«យើងមិននៅស្ងៀមទេ។ យើងមិនមែនជាសាច់ ឬវត្ថុដែលគេត្រូវមកវាយយើងលេងៗទេ។ យើងជាមនុស្ស គ្មាន​អ្នកណាមានសិទ្ធិមកប្រើហិង្សាលើមនុស្សទេ។» នេះជាការលើកឡើង របស់អ្នកសារព័ត៌មានជាស្ត្រីម្នាក់ ដែល​ត្រូវ​បានក្រុមសន្តិសុខសណ្តាប់ធ្នាប់ខណ្ឌដូនពេញ វាយដំនៅពេលដែលចុះផ្តិតយករូបភាព និងព័ត៌មាននៅលើផ្លូវ​សាធារណៈ​ ក្បែរទីលានប្រជាធិបតេយ្យ កាលពីថ្ងៃទី២១ ខែមេសាឆ្នាំ២០១៤ថ្មីនេះ។

សន្ទុះជើងរាប់ភ្លេច ដែលអ្នកស្រី ម៉ាលី ម៉ាលី ទទួល នៅក្នុងព្រឹត្តិការណ៍បំបែកនៅទីលានប្រជាធិបតេយ្យ នៅថ្ងៃទី២១ ខែមេសា ឆ្នាំ២០១៤។ (រូបថត ហ្វេសប៊ុក)

សិទ្ធិនិងសេរីភាព - ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ អ្នក​សារព័ត៌មាន​ឯករាជ្យមួយរូប អ្នកស្រី ម៉ាលី ម៉ាលី បានបញ្ជាក់ថា ពេលនេះអ្នកស្រី រួមទាំងអ្នករងគ្រោះមួយចំនួនទៀត ដែលជាអ្នកសារព័ត៌មានដូចគ្នា កំពុងពិភាក្សាផ្លូវច្បាប់ ជាមួយមេធាវី (ក្រុមអ្នកច្បាប់) ដើម្បីប្តឹងអ្នកបញ្ជា និងជនដៃដល់ដែលបានប្រើហិង្សាវាយដំ ទាត់ធាក់មកលើរាងកាយអ្នកស្រី ទៅតាមផ្លូវច្បាប់។

ស្រ្តីជាអ្នកសារព័ត៌មានរូបនេះ បានបន្តថា អ្នកស្រីគ្រាន់តែជាអ្នកថតរូប ជាមួយនិងការចូលទៅឃាត់ មិនឲ្យ​មាន​ការ​ប្រើហិង្សាលើអ្នកសារព័ត៌មានដូចគ្នា ដែលគេកំពុងវាយ ស្រាប់តែក្រុមសន្តិសុខទាំងនោះ ព្រួតវាយមក​លើ​អ្នក​ស្រី​របួស មានស្លាកស្នាមជាច្រើនកន្លែង។ នៅពេលនោះ ឲ្យតែអ្នកមានម៉ាស៊ីនថតរូប ត្រូវបានពួកគេហាមឃាត់ មិនឲ្យ​ថតនូវរាល់សកម្មភាពរបស់ពួកគេ (ក្រុមសន្តិសុខ)។

អ្នកស្រីអះអាងថាក្រុមសន្តិសុខទាំងនោះ បើ«គ្មាន»អ្នកបញ្ជាទេ ក៏មិនហ៊ានវាយដែរ។ ជាទូទៅ«អ្នកបញ្ជា» ដែល​អ្នកស្រីធ្លាប់តែឃើញនោះ រួមមានលោក សុខ ពេញវុធ អភិបាលរងខណ្ឌដូនពេញ ជាមួយនិងគូកនពីរនាក់ទៀត ម្នាក់ឈ្មោះ ថា និងម្នាក់ទៀតរាងធាត់មិនស្គាល់ឈ្មោះ ក្នុងសំលៀកបំពាក់ស៊ីវិលទាំងអស់គ្នា។ អ្នកស្រីបាន​បញ្ជាក់​នូវពាក្យសម្តី ដែលបញ្ជាតាមវិទ្យុទាក់ទងក្នុងថ្ងៃទី២១ ខែមេសា នោះថា«វាយទាំងអស់ ឲ្យតែអ្នកនៅកន្លែងហ្នឹង។ (...) ទាំងអ្នកដែលមានម៉ាស៊ីនថត។»

ឯប្អូនប្រុសម្នាក់ទៀតឈ្មោះ ម៉ា ចិត្រា ដែលជាយកព័ត៌មានឲ្យបណ្តាញព្រះសង្ឃឯករាជ្យ ដែលរងរបួស ព្រោះ​តែ​ចូលរួមថតរូប និងវីដេអូនៅលើផ្លូវសាធារណៈ នៅពេលដែលក្រុមសន្តិសុខទាំងនោះ សែងអ្នកស្រីមួរ សុខហួរ។ ប្អូនប្រុសក៏ត្រូគេ (ក្រុមសន្តិសុខ) វាយក្បាលមួយដំបង ប្រេះមួកសុវត្ថិភាព និងមួយដំបងទៀត​ចំកញ្ចឹងករ«សន្លប់»​សឹងនៅនឹងកន្លែងតែម្តង។

