បាតុករ៤សហគមន៍ ប្ដេជ្ញាបន្តបាតុកម្ម
- ដោយ: ក. វិច្ចនី អត្ថបទ៖ក. វិច្ចនី ([email protected]) - យកការណ៍៖ ហេង វុទ្ធី - ភ្នំពេញ ថ្ងៃទី ២០ មករា ២០១៥
- កែប្រែចុងក្រោយ: January 20, 2015
- ប្រធានបទ: សិទ្ធិ
- អត្ថបទ: មានបញ្ហា?
- មតិ-យោបល់
-
ក្រុមបាតុករ មកពីសហគមន៍ទាំងបួន រួមមាន សហគមន៍បូរីកីឡា៣មករា សហគមន៍ព្រលានយន្តហោះអន្តរជាតិភ្នំពេញ (SOS) សហគមន៍បឹងកក់ និងបណ្តាញអតីតស្ត្រីបឹងកក់ បានប្ដេជ្ញាចិត្តថា ពួកគាត់នឹងមិនបញ្ឃប់ការធ្វើបាតុកម្ម ដែលពួកគាត់បានគ្រោងធ្វើ ដល់ទៅមួយខែជាប់គ្នានោះទេ។ ពួកគាត់បាននិយាយទៀតថា នឹងបន្តធ្វើបាតុកម្មនេះ រហូតទាល់តែមានការដោះលែងសកម្មជនដីធ្លី ចំនួន១៩នាក់ និងបើទោះជាមានការអន្តរាគមន៍បំបែក ពីកងកម្លាំងសន្តិសុខសាលារាជធានីភ្នំពេញនោះក៏ដោយ។
ក្រុមសហគមន៍ទាំងនោះ បានជួបប្រជុំគ្នាមានចំនួនប្រមាណជា ៣០០នាក់ កាលពីព្រឹកថ្ងៃទី ២០ ខែមករានេះ ប៉ុន្តែនៅម៉ោងប្រមាណជាង ៩ :៣០នាទី ការជួបជុំនោះត្រូវបានក្រុមសន្ដិសុខធ្វើការបំបែក និងរុញក្រុមបាតុករដែលនៅសេសសល់ ប្រមាណជា២០ ទៅ ៣០នាក់ ទៅនៅក្បែរវត្តភ្នំវិញ។ អ្នកស្រី យ៉ោម បុប្ផា តំណាងបាតុករ មកពីសហគមន៍បឹងកក់បាននិយាយថា ពួកគាត់មិនរត់គេចទៅណានោះទេ ដោយពួកគាត់គ្រាន់តែមិនចង់ ឲ្យមានការប៉ះទង្គិចជាមួយ និងកងកំលាំងសន្តិសុខប៉ុណ្ណោះ ហើយពេលដែលអ្នកស្រីថ្លែងជាមួយអ្នកសារព័ត៌មាននេះ ពួកអ្នកស្រីកំពុងរកកន្លែងសំរាក នៅតាមដើមឈើជាបណ្ណោះអាសន្នសិន។
នៅក្នុងការជួបជុំពីព្រឹក ក្រុមបាតុការបានប្រារព្ធពិធីព្រលែងសត្វចាបទាំង ១៩ក្បាល ដើម្បីការបួងសួង សុំឲ្យមានការដោះលែងសកម្មជន ទាំង១៩នាក់ ហើយក៏មានការចែកបូ និងកន្សែងបង់ព័ណ៌លឿងផងដែរ ដើម្បីបង្ហាញពីការរងចាំរបស់ពួកគាត់ ដែលចង់ឲ្យមានការដោះស្រាយពីរដ្ឋាភិបាល ទៅតាមអ្វីដែលពួកគាត់ទាមទារចង់បាន។
អ្នកស្រី យ៉ោម បុប្ផា និយាយទៀតថា ពួកគាត់មិនមែនមកបង្កបញ្ហាលំបាកដល់អាជ្ញាធរ និងប្រជាពលរដ្ឋដទៃនោះទេ។ អ្វីដែលមកធ្វើបាតុកម្មនេះ ពួកអ្នកស្រីគ្រាន់តែចង់ទទួលបានការដោះស្រាយស្របច្បាប់ ហើយពួកគាត់នឹងនៅអង្គុយ នៅសួនរបស់លោកយាយពេញនេះបន្តទៀត ព្រោះអាជ្ញាបានធ្វើការរារាំងមកលើក្រុមបាតុករ ដោយមិនឲ្យដង្ហែរចូលទីលានប្រជាធិបតេយ្យ។
នៅពេលដែលកងកម្លាំងរបស់សាលារាជធានី បានចុះមកធ្វើការអន្តរាគមន៍ មិនឲ្យក្រុមសហគមន៍ធ្វើបាតុកម្ម ក្រោមមូលហេតុសណ្ដាប់ធ្នាប់នោះ សាលារាជធានីបានប្រកាសឲ្យអ្នកដែលមិនពាក់ព័ន្ធនឹងបញ្ហាដីធ្លី ឲ្យនាំគ្នាដកខ្លួនចេញពីហ្វូងបាតុករ រួមទាំងអ្នកសារព័ត៌មានផងដែរ។ រីឯអ្នកដែលមានបញ្ហាដីធ្លី សាលារាជធានីតម្រូវឲ្យធ្វើការដកថយ ត្រឡប់ទៅដាក់លិខិតទៅសាលារាជធានី ដើម្បីសុំធ្វើការដោះស្រាយបញ្ហាទាំងនោះវិញ៕