បន្ទាប់ពីបំណង ក្នុងការបញ្ចូលកូនស្រី របស់លោក កឹម សុខា គឺកញ្ញា កឹម មនោរវិទ្យា ទៅក្នុងសមាសភាព នៃសមាជិក​គណៈកម្មាធិការជាតិ រៀបចំការបោះឆ្នោត ហៅកាត់ថា គ.ជ.ប ត្រូវបានអាក់ខាននោះមក ប្រភពមួយ ដែលស្និតនឹង​គណបក្សសង្គ្រោះជាតិ បានទម្លាយឲ្យដឹង ក្នុងថ្ងៃនេះថា សមាជិកជាស្ត្រីមួយរូប ក្នុងចំណោមសមាជិកទាំងបួន មកពី​គណបក្ស​ប្រឆាំង មានជាប់សាច់ឈាម ជាមួយប្រធានគណបក្ស។

សមាជិកជាស្ត្រីម្នាក់នេះ អាចនឹងធ្វើឲ្យ អង្គការសង្គមស៊ីវិលមួយចំនួន ដែលធ្វើសកម្មភាពតស៊ូមតិ សុំឲ្យមានវត្តមានស្ត្រី នៅក្នុង គ.ជ.ប នោះ ទំនងជាបានសប្បាយចិត្ត នឹងឃើញវត្តមានអ្នកស្រី តែ ម៉ានីរ៉ុង នៅក្នុងសមាសភាពទាំងបួននាក់ ដែលតំណាងឲ្យគណបក្សសម្លេងភាគតិច នៅក្នុងរដ្ឋសភា ដែលខុសពីសមាសភាព ទាំងបួននាក់ផ្សេងទៀត មកពី​គណបក្ស​កាន់អំណាច។ នេះបើគេយោង ទៅលើលិខិត របស់គណៈកម្មាធិការអចិន្ត្រៃយ៍ នៃរដ្ឋសភានីតិកាលទី៥ ចុះថ្ងៃ​ទី០៧ ខែមេសាម្សិលម៉ិញ និងលិខិតរបស់លោក សម រង្ស៊ី ចុះថ្ងៃទី០៨ ខែមេសា ឆ្នាំ២០១៥ ក្នុងការអនុម័ត ទៅលើបញ្ជី​ឈ្មោះ​បេក្ខជន ដែលបានដាក់ពាក្យឈរឈ្មោះ ជាសមាជិក គ.ជ.ប ថ្មី។

ប្រភពដែលសុំមិនបញ្ចេញឈ្មោះ បានបង្ហើបប្រាប់ទស្សនាវដ្តីមនោរម្យ.អាំងហ្វូ ឲ្យដឹងថា អ្នកស្រី តែ ម៉ានីរ៉ុង ត្រូវជា​ប្អូន​ជីដូនមួយ របស់លោក សម រង្ស៊ី ដែលជាប្រធានគណបក្ស។ ប្រភពដដែលនោះ បានបញ្ជាក់ដូច្នេះថា «តែ ម៉ានីរ៉ុង មក​ពី​គណបក្សសង្គ្រោះជាតិ? ហេតុម្តេច មិនដែលលឺឈ្មោះ? មិនដែលឃើញ មកធ្វើការផងហ្នឹង! ចុះដាក់ពាក្យទៅរដ្ឋសភា អ្នកណាជាអ្នកចុះហត្ថលេខា?»។

ទស្សនាវដ្តី បានព្យាយាម សុំការស្រាយបំភ្លឺ ពីអ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ តែមិនទទួល​បាន​ជោគជ័យទេ ដោយលោកមិនទទួលទូរស័ព្ទ។ ដោយឡែក អ្នកស្រី តែ ម៉ានីរ៉ុង ផ្ទាល់ ក៏មិនអាចភ្ជាប់ ទំនាក់ទំនង​បានដែរ។

គេនៅមិនទាន់ដឹងថា ការលើកឡើង របស់ប្រភពខាងលើ អាចជាការរិះគន់ ដែលចំមុខ ទៅលើប្រព័ន្ធបក្ខពួក ឬគ្រួសារ​និយម ដែលចាក់ស្រែះស្រាយមិនចេញ នៅក្នុងសង្គមកម្ពុជា ដែលមានរហូតដល់គណបក្សប្រឆាំងនេះ ឬយ៉ាងណាទេ។ ប៉ុន្តែគណបក្សសង្ក្រោះជាតិ បានរងការរិះគន់ម្ដងរួចហើយ ជុំវិញករណី នៃការប៉ុនប៉ងដាក់បញ្ចូលកញ្ញា គឹម មនោវិទ្យា កូនស្រីលោក កឹម សុខា ជាអនុប្រធានគណបក្ស ទៅក្នុងសមាសភាសសមាជិក គ.ជ.ប ថ្មីនេះ។

» សូមអានអត្ថបទដែលទាក់ទង៖ «កូនស្រី កឹម សុខា ជាសមាជិក គ.ជ.ប» បញ្ហាគ្រួសារនិយមវាយលុក?

សូមរំលឹកថា បន្ទាប់ពីបញ្ចប់ជំនួប ប្រជុំសម្ងាត់ នាវិមានរដ្ឋសភា កាលពីថ្ងៃទី១៧ ខែវិច្ឆិការ ឆ្នាំ២០១៤ លោក ប៊ិន ឈិន ប្រធានក្រុមការងារ នៃគណបក្សប្រជាជនកម្ពុជា បានលើកឡើងជាថ្មីថា បញ្ហា«សញ្ជាតិ» និង«ញាតិលោហិត» ជា​ចំណុច​ចំបង នៃស្ថាប័ន គ.ជ.ប នេះ ដែលមិនអាច ឲ្យមានការទាក់ទង និងថ្នាក់ដឹកនាំនៃគណបក្សនយោបាយឡើយ ហើយ​លោក​បាននិយាយថា ចំណុចទាំងពីរនេះ នឹងទុកឲ្យថ្នាក់ដឹកនាំកំពូល នៃគណបក្សទាំងពីរ ជាអ្នកសម្រេច។

យ៉ាងណាក៏ដោយ តាមមាត្រា៥ ចំណុច៦ នៃច្បាប់ស្តីពីការរៀបចំ និងការប្រព្រឹត្តទៅ នៃគណកម្មាធិការជាតិ​រៀបចំ​ការ​បោះឆ្នោត ដែលទើបត្រូវបាន ឡាយព្រះហស្ថលេខា ដោយអង្គព្រះមហាក្សត្រថ្មីៗនោះ បានចែងថា៖ «មិនត្រូវជា​សហព័ន្ធ ឬញាតិលោហិត ឬញាតិព័ន្ធ រហូតដល់ថ្នាក់ទីបី របស់ប្រធាន ឬអនុប្រធានគណបក្សនយោបាយ ដែលចូលរួម​ប្រកួត​ប្រជែង ក្នុងការបោះឆ្នោត»៕