សាលាដំបូងរាជធានីភ្នំពេញ បានបន្តសវនាកា ទៅលើជនត្រូវចោទទាំង២៣នាក់ តែនៅតែបន្តហាមឃាត់ មិនឲ្យជន​ត្រូវចោទ លើកពីភស្ដុតាងដោះបន្ទុក និងហាមមេធាវីរបស់ជនត្រូវចោទ មិនឲ្យចាក់វីដេអូ បង្ហាញពីភាពគ្មាន​ទោស​ពៃ​របស់កូនក្ដីខ្លួននោះឡើយ។

រូបរបស់ក្រុមអ្នកគាំទ្រជនទាំង២៣នាក់ នៅខាងក្រៅសាលាដំបូង។ (រូបថតហ្វេសប៊ុក)

ប្រព័ន្ធយុត្តិធម៌ - គេហទំព័ររបស់អង្គការការពារសិទ្ធិមនុស្សលីកាដូ បានឱ្យដឹងថា សវនាការបានចាប់ផ្តើមនៅ​វេលា​ម៉ោង៨ព្រឹក។ នៅក្នុងបន្ទប់សវនាការទី១ សំណុំរឿងបុរស ១០នាក់ ដែលត្រូវបានចាប់ខ្លួននៅមុខរោងចក្រ យ៉ាក់ ជីង កាលពីថ្ងៃទី២ ខែមករា។ រីឯនៅក្នុងបន្ទប់សវនាការទី២ ចៅក្រមបានសាកសួរអត្តសញ្ញាណសាក្សី ដែលមានវត្តមាន​នៅក្នុងតុលាការ។ សាក្សីមួយចំនួនបានអវត្តមាន ប៉ុន្តែទាំងភាគីដើមចោទ និងចុងចោទបានព្រមព្រៀងគ្នា ក្នុងការ​បន្តសវនាការ។ សាក្សីទី១ ត្រូវបានគេស្គាល់ថា គឺលោក អុក សម្បត្តិ អនុប្រធាននគរបាលខណ្ឌ ៧មករា។ លោកជា​សាក្សី សម្រាប់ការចោទប្រកាន់ (ដាក់បន្ទុក)។

គេហទំព័រដដែល បានរាយការណ៍ទៀតថា នៅវេលាម៉ោង០៨និង៣២នាទី ក្នុងបន្ទប់សវនាការទី១ ជនជាប់ចោទទី​ប្រាំពីរ សុគន្ធ សម្បត្តិពិសិទ្ធិ ដាក់ភស្តុតាងជូនតុលាការ។ សុគន្ធ សម្បត្តិពិសិទ្ធិ បានអះអាងថានៅថ្ងៃដែលចាប់ខ្លួន​គាត់ កងទ័ពពិសេស ៩១១ ដែលបានដាក់ពង្រាយនៅខាងក្រៅរោងចក្រ យ៉ាក ជីង បានប្រើដំបង ជំពាមកៅស៊ូ និង​កាំភ្លើងអាកា ៤៧។ តែចៅក្រមបានព្រមានគាត់ ឱ្យឆ្លើយតែសំណួរតែប៉ុណ្ណោះ ហើយមិនអនុញ្ញាតឲ្យលើ​កពី​ភស្តុតាង​ទេ។

លោកស្រីមេធាវីការពារក្ដីឲ្យលោក សុគន្ធ សម្បត្តិពិសិទ្ធិ ពុំត្រូវបានអនុញ្ញាតឲ្យដាក់បញ្ចាំងវីដេអូ នៃព្រឹត្តិការណ៍​នោះ​ទេ។ លោកស្រីបានអះអាងថា នេះជាភស្តុតាងដែលមានប្រយោជន៍ ដល់ការការពារកូនក្ដីរបស់លោកស្រី លើសំណុំ​រឿងនេះ ហើយបង្ហាញពីទីតាំងជាក់ស្តែងរបស់កូនក្ដី ក្នុងកំឡុងពេលនៃការប៉ះទង្គិចគ្នា នៅថ្ងៃទី២ ខែមករា។

តែចៅក្រមបាននិយាយថា មេធាវីការពារអាចដាក់បញ្ចាំងវីដេអូនេះ នៅពេលក្រោយ។ ការបដិសេធនេះ ត្រូវបានធ្វើ​ឡើងគ្រប់ករណីកន្លងមក ហើយមកទល់ពេលនេះ ពុំមានវីដេអូភស្តុតាងណាមួយ ត្រូវបានដាក់បញ្ចាំងនោះឡើយ។

សូមបញ្ជាក់ថា នៅថ្ងៃទី២០ ខែឧសភានេះជាថ្ងៃបន្តបើកសវនកាជាលើកទីបី ទៅលើជនត្រូវចោទ ទាំង២៣នាក់ ដែល​បានចាប់ខ្លួនកាលពីថ្ងៃទី២ និងទី៣ ខែមករានៅមុខរោងចក្រយ៉ាកជីន និងសួនកាណាឌីយ៉ាលើផ្លូវវ៉េងស្រេង បន្ទាប់ពី​ជនត្រូវចោទ ៩នាក់ ត្រូវបានសាកសួររួចរាល់ កាលពីសវនាការថ្ងៃទី៦ ខែឧសភាកន្លងមក។

ចំណែកនៅខាងក្រៅតុលាការឯណោះវិញ ចរាចរណ៍នៅខាងមុខសាលាដំបូងរាជធានីភ្នំពេញ ត្រូវបានបិទ និងមាន​កម្លាំងសន្តិសុខប្រមាណ៤០០នាក់ បានយាមកាមនៅទីនោះ។ នៅម៉ោងប្រមាណ៨កន្លះ ក្រុមអ្នកតវ៉ារាប់រយនាក់ រួម​ទាំងព្រះសង្ឃរាប់សិបអង្គ បានប៉ះទង្គិចគ្នាជាមួយកងសន្តិសុខ ខណៈពេលដែលក្រុមសន្តិសុខទាំងនោះ ព្យាយាម​ឱ្យក្រមអ្នកគាំទ្រ ថយទៅខាងក្រោយរបាំងបិទផ្លូវ៕