បច្ចុប្បន្ន ប្អូនរួមនិងអ្នករងរបួសដទៃទៀត បានព្រាងពាក្យបណ្តឹង ដើម្បីប្តឹងក្រុមសន្តិសុខទាំងនោះ ពិសេសអ្នក​បញ្ជា​គឺលោក សុខ ពេញវុធ អភិបាលរងខណ្ឌដូនពេញ។ «ខ្ញុំកំពុងតែប្រមូលឯកសារ និងភស្តុតាងដែលគេប្រើហិង្សា​មក​លើខ្ញុំ។ (...) ខ្ញុំមិនមានការពាក់ព័ន្ធជាមួយគណបក្សសង្គ្រោះជាតិទេ ខ្ញុំគ្មានបំរើឲ្យគណបក្សណាមួយទេ។ គេប្រើ​ហិង្សាមកលើខ្ញុំ ខ្ញុំត្រូវតែប្តឹង ក្នុងនាមជាប្រជាពលរដ្ឋម្នាក់ និងជាអ្នកសារព័ត៌មានឯករាជ្យ។» នេះបើតាមការអះអាង​របស់អ្នករងរបួសទាំងពីរខាងលើ ដែលគ្រោងនឹងប្តឹងលោក សុខ ពេញវុធ និងគូកននាពេលឆាប់ៗខាងមុខ។

ជាមួយនឹង«ទង្វើ»ដដែលៗរបស់ក្រុមសន្តិសុខ និង«កម្សោយ»នៃវិធានការរបស់រដ្ឋាភិបាល ក្នុងការគ្រប់គ្រង​សកម្មភាព«ប្រើប្រាស់ហិង្សា»មកលើប្រជាពលរដ្ឋ នាពេលកន្លងមក និងបច្ចុប្បន្ននេះអ្នកស្រី ម៉ាលី ម៉ាលី បានធ្វើការ​ថ្កោលទោសយ៉ាងដូច្នេះថា៖ «រដ្ឋាភិបាល កំពុងតែមិនទទួលខុសត្រូវលើទង្វើរបស់ខ្លួន។ សន្តិសុខគួរណាស់​ការពារ​សន្តិសុខជូនប្រជាជន និងសង្គម មិនមែនសម្រាប់ប្រើហិង្សានោះទេ។ ខ្ញុំសូមធ្វើការថ្កោលទោស ចំពោះ​រដ្ឋាភិបាល​ដែលគ្មានសមត្ថភាព ក្នុងការរកដំណោះស្រាយ ក្រៅពីការប្រើហិង្សាមកលើប្រជាពលរដ្ឋ។»

សម្រាប់ប្អូនប្រុស ម៉ា ចិត្រា បានបន្ថែមថា ពាក្យថាសន្តិខុសល្អណាស់ សម្រាប់ការពារប្រជាពលរដ្ឋ តែរដ្ឋាភិបាល​បែរជាយកមកវាយប្រជាពលរដ្ឋខ្លួនឯងទៅវិញ។ ប្អូនប្រុសចង់ឲ្យរដ្ឋាភិបាល ក៏ដូចជាក្រសួងមហាផ្ទៃ ធ្វើការបក​ស្រាយ​នូវតួនាទីរបស់«កងសន្តិសុខ»ទាំងនោះថា តើមានតួនាទីកម្រិតណា?

និពន្ធនាយកកាសែតភ្នំពេញប៉ុស្តិ៍ លោក កៃ គឹមសុង បានថ្លែងពាក់ព័ន្ធ នឹងការប្រើប្រាស់នូវអំពើហិង្សា​មកលើអ្នក​សារព័ត៌មានថា ទាំងនោះមិនមែនជាសកម្មភាពមួយល្អ សម្រាប់សង្គមប្រជាធិបតេយ្យទេ។ លោកបានចោទសួរថា អ្វីជាទីសាធារណៈ អ្វីជាការបញ្ចេញមតិ? តាមសកម្មភាពរបស់ក្រុមសន្តិសុខ ក្នុងរយៈកាលកន្លងមកនេះ លោកបាន​ធ្វើការថ្កោលទោស ទៅលើការប្រើប្រាស់នូវអំពើហិង្សាមកលើអ្នកសារព័ត៌មាន ប្រជាពលរដ្ឋ ឬតំណាងរាស្រ្តនៅ​ទី​សាធារណៈ។ «មិនត្រូវមានវប្បធម៌ហិង្សាឡើងជង្គង់ ធ្វើដូចវាយបុកនៅទីលានសាធារណៈ។ (…) បើកន្លែង​បញ្ចេញ​មតិ ត្រូវបានគេឡើងជង្គង់ចឹង បិទអាហ្នឹងចោលតែម្តងទៅ។»

ក្នុងហេតុការណ៍កាលពីថ្ងៃទី២១ ខែមេសា ឆ្នាំ២០១៤ នៅលើដងផ្លូវសាធារណៈ ក្បែទីលាន​ប្រជាធិបតេយ្យ មាន​ក្រុម​សន្តិសុខមួយក្រុមគ្នាប្រមាណជាង៥០នាក់ ក្នុងសំលៀកបំពាក់ខៀវ មួកឃ្លុបខ្មៅ បានមករារាំងបេក្ខជន​តំណាងរាស្រ្ត​ជាប់ឆ្នោត របស់គណបក្សសង្គ្រោះជាតិ មានលោកស្រី មួរ សុខហួរ លោក រៀល ខេមរិន្ទ្រ មិនឲ្យចូលទីលាន​ប្រជាធិបតេយ្យ។ ការរារាំង ជាមួយនឹងការប្រើកម្លាំង ចាប់បង្ខំនៃក្រុមសន្តិសុខទាំងនោះ បានធ្វើឲ្យមនុស្ស​យ៉ាងតិច​១០នាក់រងរបួសស្រាល និងធ្ងន់ ក្នុងនោះមានអ្នកសារព័ត៌មានជាតិយ៉ាងតិចបីនាក់ និងអន្តរជាតិ​ម្នាក់៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី២៣ មេសា ២០១៤