មកដល់ម៉ោងជាង៤ ថ្ងៃទី១១ ខែ​វិច្ឆិកា​នេះ លោក មាជ សុវណ្ណរ៉ា ក៏​ត្រូវ​បាន​តុលាការ​សាលា​ដំបូង​រាជធានី​ភ្នំពេញ ចេញ​ដីការ​ចោទ​ប្រកាន់ និង​ធ្វើការ​ឃុំ​ខ្លួន​ជា​បណ្តោះ​អាសន្ន​នៅ​មន្ទីរ​អប់រំ​កែប្រែ​ម១ ព្រៃ​សរ ក្រោម​បទ​ចោទ​ញុះ​ញង់ បង្ក​ឲ្យ​មាន​អំពើ​ហិង្សា​លើ​មន្រ្តី​រាជការ​សាធារណៈ កាល​ពី​ថ្ងៃ​ទី១៥ ខែ​កក្កដា ឆ្នាំ​២០១៤។ ឯ​ប្រជា​ពលរដ្ឋ​១០នាក់ រួម​ទាំង​ព្រះ​សង្ឃ​មួយ​អង្គ ដែល​បាន​ចាប់​ខ្លួន​នោះ កំពុង​ស្ថិត​ក្នុង​ការ​សួរ​ដេញ ដោយ​មន្រ្តី​តុលាការ​សាលា​ដំបូង រាជធានី​ភ្នំពេញ នៅ​ឡើយ។ នេះ​បើ​តាម​ការ​បញ្ជាក់ របស់​មន្រ្តី​អង្គការ​លីកាដូ ដែល​មាន​វត្តមាន ក្នុង​ការ​សួរ​ដេញ​ដោល​នោះ។

នៅថ្ងៃទី១១ ខែវិច្ឆិកានេះ ស្របពេលដែលតុលាការក្រុងភ្នំពេញ កំពុងធ្វើការសាកសួរស្រ្តីអ្នកភូមិបឹងកក់ ប្រាំពីរ​នាក់ ដែលបានចាប់ខ្លួនកាលពីមួយថ្ងៃមុននោះ អាជ្ញាធរក្រុងភ្នំពេញ ក៏បានបន្តចាប់ខ្លួនមនុស្ស ជាបន្តបន្ទាប់​ទៀត ទៅតាមដីកាបង្គាប់ឲ្យចាប់ខ្លួនរបស់តុលាការដដែលនេះ។ ការបន្តចាប់ខ្លួននោះ មានក្រុមអ្នកតវ៉ាបីនាក់ និងព្រះសង្ឃមួយអង្គ នៅចំណុចមុខសាលាដំបូងរាជធានីភ្នំពេញ។ បន្ទាប់មក នាវេលាម៉ោង១០ និង៤០​នាទី​ព្រឹកថ្ងៃដដែល លោក មាជ សុវណ្ណរ៉ា ប្រធាននាយកដ្ឋានព័ត៌មានគណបក្សសង្គ្រោះជាតិ ក៏ត្រូវបានចាប់ខ្លួនដែរ ត្រង់ចំណុចផ្លូវភ្លោះ ទល់មុខមន្ទីរពេទ្យ អង្គឌួង ខណៈកំពុងធ្វើដំណើរតាមរថយន្ត។

សូមរំលឹកថា លោក មាជ សុវណ្ណរ៉ា កាលពីថ្ងៃទី១២ ខែសីហា កន្លងទៅ សាលាដំបូងរាជធានីភ្នំពេញ​ធ្លាប់ចេញ​ដីការកោះហៅ ឲ្យចូលខ្លួនបំភ្លឺនៅសាលាដំរាជធានីភ្នំពេញ ករណីហិង្សានៅទីលានប្រជាធិបតេយ្យ កាលពី​ថ្ងៃ​ទី១៥ ខែកក្កដា ឆ្នាំ២០១៤ នៅជិតស្ពាននាគ ផ្លូវព្រះនរោត្តម។

ក្នុងថ្ងៃទី១១ ខែវិច្ឆិកានេះ សាលារាជធានីភ្នំពេញ ក៏បានចេញសេចក្តីប្រកាសមួយ ដោយចាត់ទុកការតវ៉ា​អ្នក​ភូមិ​បឹងកក់ ថា«មិន»គោរពតាមច្បាប់។ សេចក្តីប្រកាសនោះបន្តថា ការតវ៉ានេះជាទង្វើប្រាសចាក និង​រំលោភ​លើ​មាត្រា ៧៨ នៃច្បាប់ស្តីពីសុវត្ថិភាពចរាចរណ៍ផ្លូវគោក និងការសម្តែងមតិដោយសន្តិវិធី។ សេចក្តីប្រកាស​នោះ បានបញ្ជាក់ថា៖ «ក្នុងគោលបំណងរក្សាសណ្តាប់ធ្នាប់ និងផលប្រយោជន៍សាធារណៈ របស់ប្រជា​ពលរដ្ឋ​ទូទៅ អាជ្ញាធរ បានបង្ខំចិត្តចាត់វិធានការតាមផ្លូវច្បាប់ ចំពោះអ្នកដែលមិនអនុវត្តតាមច្បាប់ជាធរមាន​នៅ​កម្ពុជា»៕

សូមទស្សនា វីដេអូ អានដីកាចាប់ខ្លួនរបស់អាជ្ញាធរ នៅចំពោះមុខលោក មាជ សុវណ្ណរ៉ា ដូចខាងក្រោម៖