ពីការបែកបាក់ស្នេហាធម្មតា មកប្រព្រឹត្តិទោសឧក្រិដ្ឋ យ៉ាងអាក្រក់ជួរជាតិ។ អាឡិច (Alec N.) អ្នករស់នៅក្នុងក្រុង មីនាប៉ូលីស (Minneapolis ក្នុងរដ្ឋមីណេសូតា ភាគខាងជើងសហរដ្ឋអាមេរិក) ត្រូវបានចាប់ខ្លួន ដោយអាជ្ញាធរតំបន់ កាលពីយប់ថ្ងៃព្រហស្បត្តិ៍ ចូលមកថ្ងៃសុក្រ សប្ដាហ៍មុន ពីបទបានចូលទៅចាប់រំលោភ សេពសន្ធវៈលោក អតីត​សង្សា​របស់ខ្លួន។

សារព័ត៌មានក្នុងតំបន់ Minneapolis Star Tribune បានរាយការណ៍ថា ដើម្បីឈានទៅសម្រេចបំណង នៃតណ្ហា​របស់​ខ្លួន បុរសនេះ បានចូលទៅសំងំលាក់ខ្លួន ជាច្រើនម៉ោង នៅក្នុងទូរបស់ស្ត្រី ជាអតីតគូស្នេហ៍ ធ្លាប់រស់នៅជាមួយគ្នា។

យុវតីរងគ្រោះ ដែលនគរបាលមិនបានបញ្ចេញឈ្មោះ ទើបនឹងវិលត្រឡប់ ពីដំណើរផ្លូវឆ្ងាយមួយ កាលពីល្ងាចថ្ងៃពុធ ហើយនាងបានឃើញ នៅលើទ្វាចូលផ្ទះ នូវពាក្យគំរាមមួយ របស់អតីតប្រុសស្នេហ៍របស់នាង ដែលនាងបានចែកផ្លូវគ្នា តាំងពីប៉ុន្មានសប្ដាហ៍មុន។ តែដោយសារអស់កម្លាំងល្ហិតល្ហៃ យុវតីបានគិតថា មិនទាន់ខ្វល់ខ្វាយពីរឿងនេះ​ភ្លាមៗ​នោះ​ទេ និងបានចូលទៅគេងភ្លាម នៅវេលាប្រមាណជា ម៉ោង៩យប់។

នៅពីរម៉ោងក្រោយមក ហេតុការណ៍ដ៏អាក្រក់បានកើតឡើង។ ស្ត្រីវ័យក្មេង បានភ្ញាក់ដឹងខ្លួនក្រញ៉ាង ព្រោះមាន អាឡិច ស្រាតខ្លួនននលគោក នៅគេងក្នុងគ្រែក្បែរនាង។ ជាល្បែងខុសរឿង និងបំពានច្បាប់។ បុរសវ័យ៣០ឆ្នាំរូបនេះ ចង់​បង្ក​ការភ្ញាក់ផ្អើល ដោយអតីតសង្សាខ្លួន ហើយបានលួចចូលក្នុងផ្ទះ តាំងពីមុនយុវតីត្រឡប់មកវិញ ហើយបានសំងំក្នុងទូ ដាក់ខោអាវ តាំងពីច្រើនម៉ោងមកហើយ។

កាន់កាំបិតចិតបន្លែនៅនឹងដៃ អាឡិច បានគម្រាមទៅអតីតគូរស្នេហ៍ខ្លួន ឲ្យដោះខោអាវចេញ ហើយបន្ទាប់មក បានធ្វើ​សកម្មភាពរំលោភ សេពសន្ធវៈ មុននឹងគេចខ្លួនចេញទៅបាត់។ រីឯយុវតីរងគ្រោះវិញ បានហៅនគរបាល ក្នុងពេល​បន្ទាប់​មក ដើម្បី​ឲ្យជួយធ្វើអន្តរាគមន៍ និង​បញ្ជូននាងទៅកាន់មន្ទីរពេទ្យ។

ជនចាប់រំលោភ មានបំណងចង់បំភ្លេចរឿងនេះ និងចង់ផ្សះផ្សាជាមួយអតីតសង្សាខ្លួនវិញ ដោយបានទូរស័ព្ទ​មក​មន្ទីរ​ពេទ្យ និយាយជាមួយយុវតីរងគ្រោះ។ តែដោយមានការផ្ដល់យោបល់ ពីនគរបាលផង អតីតស្រីស្នេហ៍បានបញ្ចុះ​បញ្ចូល​ឲ្យ អាឡិច មកមើលនាង ដល់មន្ទីរពេទ្យ។ គឺនៅពេលនោះហើយ ដែលបុរសម្នាក់នេះ ត្រូវបាននគរបាល​ឃាត់​ខ្លួន ដោយមិនពិបាកហត់ ក្នុងការស្រាវជ្រាវ និងដេញតាមចាប់៕