សេចក្ដីជូនដំណឹងមួយ របស់ សាលារាជធានីភ្នំពេញចេញផ្សាយ​ នៅថ្ងៃ ទី៧ ខែមីនា ឆ្នាំ២០១៥នេះ បានផ្សាយដឹង​សារ​ជាថ្មី ស្ដីពីការពង្រីក កំណាត់វិថីសម្ដេច សុធារស ចាប់ពីចំណុចស្ដុបចំការមន ឬស្ដុបជលផល មកដល់ចំណុចផ្លូវកែង​ខាង​ជើង ជាប់របងស្ថានទូតរុស្សី និងការសម្រួល ដាក់ឱ្យមានចរាចរណ៍ឯកទិស ជាបណ្ដោះអាសន្ន កំណាត់ផ្លូវមួយចំនួន ជា​ពិសេស​កំណាត់ផ្លូវសម្ដេច សុធារស នេះតែម្ដង។

សេចក្ដីជូនដំណឹងរបស់សាលា រាជធានីភ្នំពេញ បានឱ្យដឹងថា ការសម្រេចចរាចរណ៍ឯកទិស នៅលើកំណាត់ ផ្លូវមួយនេះ ដើម្បីបញ្ជៀសការកក ស្ទះចរាចរណ៍ ដែលតែងតែកើតមានឡើង។ ប៉ុន្តែការសម្រេចឲ្យធ្វើចរាចរណ៍ ឯកទិសនេះ មាន​លក្ខណៈ​ជាបណ្ដោះអាសន្ន ដោយកំណត់រយៈពេលត្រឹម៣ខែប៉ុណ្ណោះ។

ការផ្លាស់ប្ដូរជំហររបស់សាលារាជធានី បានធ្វើឡើង បន្ទាប់ពីមានប្រតិកម្ម របស់ពលរដ្ឋអ្នកដែលរស់នៅ តាមដងផ្លូវ​សម្ដេច​សុធារសនេះ ដែលបានហៅការសម្រេច ដាក់ឲ្យមានចរាចរណ៍ឯកទិស កាលពីប៉ុន្មានថ្ងៃមុន ថាជាការសម្រេច ដែល​«បិទឆ្នាំងបាយ» របស់ពលរដ្ឋទាំងនោះ។ ការត្អូញត្អែរ របស់ប្រជាពលរដ្ឋ ដែលរស់នៅលើ តាមដងផ្លូវ​នេះ និងភាគ​ច្រើន សុទ្ធសឹងជាអ្នកលក់ដូរ ផលិតផលសិប្បកម្មខ្មែរនោះ បានឲ្យដឹងថា ពួកគាត់ ពិបាកក្នុងការចេញចូលផ្ទះខ្លួនឯង ជា​អន្លើ ហើយគ្មានអតិថិជន ធ្វើដំណើរមកទិញផលិតផលរបស់ពួកគាត់។

» សូមអានអត្ថបទ ដែលទាក់ទងឡើងវិញ ដោយចុចនៅលើទីនេះ។

សូមបញ្ជាក់ដែរថា នៅក្នុងសេចក្ដីជូនដំណឹង របស់សាលារាជធានីភ្នំពេញដដែលនេះ នៅមានសម្រេចដាក់ ឱ្យចរាចរណ៍​ជាផ្លូវឯកទិស ជាបណ្ដោះអាសន្ន ទៅលើ កំណាត់ផ្លូវមួយចំនួនទៀត ដូចជា កំណាត់ផ្លូវប្របមាត់ទន្លេ ត្រូវធ្វើដំណើរ​ឯក​ទិស តាមទិសដៅពីគល់ស្ពានខាងលិចស្ពានតន្ដ្រី នៃកោះពេជ្រ ទៅគល់ស្ពានខាងលិចស្ពានឥន្ធនូ និងកំណាត់ផ្លូវ​លេខ​៧៨ ត្រូវធ្វើដំណើរឯកទិស តាមទិសពីចំណុចខាងត្បូង ជាប់របងស្ថានទូតអូស្ដ្រាលី ទៅគល់ស្ពានខាងលិចស្ពានតន្ដ្រី ។

សូមអានសេចក្ដីប្រកាសនេះទាំងស្រុង ដូចតទៅ៖