ក្រោយពីបញ្ចប់ជំនួបលើកទីមួយ ត្រូវបានបញ្ចប់ទោះបីជាលទ្ធផល មិនទាន់ទទួលយកបាន ពីភាគីចូលរួមក៏ដោយ ថ្ងៃ​ទី១៧ ខែកញ្ញានេះ ភាគីទាំងពីរសង្ឃឹមថា ជំនួបលើកនេះអាចមានលទ្ធផលជាវិជ្ជមាន ដែលអាចដោះស្រាយ​បញ្ហា​ជាប់​គាំង ផ្នែកនយោបាយក្នុងពេលកន្លងមក។ មួយវិញទៀត រនាំងដាក់ឃាំងផ្លូវមួយចំនួនធំ ក្នុងផ្នែកខាងកើតនៃទីក្រុងភ្នំពេញ ក៏ត្រូវបានដកចេញវិញដែរ ខណៈអ្នកគាំទ្រគណបក្សសង្គ្រោះជាតិទាំងឡានៗ ត្រូវបានដឹកចូលមកកាន់ទីលាន​ប្រជាធិបតេយ្យ។

លោក សម រង្ស៊ី (ខាងឆ្វេង) និងលោក ហ៊ុន សែន ចាប់ដៃគ្នានៅមន្ទីរដ្ឋសភាជាតិ ថ្ងៃទី១៧ខែកញ្ញាឆ្នាំ២០១៣។ (រូបថត MONOROOM.info/ O. Vary)

គេសង្កេតឃើញថា ស្ថានភាពតាមដងផ្លូវសំខាន់ៗ ប៉ែកខាងកើតនៃទីក្រុងភ្នំពេញ មុនម៉ោង៩ព្រឹក បារ៉ាស់ រនាំងបន្លាលួស មួយភាគធំត្រូវបានប្រមួលចេញ នៅសល់តែបន្តិចបន្តួចដែលដាក់គរនៅលើជញ្ចើមផ្លូវ ដែលខុសប្លែកពីថ្ងៃទី១៦ ខែកញ្ញា និងខុសពីថ្ងៃទី១៥ ខែកញ្ញា ដែលផ្លូវមួយភាគបីប៉ែកខាងកើត នៃទីក្រុងភ្នំពេញត្រូវបានបិទស្ទើរតែទាំងស្រុង។

ចំណែកឯក្រុមបាតុករ ដែលគាំទ្រគណបក្សសង្គ្រោះជាតិ បានដឹកចូលតាមឡានរាប់សិបគ្រឿង តាមបណ្តោយផ្លូវ ដែល​ធ្លាប់បានបិទកន្លងមក ដូចជាផ្លូវសុធារស ផ្លូវនរោត្តមជាដើម ដោយធ្វើដំណើរឆ្ពោះទៅកាន់ទីលានប្រជាធិបតេយ្យ ដោយ​ស្រែកហ៊ោកញ្រៀវតាមដងផ្លូវ «ជយោគណបក្សសង្គ្រោះជាតិ។ ដូរ ដូរ ដូរ ...។» ជាមួយគ្នានេះ ក៏មានការជួយសម្រួល​បើកផ្លូវពីក្រុមកងកម្លាំងផងដែរ។ តែទោះជាយ៉ាងនេះក្តី ក្រងម្លាំងប្រដាប់អាវុធទាំងនោះ នៅតែធ្វើការចល័តជាច្រើន​តាម​ដងផ្លួវសំខាន់ៗ ពិសេសតាមផ្លូវមុខផ្ទះលោក ហ៊ុន សែន។

នៅឯទីលានឯណោះវិញ ក្រុមបាតុករមានចំនួនច្រើនជាងរាប់សិបម៉ឺននាក់ ដែលអ្នកខ្លះកំពុងតែធ្វើដំណើរជាបណ្តើរៗ តាម​រថយន្តពីតាមបណ្តាខេត្តឆ្ពោះមកកាន់ទីក្រុងភ្នំពេញ ដោយមិនមានការរារាំង ឬហាមឃាត់ពីអាជ្ញាធរនោះទេ។ មកទល់នឹង​ម៉ោង១០ ព្រឹកនេះនេះតាមលោក រស់ សួរ សកម្មជននៃគណបក្សសង្គ្រោះជាតិ បាននិយាយថា ប្រជាពលរដ្ឋកំពុងតែ​បន្តរ​ចូលមកជាបណ្តើរៗ ដែលចំនួនអាចកើនឡើង ស្មើនឹងថ្ងៃទីមួយ(ថ្ងៃទី១៥ ខែកញ្ញា) មិនតិចជាង១០ម៉ឺននាក់នោះទេ។

