ការតម្លើងថ្លៃតូប បន្តបញ្ហាចុងក្រោយ ឲ្យផ្សារនាគមាស
- ដោយ: ក. សោភណ្ឌ ដោយ ក. សោភ័ណ្ឌ (ទាក់ទង៖ [email protected])-ភ្នំពេញ ថ្ងៃទី២៧ វិច្ឆិកា ២០១៤
- កែប្រែចុងក្រោយ: November 27, 2014
- ប្រធានបទ: អាជីវកម្ម
- អត្ថបទ: មានបញ្ហា?
- មតិ-យោបល់
-
ជម្លោះថ្លៃតូបដែលម្ចាស់ផ្សារនាគមាស បានតម្លើងជាប្រចាំឆ្នាំ នៅតែជាបញ្ហាជជែកគ្នា មិនទាន់ដាច់ស្រេចនៅឡើយ រហូតមកដល់ព្រឹកថ្ងៃទី២៧ ខែវិច្ឆិកានេះ។ ប៉ុន្តែយ៉ាងហោចណាស់ កង្វល់ទាំង៦ចំណុច ដែលទាមទារដោយក្រុមអាជីវករ ទទួលបានដំណោះស្រាយសឹងតែទាំងអស់ហើយ។
តំណាងអាជីវករនៅផ្សារនាគមាស អ្នកស្រី សំ សារិន្ទ បានថ្លែងប្រាប់ទស្សនាវដ្តីមនោរម្យ.អាំងហ្វូថា លទ្ធផលនៃកិច្ចពិភាក្សានៅព្រឹកថ្ងៃទី២៧ ខែវិច្ឆិកានេះ មិនទទួលបានដំណោះស្រាយណាមួយប្រសើរឡើយ ព្រោះថាចំណុចចុងក្រោយ ដែលនិយាយពីការតម្លើងថ្លៃតូបប្រចាំឆ្នាំ នៅមិនមានការយល់ស្របគ្នានៅឡើយ។ ភាគីម្ចាស់ផ្សារនៅតែពង្រឹងជំហ យកការតម្លើងថ្លៃតូប ៣០ភាគរយក្នុងមួយឆ្នាំ ចំណែកឯក្រុមអាជីវករវិញទាមទារ ឲ្យតម្លើងថ្លៃតែត្រឹម ១០ភាគរយក្នុងមួយឆ្នាំប៉ុណ្ណោះ។
ការពិភាក្សាជុំវិញករណីផ្សារនាគមាស នាព្រឹកថ្ងៃនេះ ជាការធ្វើលើកទីពីរហើយ បន្ទាប់ពីកិច្ចប្រជុំនេះ ត្រូវបានរៀបចំធ្វើជាលើកទីមួយ កាលពីរសៀលម៉ោង៣ ថ្ងៃពុធ ទី២៦ ខែវិច្ឆិកា មួយថ្ងៃមុន ក្រោមការសម្របសម្រួល ពីលោក ឯក ឃុនដឿន អភិបាលនៃគណៈអភិបាលខណ្ឌទួលគោក និងលោក ប៉ាង លីដា ជាអភិបាលរងខណ្ឌទួលគោក។ ចំណុច៥ ពីក្នុងចំណោមចំណុចទាំង៦ ត្រូវបានព្រមព្រៀងគ្នា ក្នុងនោះមាន ការសុំឲ្យធ្វើអនាម័យផ្សារនៅពេលយប់ ការសុំឲ្យយកតម្លៃផ្សារជួលកណ្តាលប្រចាំខែ ការសុំឲ្យដកអ្នកយកភាស៊ី P12 (អ្នកយកលុយ) ចេញពីផ្សារ និងការស្នើសុំឲ្យបើកទឹកប្រើប្រាស់ដូចធម្មតាវិញ។
ប៉ុន្តែបញ្ហាតម្លើងថ្លៃតូប នៅតែជាបញ្ហាដែលជជែកគ្នាមិនត្រូវ ដោយសារតែភាគីម្ចាស់ផ្សារ ទាមទារឲ្យមានការកំណត់ថ្លៃ ស្របតាមកិច្ចសន្យាជួលតូប ខណៈអាជីវករនៅតែត្អូញត្អែរពីការចំណូលតិច ពីការរកទទួលទានរបស់ខ្លួន។ តាមសេចក្តីជូនដំណឹងមួយ ស្តីពីតម្លៃជួលតូបចុះថ្ងៃទី១ ខែតុលា ឆ្នាំ២០១៤នេះ បានបង្ហាញនូវតួលេខតម្លើងថ្លៃ ប្រមាណជា៣០ភាគរយ នៃការផ្លាស់ប្តូរតម្លៃពីតូបតូចទៅធំ ក្នុងនោះ ពី១៨ ទៅ២៤ ដុល្លារ ពី៩០ ទៅ១២០ដុល្លារ និងពី៣២០ ទៅ៤០០ដុល្លារ។ ការតម្លើងថ្លៃនេះ ជំរុញឲ្យក្រុមអាជីវករដែលមានគ្នាប្រមាណជា១០០នាក់ ប្រមូលគ្នាធ្វើបាតុកម្មនៅពីមុខផ្សារ ដោយបានបិទផ្សារលែងលក់ដូរ កាលពីថ្ងៃអង្គារទី២៥ ខែវិច្ឆិកាកន្លងមក។
យ៉ាងណាក៏ដោយ នៅក្នុងកិច្ចពិភាក្សាលើកទីពីរនេះ លោកអភិបាលរងខណ្ឌទួលគោក ប៉ាង លីដា បានសម្រេច លើកទៅពិភាក្សា ជាលើកទី៣ និងទី៤ នៅថ្ងៃទី១ និងទី២ ខែធ្នូ ជាបន្តទៀត៕