ទំព័រហ្វេសប៊ុកល្បីឈ្មោះមួយ ឈ្មោះហៅថា «យុវជនឈានមុខ» ដែលមាននិន្នាការយ៉ាងសកម្ម គាំទ្រគណបក្ស​ប្រជាជន​កម្ពុជា ត្រូវបាន«ចោរ»ដ៏ជំនាញមួយរូប លួចប្ដូរទិន្និន័យអភិបាល (Hack) នៃទំព័រដើម្បីយក​ទៅគ្រប់គ្រង​ជំនួស ហើយ​ថែម​ទាំងបានផ្ញើរសារដោយចេញមុខ ព្រមានម្ចាស់ទំព័រដើមនោះទៀតផង។ ទំព័រហ្វេសប៊ុក ដែល​បាន​ខិតខំកសាង​ភាព​ល្បី​ល្បាញរបស់ខ្លួនពីដំបូងឡើយ ដោយសារតែមានសមាជិកម្នាក់ពីក្នុងទំព័រនោះ តែងតែសូត្រ​ធម៌​ដើម្បីដាក់ផ្សាយ។

ទំព័រហ្វេសប៊ុក «យុវជនឈាមមុខ» នៅក្រោយការប្ដូរទិន្នន័យអភិបាលរួច ក្នុងថ្ងៃទី២២ខែវិច្ឆិកា ឆ្នាំ២០១៣។ (រូបថតផ្ដិតពីអេក្រង់)

បណ្ដាញសង្គមនៅកម្ពុជា - ឈប់ឃើញទៀតហើយ រូបភាពដែលទំព័រ«យុវជនឈានមុខ» តែងតែផ្សាយពី​ភាព​រីកចម្រើន​អស្ចារ្យ មហាលោតផ្លោះនៃការ​ដឹកនាំរបស់នាយករដ្ឋមន្ត្រីចាស់វស្សា លោក ហ៊ុន សែន ជិត៣០ឆ្នាំ​កន្លង​មក។ តែនៅ​ពេល​នេះ គេបែរជាបានឃើញពីរូបភាព នៅក្របខាងមុខ អំពើហិង្សាដែលក្រុមអាជ្ញាធរ បានប្រើប្រាស់​ទៅលើបាតុករ​ថ្ងៃទី១២​ខែ​វិច្ឆិកា និងមានរូបអ្នកស្រី យ៉ោម បុប្ផា សកម្មជនទាមទារសិទ្ធិដីធ្លីនៅបឹងកក់ ជារូបប្រចាំ​គណនីនោះទៅវិញ។

ទំព័រដែលមានអ្នកចូលចិត្តជាង ៣ម៉ឺននាក់ ដោយសារការផ្សាយពាណិជ្ជកម្មនៅលើហ្វេសប៊ុក ធ្លាប់តែបង្ហោះផ្សាយ នូវ​រូប​ភាព វីដេអូ ប្រឆាំងនឹងគណបក្សសង្គ្រោះជាតិនោះ ត្រូវបានជនមិនស្គាល់អត្តសញ្ញាណម្នាក់ឈ្មោះ វីចូរ៉ា គីម (Vichora Kim) ដែលមិនចូលចិត្តគណបក្សប្រជាជនកម្ពុជា លួចប្ដូរទិន្នន័យអភិបាល (Hack) យកមកគ្រប់គ្រង​នៅ​ថ្ងៃទី២១ខែវិច្ឆិកា ឆ្នាំ​២០១៣ វេលាប្រហែលជាថ្ងៃត្រង់ (ម៉ោងនៅកម្ពុជា)។ ម្ចាស់ទំព័រនេះមុន ដែលត្រូវបានគេស្គាល់​ថា ជាបងប្អូនត្រកូល «ម៉ិច» នោះ បាន​តាមអង្វទាមទារការគ្រប់គ្រងទំព័រនេះមកវិញ តែទំនងជា វីចូរ៉ា គីម មិនព្រម​តាមការអង្វនោះឡើយ។

