ក្រុមប្រឹក្សាធម្មនុញ្ញដែលជាស្ថាប័នបកស្រាយច្បាប់ដ៏កំពូល និងបានអះអាងថា ខ្លួនមិនមានសមត្ថកិច្ចបកស្រាយ បម្រាមជួបជុំរបស់ក្រសួងមហាផ្ទៃ និងសាលារាជធានីភ្នំពេញ ដែលបានដាក់កំហិត ឲ្យបិទទីលានប្រជាធិបតេយ្យ និងហាមប្រាមការប្រមូលផ្តុំបញ្ចេញមតិ។ ទន្ទឹមនឹងនេះ ក្រុមប្រឹក្សាធម្មនុញ្ញ តាមរយៈអ្នកនាំពាក្យរបស់ខ្លួន ក៏​បាន​បន្ថែមថា ការបកស្រាយបំរាមការប្រមូលផ្តុំ គួរតែក្រសួងមហាផ្ទៃ និងសាលារាជធានីភ្នំពេញ ជាអ្នកមានសមត្ថកិច្ច​បកស្រាយ។

ស្ថាប័នក្រុមប្រឹក្សាធម្មនុញ្ញ នៅក្នុងវិមានរដ្ឋចំការមន។ (រូបភាព ccc.gov.kh)

បកស្រាយច្បាប់ - អ្នកនាំពាក្យក្រុមប្រឹក្សាធម្មនុញ្ញ លោក ព្រហ្ម ញាណវិចិត្រ បានផ្ដល់កិច្ចសម្ភាសដល់ទស្សនាវដ្តី​មនោរម្យ.អាំងហ្វូ នៅថ្ងៃទី២២ មីនា នេះថា ក្រោយពីក្រុមប្រឹក្សាធម្មនុញ្ញបើកកិច្ចប្រជុំកាលពីពេលថ្មីៗនេះ បាន​សម្រេច​ថា បម្រាមជួបជុំ ដែលត្រូវដាក់ឲ្យអនុវត្តដោយក្រសួងមហាផ្ទៃ និងសាលារាជធានីភ្នំពេញ មិនមែនជា​សមត្ថកិច្ច​របស់ក្រុមប្រឹក្សាធម្មនុញ្ញ ត្រូវបកស្រាយនោះទេ។

តែនៅពេលសួរថា តើស្ថាប័នណាមួយដែលមានសមត្ថកិច្ចបកស្រាយបម្រាមរបស់ក្រសួងមហាផ្ទៃ និងសាលា​រាជធានី​ភ្នំពេញ? លោក ព្រហ្ម ញាណវិចិត្រ ឆ្លើយបញ្ជាក់ថា៖ «រឿងនេះវាពាក់ព័ន្ធទៅនឹងសាលាក្រុង និងក្រសួង​មហាផ្ទៃ​អ្នកធ្វើ អញ្ចឹងទៅសួរខាងហ្នឹងទៅ ខ្ញុំមិនថាជាភារៈកិច្ចរបស់ក្រសួងមហាផ្ទៃ ឬរបស់សាលារាធានីទេ តែវា​មិនក្នុងសមត្ថកិច្ចក្រុមប្រឹក្សាធម្មនុញ្ញ»។

បើទោះជាអ្នកនាំពាក្យក្រុមប្រឹក្សាធម្មនុញ្ញ បានបំភ្លឺយ៉ាងនេះក៏ដោយ ក៏មាត្រា១៣៦ថ្មីនៃរដ្ឋធម្មនុញ្ញកម្ពុជា បាន​ចែង​ច្បាស់ថា៖ «ក្រុមប្រឹក្សធម្មនុញ្ញមានសមត្ថកិច្ចធានាការពារ ការគោរពរដ្ឋធម្មនុញ្ញ បកស្រាយរដ្ឋធម្មនុញ្ញ និងច្បាប់​ដែល​រដ្ឋសភាបានអនុម័ត និងព្រឹទ្ធសភាបានពិនិត្យចប់សព្វគ្រប់ហើយ »។

ការថ្លែងរបស់ មន្ត្រីអ្នកនាំពាក្យរបស់ក្រុមប្រឹក្សាធម្មនុញ្ញខាង បានធ្វើឡើងបន្ទាប់ពី  អគ្គលេខាធិការ​គណបក្សជាតិ​និយម (អតីតគណបក្សនរោត្ដម រណឬទ្ធិ) លោក មុត ចន្ថា កាលពីថ្ងៃទី០៧ ខែមីនាបានផ្ញើលិខិតតាមរយៈ​ប្រធាន ព្រឹទ្ធសភា លោក ជា ស៊ីម ទៅក្រុមប្រឹក្សាធម្មនុញ្ញ ស្នើឲ្យបកស្រាយបម្រាមជួបជុំរបស់ក្រសួងមហាផ្ទៃ និង​សាលា​រាជធានីភ្នំពេញ ដោយលើកឡើងថា បម្រាមនេះ ធ្វើឡើងផ្ទុយនឹងរដ្ឋធម្មនុញ្ញនៃព្រះរាជាណាចក្រកម្ពុជា និង​កំពុង​តែបំពានសិទ្ធិធ្វើកូដកម្ម-បាតុកម្មដោយសន្តិវិធី ដែលធានាដោយរដ្ឋធម្មនុញ្ញត្រង់ជំពូកទី៣ មាត្រា៣៧។

គួរកត់សម្គាល់ថា ក្រុមប្រឹក្សាធម្មនុញ្ញគឺស្ថាប័នឯករាជ្យ ដែលមានកាតព្វកិច្ចចម្បងបកស្រាយរដ្ឋធម្មនុញ្ញ និង​ដោះ​ស្រាយវិវាទកម្ម ទាក់ទងនឹងការបោះឆ្នោតជ្រើសតាំងតំណាងរាស្រ្ត ហើយស្ថាប័ននេះត្រូវបាន​គណបក្សប្រជាជន​កម្ពុជា ឲ្យតម្លៃ និងគោរពសេចក្តីសម្រេចរបស់ស្ថាប័ននេះ។ តែសម្រាប់គណបក្សសង្រ្គោះជាតិ ដែលជាគណបក្ស​ជំទាស់ បានចោទប្រកាន់ក្រុមប្រឹក្សាធម្មនុញ្ញ ថាជាស្ថាប័នគ្មានភាពឯករាជ្យ ហើយលំអៀងទៅរកគណបក្ស​ប្រជាជនកម្ពុជា៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី២២ មីនា ២០១៤