នៅទីបំផុតបាតុកម្មបិទរាជធានីបាងកក ពីសំណាក់ក្រុមអាវលឿងថៃអស់រយៈពេលជាង ៦ សប្តាហ៍កន្លងមកនេះ ត្រូវបានប្រកាសបិទបញ្ចប់ហើយ។ ការប្រកាសបិទនេះ គឺដើម្បីកាត់បន្ថយការស្ទះចរាចរណ៍នៅក្នុងទីក្រុងបាំងកក ជាពិសេស​គឺដើម្បីបញ្ជៀសពីហានិភ័យ នៃការវាយប្រហារទៅលើបាតុករនៅពេលយប់។ កាលពីថ្ងៃ​ព្រហស្បតិ៍ រដ្ឋាភិបាល​លោក​ស្រី យីង ឡាក់ បានបង្ហាញជំហរចង់ឲ្យអង្គការសហប្រជាជាតិ ជួយដោះស្រាយវិបត្តិ​នយោបាយ​នៅក្នុងប្រទេសនេះ។

លោក ស៊ូថេប ថោងស៊ូបាន មេដឹកនាំបាតុករប្រឆាំងតវ់ា នៅទីក្រុងបាងកក។ (រូបថត ឯកសារ)

នយោបាយថៃ​ - « ពួកយើងសូមបញ្ចប់សកម្មភាពតវ៉ា បិទរាជធានីបាងកក ចាប់ពីពេលនេះតទៅ» នេះជាការ​ប្រកាសរបស់មេដឹកនាំចលនាបាតុករថៃលោក ស៊ូថេប ថងស៊ូបាន នៅចំពោះហ្វូងមនុស្ស​រាប់ពាន់នាក់កាល​ពី​យប់ថ្ងៃសុក្រម្សិលមិញ។ នេះបើតាមការចុះផ្សាយរបស់ការសែតបាំងកកប៉ុស្តិ៍របស់ថៃ។ ការប្រកាស​បញ្ចប់​យុទ្ធនាការតវ៉ាបិទទីក្រុងបាំងកកនេះ បានធ្វើឡើងក្រោយពីការវាយប្រហារដោយគ្រាប់កាំភ្លើង និងគ្រាប់បែបក្នុង​រយៈពេលមួយសប្តាហ៍ចុងក្រោយនេះ។

សូមរម្លឹកថា ក្រុមអាវលឿងថៃដែលដឹកនាំដោយអតីតឧបនាយករដ្ឋមន្រ្តី ស៊ូថេប ថង ស៊ូបាន បានដឹកនាំបាតុករ​ធ្វើសកម្មតវ៉ាបិទទីក្រុងទាំងមូលកាលពីថ្ងៃទី ១៣ ខែមករា កន្លងទៅ ដើម្បីដាក់ទម្ងន់ឲ្យលោកស្រី​នាយករដ្ឋមន្រ្តី​ចាំ​ផ្ទះបច្ចុប្បន្នចុះចេញពីតំណែង។ ការតវ៉ាបានបណ្តាលឲ្យមានអ្នកស្លាប់រហួតដល់ ២៣ នាក់ និងរងរបួសប្រមាណ ៧០០ នាក់ ដោយសារការបំផ្ទះគ្រាប់បែក និងការវាយប្រហារពីសំណាក់ខ្មាន់កាំភ្លើងមិនស្គាល់មក។

មេដឹកនាំបាតុករថៃដ៏មានប្រជាប្រិយភាព លោក ស៊ូថេប ថងស៊ូបាន បានថ្លែងកាលពីយប់ថ្ងៃសុក្រទី ២៨ ខែកុម្ភៈ​ម្សិលមិញថា ក្រុមបាតុករនឹងទៅប្រមូលផ្តុំគ្នា នៅឧទ្យានលុម្ពិនីវិញ នាថ្ងៃចន្ទសប្តាហ៍ក្រោយ។ ការបញ្ចប់​សកម្មភាពបិទក្រុងបាំងកក និងការផ្លាស់ប្តូរទៅជួបជុំគ្នានៅលុម្ពិនីនេះ ក្នុងគោលបំណងដើម្បីបន្ធូរបន្ថយការកក​ស្ទះចរាចរណ៍ ដែលបង្កឡើងដោយការប្រមូលផ្តុំគ្នានេះ។ លោក ស៊ូថេប ក៏បញ្ជាក់ដែរថា ក្រុមបាតុករបិទ​ទីក្រុង​បាងកកប្រឈមមុខនឹងហានិភ័យច្រើនណាស់ ពោលគឺពួកគេគឺជាគោលដៅនៃការវាយប្រហារដោយគ្រាប់បែក នៅពេលយប់។ ម្លោះហើយដើម្បីបញ្ជៀសហានិភ័យទាំងនេះ យើងសូមបញ្ចប់ការតវ៉ាបិទរាជធានីបាងកក។