បងប្អូនត្រកូលម៉ិច ដែលត្រូវបានកាត់បន្ថយសិទ្ធិជាអភិបាលទំព័រ បានសរសេរនៅលើទំព័រថា «ហេតុអី្វបានជាមិត្ត​មិនទុក​អោយពួកខ្ញុំបញ្ចេញមតិ តាមតែពួកខ្ញុំមើលឃើញផង? (...) ខ្ញុំមិនដែលជេរត និងប្រមាថអ្នកវិញទេ ពួកខ្ញុំគ្រាន់​តែ​បញ្ចេញ​មតិតាមក្រមសីលធម៏តែប៉ុណ្ណោះ»។ ប៉ុន្តែការអង្វករទាំងនោះ ត្រូវបានអ្នកលេងហ្វេសប៊ុកដទៃទៀត ដែលមិនចូលចិត្តក្រុម​យុវជនឈានមុខទាំងនេះស្រាប់ បញ្ចេញកំហឹងដាក់បន្ថែមទៀត។ ម្នាក់ពីក្នុងចំណោមនោះ បានដាក់វាចាថា «ការបញ្ចេញ​មតិគេមិនដែលហាមទេ។ តែមតិ និងទង្វើដែលធ្វើចេញមក ធ្វើឲ្យមហាជនមិន​ពេញ​ចិត្ត និងមិនគាំទ្រ។»

ប៉ុន្តែទន្ទឹមនឹងនេះ ក៏មានអ្នកនិយាយឲ្យ «ចោរអាំងធើណែត» ប្រគល់ទំព័រនេះត្រឡប់ទៅម្ចាស់ដើមវិញ ដោយអ្នក​ទាំងនោះ​និយាយថា នេះជាអំពើមិនថ្លៃថ្នូ ហើយអ្នកខ្លះទៀត និយាយថា គួរសងទំព័រនេះឲ្យទៅម្ចាស់ដើមវិញ ដើម្បី​នៅពេលបាន​បង្ហោះអ្វីមួយ ទុកគ្រាន់គេតាម«ជេរ»។ល។ ប៉ុន្តែនៅថ្ងៃទី២២ខែវិច្ឆិកានេះ «ចោរអាំងធើណែត» ដែល​ទទួលខ្លួនថាជា​ម្ចាស់​ទំព័រមួយទៀត មាននិន្នាការប្រឆាំងរដ្ឋាភិបាលលោក ហ៊ុន សែន នោះ បានចេញផ្សាយវីដេអូ​មួយ បង្ហាញពីមូលហេតុនៃការ «ហែកទំព័រយុវជនឈានមុខ» ដោយសារតែម្ចាស់ទំព័រមុន​ ត្រូវបានចោទថាធ្វើ​អំពើ​មិនគប្បី ដូចសូត្រធម៌យកសាសនា​មក​បាំង ឬបង្ហោះនូវរឿងមិនពិតប៉ះពាល់ដល់ប្រទេសជាតិនោះជាដើម។ វីដេអូ​នោះ ត្រូវបានទំព័រធំៗផ្សេងទៀត ដែលគាំទ្រ​គណបក្សសង្គ្រោះជាតិ យកទៅបង្ហោះផ្សាយបន្តយ៉ាងព្រោងព្រាត។

នៅក្នុងពេលបច្ចុប្បន្ន ទំព័រហ្វេសប៊ុក ដែលត្រូវបានគេ«ហែក»ឬ«លួចប្ដូរទិន្នន័យអភិបាល»បានសម្រេចនោះ ពិបាក​នឹង​ទារ​ត្រឡប់មកវិញណាស់។ វិធីតែមួយគត់ ដែលម្ចាស់ទំព័ររងគ្រោះអាចធ្វើបានក្នុងពេលនេះ គឺមានតែរាយការណ៍ (Report) ឡើងទៅហ្វេសប៊ុកប៉ុណ្ណោះ។ អ្នកប្រើប្រាស់ហ្វេសប៊ុក និងជាម្ចាស់ទំព័ររងគ្រោះ អាចចូលទៅពិគ្រោះទំព័រ​ជំនួយការ​របស់​ហ្វេសប៊ុក ដោយ​ចុច​នៅ​លើទីនេះ។ ប៉ុន្តែអំពើចូលទៅហែក ឬចូលទៅប្ដូរទិន្នន័យអភិបាល របស់​ទំព័រណាក៏ដោយ មិន​មែនជាអំពើត្រឹមត្រូវនោះទេ ហើយមិនគួរនឹងត្រូវបានលើកទឹកចិត្តនោះឡើយ។ ម្យ៉ាងទៀត គប្បី​យល់ថា «អ្នកមិន​អាច​អួត​អាងថាអ្នកស្រឡាញ់អំពើ​យុត្តិធម៌ នៅពេលដែលអ្នកសាងអំពើអយុត្តិធម៌»នោះ​ឡើយ៕

-------------------------------------------------
ដោយ ឈូករ័ត្ន (ទំនាក់ទំនង [email protected]) - ​ ថ្ងៃទី២២ វិច្ឆិកា ២០១៣