នៅឯជំនួបប្រជុំពិភាគ្សាថ្នាក់កំពូល នៃគណបក្សទាំងពីរនៅមន្ទីររដ្ឋសភាវិញ ឃើញមានសមាសភាពនៃ​អ្នកចូលរួមនៅ​រក្សាដដែល មិនមានការផ្លាស់ប្តូរអ្វីនោះទេ។ មុនជំនួបប្រជុំនេះ ខាងគណបក្សសង្គ្រោះជាតិ ដែលមានលោក សម រង្ស៊ី និង​លោក កឹម សុខា បាននិយាយប្រាប់អ្នកសារព័តមានថា របៀបវារៈថ្ងៃនេះមិនទាន់អាចបង្ហាញបាននោះទេ។ លោក​បាន​បញ្ជាក់បន្ថែមថា ទោះបីជាមានការសម្របសម្រួលយ៉ាងណាក៏ដោយ បើមិនមានយន្តរការណាមួយ ដើម្បីបង្កើតឲ្យមាន​គណកម្មការ​ពិសេស ក្នុងការស្វែងរកយុត្តិធម៌សម្រាប់ប្រជាពលរដ្ឋទេ គណបក្សសង្គ្រោះជាតិនៅតែប្រកាន់ជំហរ ធ្វើ​ពហិការមិនចូលរួមប្រជុំសភានៅថ្ងៃទី២៣ ខែកញ្ញា នោះដដែល។

រីឯខាងគណបក្សប្រជាជនលោក ហ៊ុន សែន បានបញ្ជាក់ថាកិច្ចពិភាក្សាថ្ងៃនេះ អាចនឹងមានរយៈពេលយូរ​ជាង​ថ្ងៃម្សិល​ម៉ិញ (ថ្ងៃទី១៦ ខែកញ្ញា) ប្រសិនបើកិច្ចពិភាក្សានេះ នៅតែមានភាពតានតឹង ដោយស្វែងរកភាពចុះសម្រុងគ្នា​មិនឃើញ​នោះ មកដល់ត្រឹមនេះអ្នកការសែត ត្រូវបានគេបណ្តេញចេញឲ្យមកនៅក្រៅបន្ទប់ ហើយកិច្ចពិភាក្សាក៏បានចាប់ផ្តើម។

អ្នកសារព័ត៌មានជាតិ និងអន្តរជាតិ ជាងមួយរយនាក់មានវត្តមាននៅទីនោះ។ ដោយសារតែវត្តមាននៃអ្នកសារព័ត៌មាន​ច្រើន និងបន្ទប់នៃកិច្ចពិភាគ្សាតូចចង្អៀត ដូច្នេះអ្នកវិទ្យុ និងអ្នកការសែតមិនត្រូវបានអនុញ្ញាតិឲ្យចូលនោះទេ ពិសេសអ្នក​ដែលថតរូបតាមទូរស័ព្ទ និងកាន់កាមេរាតូចៗ។

អ្នកតាមប្រម៉ាញ់ព័ត៌មាន កំពុងតែនៅអង្គុយត្រៀបត្រា ដោយរងចាំទទួលយកព័ត៌មានមិនហ៊ាន ទាំងចេញទៅណានោះទេ ព្រោះតែគេមិនអាចសន្និដ្ឋាន ពីស្ថានការនានាជុំវិញនៃកិច្ចប្រជុំនេះថា នឹងមានរយៈពេលប៉ុណ្ណា ខុសគ្នា ឬត្រូវគ្នានោះទេ។ ឯខាងទួរទស្សន៍ បាននាំគ្នាចាប់កន្លែងដើម្បីត្រៀបថត ពីសន្និសិទកាសែតក្រោយពីបញ្ចប់ជំនួប។ តែទោះជាយ៉ាង​នេះក៏​ដោយ អ្នកសារព័ត៌មានទាំងអស់ នៅតែរង់ចាំទាំងអត់បាយក្រហាយទឹក ព្រោះតែចង់ទទួលបាននូវព័ត៌មានមួយដែលល្អ និងកម្រមានអស់រយៈពេលជាច្រើនឆ្នាំមកនេះ៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី១៧ កញ្ញា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