តំណាងរាស្រ្ត គណបក្សប្រជាជនកម្ពុជាម្នាក់ ប្តឹងមន្រ្តីមកពីគណបក្សដូចគ្នានោះ ព្រោះចង់ការពារសន្លឹកឆ្នោត។ នេះ បើ​តាម​ការបញ្ជាក់ របស់លោក ឆាយ ធី មន្រ្តីសិទ្ធិមនុស្ស របស់សមាគម ការពារសិទ្ធិមនុស្ស អាដហុក ប្រចាំខេត្តរតនៈគីរី។ លោក ប៊ូ ឡាំ តំណាងរាស្រ្តតែម្នាក់ របស់ខេត្តរតនគីរី មកពីគណបក្សកាន់អំណាច បានប្តឹងអភិបាលក្រុងបានលុងនេះ ព្រោះ​តែ​កិច្ច​អភិវឌ្ឍន៍នានា ក្នុងក្រុងបានលុង មិនមានការសហការគ្នា រវាងអាជ្ញាធរមួលដ្ឋាន ប្រជាពលរដ្ឋ និង​អាជីវករ​នោះឡើយ។

លោក ឆាយ អី បានលើកឡើងថា ការប្តឹងប្តល់គ្នា ក្នុងគណបក្សតែមួយ ជាចំហរនេះ ទំនងជាចង់បង្ហាញពីការគាំទ្រ និង​យក​ចិត្តទុក្ខដាក់ ចំពោះប្រជាពលរដ្ឋ ពីសំណាក់តំណាងរាស្រ្តក្នុងមណ្ឌល។ លោកថា កិច្ចការនេះ អាចថាព្រោះតែ​ខ្លាច​បាត់​បង់ ការគាំទ្រ និងទុកចិត្តពីប្រជាពលរដ្ឋ និងខ្លាចបាត់សន្លឹកឆ្នោត។ ដូច្នេះ លោក ប៊ូ ឡាំ សមាសភាព នៃកូតាគណក្ស​តែមួយ ត្រូវបង្ខំចិត្ត ទទួលពាក្យបណ្តឹងពលរដ្ឋ ដែលមានចំនួនរាប់រយនាក់ និងស្នើលិខិត ទៅកាន់គណកម្មការទី៤ នៃ​រដ្ឋសភា​តែម្តង។ លោក ឆាយ ធី បានថ្លែងទៀតថា៖ «បញ្ហាប្រជាពលរដ្ឋ មិនសម្បាយចិត្ត គណបក្សប្រជាជន គេអាច​បាត់​បង់​សម្លេងឆ្នោត នៅថ្ងៃអនាគត។ នេះជាវិធានការ របស់គណបក្សប្រជាជន ត្រូវតែគិតគូរយ៉ាងណា កុំឲ្យប្រជារាស្រ្តមិន​សប្បាយ​ចិត្ត ងាកទៅបោះឆ្នោត ឲ្យគណបក្សផ្សេងទៀត។»

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់បន្ថែម ពីតំណាងរាស្រ្តតែម្នាក់គត់ សម្រាប់ខេត្តរតនគីរី លោក ប៊ូ ឡាំ បាន​ទេ ដោយលោកប្រាប់ថា កំពុងជាប់ប្រជុំ។ តែយោងតាមលិខិត ចុះថ្ងៃទី២៧ ខែមេសា ឆ្នាំ២០១៥ ដាក់ទៅកាន់​គណកម្មការ​ទី៤ (គណកម្មការមហាផ្ទៃ ការពារជាតិ និងមុខងារសាធារណៈ) នៃរដ្ឋសភា បានស្នើសុំអន្តរាគមន៍ ដើម្បីដក​តំណែង លោក អ៊ុក សំអុល ពីអភិបាលក្រុង បានលុង។

តាមលិខិតតំណាងរាស្រ្តដដែលនេះ មិនបានបង្ហាញ ពីមូលហេតុច្បាស់លាស់ទេ តែការស្នើសុំនេះ ព្រោះតែធ្វើតាមពាក្យ​បណ្តឹង របស់ប្រជាពលរដ្ឋ ក្នុងក្រុងបានលុង ចំនួន២១១នាក់ ដែលប្តឹងសុំការអន្តរាគមន៍។ លោកតំណាងរាស្ត្រ បាន​សរសេរ​ថា៖ «ប្រជាពលរដ្ឋចំនួន២១១នាក់ បណ្តឹងចុះថ្ងៃទី២៤ ខែមេសា ឆ្នាំ២០១៥ បានប្តឹងតាមរយៈតំណាងរាស្រ្ត ខេត្ត​រតនគីរី ដើម្បីឲ្យជួយអន្តរាគមន៍ ផ្លាស់ប្តូរលោក អ៊ុក សំអុល ចេញពីអភិបាលក្រុងបានលុង ខេត្តរតនគីរី។»

