើ នៅក្នុងឆ្នាំនេះ​នោះ​ទេ ប៉ុន្តែវាត្រូវបានក្រុមប្រទេសទាំង១០ ឆ្លាស់គ្នាធ្វើម្នាក់ម្ដងៗ ជារៀងរាល់ឆ្នាំ។ រីឯឆ្នាំនេះ កម្មវិធីនេះ ត្រូវ​បាន​ប្រទេសភូមា ទទួលបន្ទុកជាអ្នករៀបចំ កាលពីថ្ងៃសៅរ៍ ទី១៣ ខែមិថុនា ឆ្នាំ២០១៥ នៅក្នុងទីក្រុង ដ្រាវៃ (Draveil - 91210) ភាគខាងត្បូងនៃរដ្ឋធានីប៉ារីស ប្រទេសបារាំង។

ក្នុងកម្មវិធី ដែលតែងប្រារព្ធឡើងនៅខែមិថុនា (ជារៀងរាល់ឆ្នាំ) នោះ ប្រទេសអាស៊ានទាំង១០ ត្រូវបានអញ្ជើញ ឲ្យតម្លើងជាស្តង់របស់ខ្លួន និងដាក់ដោតជាទង់ជាតិ តំណាងប្រទេសរៀងៗខ្លួន ដើម្បីឲ្យអ្នកចូលរួមទាំងឡាយ បានស្គាល់។ អ្វីដែលគួរអោយចាប់អារម្មណ៍ គឺសម្រាប់ប្រទេសនីមួយៗ មានការរៀបចំនូវម្ហូបចំណី សម្រាប់​ដាក់​តាំង និងដើម្បីផ្លាស់ប្តូរគ្នាទទួលទាន ដោយមិនគិតប្រាក់។

ប៉ុន្តែបើអ្នកចូលរួមទាំងអស់ ត្រូវបានអញ្ជើញឲ្យភ្លក្សម្ហូបចំណី ដោយមិនគិតប្រាក់នោះ តែមន្ត្រីទូត នៃប្រទេស​នីមួយៗ ដែលមានកាតព្វកិច្ច ជាអ្នកតំណាងឲ្យប្រទេសខ្លួន ត្រូវធ្វើដំណើរទៅកាន់គ្រប់ស្តង់ ដើម្បីបង្ហាញ​នូវ​ភាព​ស្និតស្នាល រវាងប្រទេសជិតខាង នៃអាស៊ានទាំង១០។ នៅក្នុងទិវានោះដែរ ក្រុមប្រទេសទាំងនេះ បានបង្ហាញ​ជូន នូវកម្មវិធីកំសាន្ដមួយចំនួន ដូចជាល្បែងប្រជាប្រិយ និងរបាំប្រចាំប្រទេស សម្រាប់អ្នកចូលរួចទស្សនា និង​ចូលរួមលេង។ ប្រទេសខ្លះ បានបង្កើតឲ្យមាន នូវការចាប់ឆ្នោតយករង្វាន់ យ៉ាងសប្បាយផងដែរ។

» ខាងក្រោមនេះ ជាកម្រងរូបភាពមួយចំនួន ដែលត្រូវបានផ្ដិតដោយ អ្នកឆ្លើយឆ្លងព័ត៌មាន របស់​ទស្សនាវដ្ដី​មនោរម្យ.អាំងហ្វូ៖