កម្ពុជាចូលរួមក្នុងទិវា«គ្រូសារអាស៊ាន» នៅបារាំង
តាមពិតទៅ កម្មវិធី«ទិវាគ្រួសារអាស៊ាន (Asean Family Day)»នេះ មិនមែនទើបនឹងរៀបចំធ្វើ នៅក្នុងឆ្នាំនេះនោះទេ ប៉ុន្តែវាត្រូវបានក្រុមប្រទេសទាំង១០ ឆ្លាស់គ្នាធ្វើម្នាក់ម្ដងៗ ជារៀងរាល់ឆ្នាំ។ រីឯឆ្នាំនេះ កម្មវិធីនេះ ត្រូវបានប្រទេសភូមា ទទួលបន្ទុកជាអ្នករៀបចំ កាលពីថ្ងៃសៅរ៍ ទី១៣ ខែមិថុនា ឆ្នាំ២០១៥ នៅក្នុងទីក្រុង ដ្រាវៃ (Draveil - 91210) ភាគខាងត្បូងនៃរដ្ឋធានីប៉ារីស ប្រទេសបារាំង។
ក្នុងកម្មវិធី ដែលតែងប្រារព្ធឡើងនៅខែមិថុនា (ជារៀងរាល់ឆ្នាំ) នោះ ប្រទេសអាស៊ានទាំង១០ ត្រូវបានអញ្ជើញ ឲ្យតម្លើងជាស្តង់របស់ខ្លួន និងដាក់ដោតជាទង់ជាតិ តំណាងប្រទេសរៀងៗខ្លួន ដើម្បីឲ្យអ្នកចូលរួមទាំងឡាយ បានស្គាល់។ អ្វីដែលគួរអោយចាប់អារម្មណ៍ គឺសម្រាប់ប្រទេសនីមួយៗ មានការរៀបចំនូវម្ហូបចំណី សម្រាប់ដាក់តាំង និងដើម្បីផ្លាស់ប្តូរគ្នាទទួលទាន ដោយមិនគិតប្រាក់។
ប៉ុន្តែបើអ្នកចូលរួមទាំងអស់ ត្រូវបានអញ្ជើញឲ្យភ្លក្សម្ហូបចំណី [...]