គិតមកត្រឹមថ្ងៃទី១៤ ខែឧសភា ឆ្នាំ២០១៥នេះ នៅមិនទាន់មានចម្លើយ ឬការឆ្លើយតបយ៉ាងណា នៅឡើយទេ ពីលោក ហ៊ុន ណេង ប្រធានគណៈកម្មការទី៤នៃរដ្ឋសភា លើលិខិតស្នើសុំអន្តរាគមន៍ នៃតំណាងរាស្ត្រនេះ។ តែតាមការអះអាង​របស់​លោក ឡុង រី អនុប្រធានគណកម្មការទី៤ នៃរដ្ឋសភា បានបញ្ជាក់ប្រាប់ទស្សនាវដ្ដីថា ករណីនេះ ស្ថិតក្នុងចំណាត់ការផ្ទាល់ របស់​លោក ហ៊ុន ណេង ដែលជាប្រធាន និងក៏គ្មានការប្រជុំពិភាក្សាណាមួយ ពីរឿងនេះដែរ។

អនុប្រធានគណកម្មការទី៤ នៃរដ្ឋសភា មកពីគណបក្សសង្គ្រោះជាតិ បន្តថា គណកម្មការ អាចនឹងមិនធ្វើការ​ដោះស្រាយ​ឡើយ លោកថារឿងនេះ អាចជាកិច្ចការ ឬជម្លោះផ្ទៃក្នុងបក្ស (បក្សប្រជាជន)។ លោកតំណាងរាស្ត្រ ពីគណបក្សប្រឆាំង បាន​បញ្ជាក់ថា៖ «ទីមួយ ទាក់ទងនឹងផ្ទៃក្នុងគណបក្សផង។ ទីពីរ គណកម្មការមិនធ្វើការអង្កេត ទាក់ទងនឹងរឿងមុខងារ និង​តួនាទី​ទេ។ (...) នេះជារឿងផ្ទាល់ របស់តំណាងរាស្រ្តក្នុងមណ្ឌល ជាមួយឯកឧត្តម ហ៊ុន ណេង ទេ។ ចឹងខ្ញុំមិនបានដឹង ពី​ដំណោះ​ស្រាយ​ផ្ទៃក្នុង បែបយ៉ាងណាទេ ព្រោះនេះជារឿងបក្ស ដែលគេតម្រូវ។ (...) យើងធ្វើការទូទៅតែទៅលើ កង​កម្លាំង​ប្រដាប់​អាវុធ ប៉ូលីស ទាហាន មុខងារសាអារណៈប៉ុណ្ណោះ។»

ទស្សនាវដ្តីមនោរម្យ.អាំងហ្វូ នៅមិនអាចសុំប្រតិកម្មតប ពីលោក អ៊ុក សំអុល អភិបាលក្រុងបានលុង នៃខេត្តរតនគីរី បាន​នៅ​ឡើយទេ ដោយទូរស័ព្ទរបស់លោក មិនអាចភ្ជាប់ទំនាក់ទំនងបាន។

សូមបញ្ជាក់ថា អតីតនាយករងសាលាខេត្តរតនគិរី លោក អ៊ុក សំអុល ត្រូវបានមកកាន់តំណែង ជាអភិបាលក្រុង បានលុង កាលពីថ្ងៃទី២៧ ខែឧសភា ឆ្នាំ២០១៤កន្លងមក ជំនួសលោក លី វិន្ទ ដែលត្រូវធ្វើជាអភិបាលរងខេត្តរតនគិរីវិញ។ ក្នុង​រយៈ​ពេល​ជិតមួយឆ្នាំមកនេះ លោក អ៊ុក សំអុល ទំនងជាបានធ្វើអ្វី អនុម័តដោយខ្លួនឯង មិនមានការសហការល្អ ជាមួយ​មូលដ្ឋាន ប្រជា​ពលរដ្ឋ និងក្រុមអាជីវករឡើយ ដែលជាមួលហេតុ នាំឲ្យប្រជាពលរដ្ឋ មិនអាចទទួលយកបាន និងស្នើ​ពាក្យ​បណ្តឹង ទៅកាន់តំណាងរាស្រ្ត របស់ខ្លួនតែម្តង។ នេះ បើតាមការអះអាង របស់លោក ឆាយ ធី៕