យ៉ាងណាក៏ដោយ មេដឹកនាំចលនាបាតុកររូបនេះ នៅតែបង្ហាញជំហររឹងមាំនៅចំពោះមុខក្រុមបាតុករថា រូបលោក​នឹងខំប្រឹងជានិច្ច ដើម្បីពន្លឿននូវក្តីប្រាថ្នារបស់ខ្លួន និងរបស់ក្រុមបាតុករ ដើម្បីឲ្យលោកស្រី យីង ឡាក់ ចុះចេញ​ពី​តំណែង ពោលគឺរំលាយខ្សែស្រឡាយលោក ថាក់ ស៊ីន ឲ្យបាត់ពីរបបដឹកនាំនៅក្នុងប្រទេសថៃ។

ទាក់ទងនឹងសំណុំរឿងពុករលួយរដ្ឋាភិបាល កាលពីថ្ងៃព្រហហស្បតិ៍ទី ២៧ ខែកុម្ភៈ ឆ្នាំ ២០១៤ កន្លងទៅនេះ លោកស្រី យីងឡាក់ បានគេចវេសមិនចូលខ្លួនទៅឆ្លើយបំភ្លឺតាមការកោះហៅ របស់គណកម្មការ​ប្រឆាំងអំពើ​ពុករលួយថៃនោះទេ។ សំណុំរឿងពុករលួយ ដោយសារការធ្វេសប្រហេសកម្មវិធីទិញស្រូវជួយឧបត្ថម្ភដល់កសិករ ដែលបានកំពុងធ្វើឲ្យលោកស្រី យីងឡាក់ ឈឺក្បាលមិនតិចនោះទេ បើទោះបីជាលោកស្រីអះអាងថា ខ្លួនមិន​បាន​ធ្វើក៏ដោយ។ ពីព្រោះថា ប្រសិនបើគណកម្មការប្រឆាំងអំពើពុករលួយថៃរកឃើញថា លោកស្រីពិតជាបាន​​ប្រព្រឹត្ត​កំហុសមែននោះ បេក្ខភាពនាយករដ្ឋមន្រ្តីនៃគណបក្សភឿថៃរបស់លោកស្រី នឹងត្រូវបាត់បង់ជាក់ជាមិនខាន។

កាលពីពេលថ្មីៗនេះ រដ្ឋាភិបាល លោកស្រី យីង ឡាក់ បានស្នើសុំទៅលោក បាន គីមូន ឲ្យអង្គការសហ​ប្រជាជាតិ​ជួយដោះស្រាយវិបត្តិនយោបាយនៅក្នុងប្រទេសនេះ។ ក៏ប៉ុន្តែឆ្លើយតបនឹងជំហររបស់រដ្ឋាភិបាលថៃបែបនេះ មេដឹក​នាំចលនាបាតុករលោក ស៊ូថេប ថងស៊ួបាន បានចំអកថា មិនអាចទៅរួចនោះទេ ពីព្រោះថា អង្គការសហប្រជាជាតិ មិនដឹងពីស្ថានការណ៍នៅស្រុកថៃ ច្បាស់ជាងពលរដ្ឋថៃនោះឡើយ។ តែកាលពីព្រហស្បតិ៍ទី ២៧ ខែកុម្ភៈ លោក ស៊ូថេប បានបង្ហាញជំហរចង់ជួបចរចា ជាមួយលោកស្រីនាយករដ្ឋមន្រ្តីចាំផ្ទះ។

អស់រយៈពេលជាងបួន ខែមកហើយ ពោលគឺចាប់តាំងពីខែវិច្ឆិកាឆ្នាំ២០១៣មក ប្រទេសថៃបានធ្លាក់ក្នុងវិបត្តិ​នយោបាយធ្ងន់ធ្ងរបំផុត។ ក្រុមបាតុកររាប់ម៉ឺននាក់ បានប្រមូលផ្តុំគ្នាតវ៉ា ដើម្បីទាមទារឲ្យលោកស្រី យីងឡាក់ ស៊ីណាវ៉ាត្រា ចុះចេញពីតំណែង។ មូលហេតុចម្បងដែលនាំឲ្យមានការតវ៉ា គឺដោយសារដ្ឋាភិបាលថៃ ប្រុង​បង្កើត​ច្បាប់លើកលែងអ្នកទោសនយោបាយ ដែលទំនងជាចង់ឲ្យលោក ថាក់ស៊ីន បងប្រុសរបស់​នាយករដ្ឋមន្រ្តី​បច្ចុប្បន្ន អាចចូលស្រុកវិញបាន។ មូលហេតុនេះ បានរាលដាលរហូតក្លាយជាការតវ៉ា ដើម្បីទម្លាក់លោកស្រីយីងឡាក់ ពីនាយករដ្ឋមន្រ្តី ពោលគឺក្រុមបាតុករ ចង់រំលាយឥទ្ធិពលលោក ថាក់ស៊ីន និងត្រកូលស៊ីណាវ៉ាត្រា ចេញឲ្យបាត់​ពីនយោបាយថៃតែម្តង ឬអាចនិយាយម្យ៉ាងទៀតដើម្បីទុកឲ្យរាជបល្ល័ង្គថៃ ដែលបានថយប្រជាប្រិយភាព អាចនឹង​បន្ដឥទ្ធិពលរបស់ខ្លួនបាន ដោយគ្មានឧបសគ្គ៕

--------------------------------------
ដោយ ជា ធីរិទ្ធ (ទំនាក់ទំនង៖ [email protected]) - ភ្នំពេញថ្ងៃទី ០១ ខែ មីនា ឆ្នាំ២០១៤