គណបក្សសង្រ្គោះជាតិ នៅតែទទូចដល់គណបក្សប្រជាជនកម្ពុជា ឲ្យដាក់ស្ថាប័នរៀបចំការបោះឆ្នោត​ទៅក្នុង​រដ្ឋធម្មនុញ្ញ។ ការស្មើសុំនេះ នៅតែត្រូវបានគណបក្សប្រជាជនកម្ពុជាប្រកាន់ជំហរបដិសេធ។ ប៉ុន្តែសម្រាប់អ្នក​វិភាគ​នយោបាយ​ឯករាជ្យ បានលើកឡើងថា ការដាក់ស្ថាប័នរៀបចំការបោះឆ្នោតទៅក្នុងរដ្ឋធម្មនុញ្ញ មុនការស្មើសុំធ្វើ​វិសោធនកម្ម​រដ្ឋធម្មនុញ្ញ គឺជាការខុសនីតិវិធីច្បាប់។

រូបចម្លងពីអេក្រង់របស់គេហទំព័រគ.ជ.ប.។

នយោបាយកម្ពុជា - គណបក្សសង្រ្គោះជាតិ តាមរយៈសេចក្តីជូនដំណឹងមួយ ជូនទៅគណបក្សប្រជាជនកម្ពុជា ចុះ​ថ្ងៃទី១៣ ខែមីនា នេះ បានលើកឡើងថា៖ «ការកែទម្រង់ស្ថាប័នរៀបចំការបោះឆ្នោត ឲ្យទៅជាស្ថាប័នរដ្ឋធម្មនុញ្ញ​ដែលឯរាជ្យ និងមានការជ្រើសតាំងដោយរដ្ឋសភាតាមសម្លេងពីរភាគបី(២/៣) នៃសមាជិកសភាទាំងមូល គឺមាន​លក្ខណៈចាំបាច់ជាអាទិភាព សម្រាប់ការកែទម្រង់ការបោះឆ្នោត ដែលមិនអាចរំលងបាន»។

សេចក្តីជូនដំណឹងដដែលនោះ ក៏បានជំរុញឲ្យគណបក្សប្រជាជនកម្ពុជាពិចារណា លើសំណើររបស់គណបក្ស​សង្រ្គោះ​ជាតិនេះ ដើម្បីពន្លឿនការចរចា ហើយក៏សុំពិនិត្យផងដែរលើលទ្ធភាព នៃការរៀបចំសិក្ខាសាលាថ្នាក់ជាតិ រួមគ្នាមួយឲ្យបានឆាប់ ដោយបើកទូលាយឲ្យមានការចូលរួមពីគ្រប់ភាគីជាតិ និងអន្តរជាតិ ដែលពាក់ព័ន្ធ លើការកែ​ទម្រង់ស្ថាប័នបោះឆ្នោតនេះ។

ភ្លាមៗគណបក្សប្រជាជនកម្ពុជា មិនទាន់ឆ្លើយតបយ៉ាងណានៅឡើយទេ ចំពោះសំណើររបស់​គណបក្សសង្រ្គោះ​ជាតិ។ តែលោក ព្រំ សុខា មន្រ្តីជាន់ខ្ពស់របស់គណបក្សប្រជាជនកម្ពុជា ក្នុងកិច្ចសម្ភាសជាមួយទូរទស្សន៍ជាតិ ក្នុង​ពេលចុងក្រោយបំផុតបាន អត្ថាធិប្បាយថា ការស្នើដាក់សា្ថប័នរៀបចំការបោះឆ្នោតទៅក្នុងរដ្ឋធម្មនុញ្ញ គឺមិនអាច​ទៅរួចទេ ព្រោះវាខុសច្បាប់ និងខុសគោលការណ៍រដ្ឋបាល។

អ្នកស្រាវជ្រាវបញ្ហាសង្គម និងជាអ្នកវិភាគនយោបាយឯករាជ្យកម្ពុជា លោក កែម ឡី បានពន្យល់ប្រាប់ទស្សនាវដ្តី​មនោរម្យ.អាំងហ្វូថា ការស្មើសុំរបស់គណបក្សសង្រ្គោះជាតិ ដាក់ស្ថាប័នរៀបចំការបោះឆ្នោតទៅក្នុងរដ្ឋធម្មនុញ្ញ មុនធ្វើវិសោធនកម្មរដ្ឋធនុញ្ញ គឺខុសរដ្ឋធម្មនុញ្ញ។ តែលោកកែម ឡី បញ្ជាក់ថា៖ «តែគណបក្សទាំងពីរ(បក្សប្រជាជន និងបក្សសង្រ្គោះជាតិ) អាចជជែកគ្នាលើផ្នែកនយោបាយបាន(...)។ ព្រមព្រៀងគ្នាក្រៅផ្លូវការទៅ ហើយដល់ពេល​អនុម័ត ទោះពីភាគបី ឬហាសិបបូកមួយ គឺសភាត្រូវអនុម័តតាមកិច្ចព្រមព្រៀងនយោបាយ»។

តែសម្រាប់សម្ព័ន្ធកំណែទម្រង់ការបោះឆ្នោត ដែលមាន អង្គការសង្គមស៊ីវិលជាសមាជិកជាង១០ ក្នុងកម្មវិធីមួយ នៅ​ថ្ងៃទី១២ ខែមីនា បានលើកទឹកចិត្ត ឲ្យគណបក្សប្រជាជនកម្ពុជា និងគណបក្សសង្គ្រោះជាតិ ធ្វើកំណែទម្រង់​ការ​បោះ​ឆ្នោត តាមរយៈការដាក់ស្ថាប័នបោះឆ្នោត ទៅជាស្ថាប័នធម្មនុញ្ញ ដើម្បីធានាភាពឯករាជ្យ របស់ស្ថាប័ន​បោះឆ្នោត។

លោក សម រង្ស៊ី ប្រធានគណបក្សសង្រ្គោះជាតិ បានថ្លែងក្នុងសិក្ខាសាលាមួយកាលពីពេលថ្មីៗនេះថា ការកែទម្រង់​ការបោះឆ្នោត ក្នុងកាលៈទេសៈនេះ គឺចាំបាច់ត្រូវធានាថា នឹងធ្វើឲ្យមានភាពច្បាស់លាស់ និងរឹងមាំ​សម្រាប់​ប្រទេស​កម្ពុជា ដើម្បីការពារកុំឲ្យមានបញ្ហាការបោះឆ្នោតទៅថ្ងៃក្រោយ បើទោះជាបុគ្គលណា ឬគណបក្សនយោបាយណា ចូលរួមការបោះឆ្នោតក៏ដោយ៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១៣ មីនា ២០១៤