ភ្នំពេញ៖ វាមិនទាន់ដល់ពេល ដែលត្រូវសម្ដែងមតិតាមរយៈបាតុកម្មនោះនៅឡើយ តែប្រសិនជាឈានទៅដល់​ដំណាក់​កាល​នោះ វាជាបាតុកម្មដែលផុសចេញ ពលរដ្ឋម្ចាស់ឆ្នោត។ នេះជាការអះអាងរបស់ អនុប្រធានគណបក្សសង្គ្រោះជាតិ លោក កឹម សុខា ខណៈពេលការព្រមានរៀបចំធ្វើមហាបាតុកម្មដោយអហិង្សា របស់គណបក្សប្រឆាំងមួយនេះ ស្ថិតនៅ​តែជាមន្ទិលសង្ស័យនៅឡើយ។

លោក កឹម សុខា (អាវស) ក្នុងពេលថ្លែងទៅកាន់អ្នកគាំទ្រ ថ្ងៃទី១៥ខែសីហាឆ្នាំ២០១៣ នៅទីស្នាក់ការទួលគោក។ (រូបថត MONOROOM.info/ O.Vary)

ក្នុងវេទិការសាធារណៈ ស្វែងរកយុត្តិធម៌ដល់ប្រជាពលរដ្ឋរងគ្រោះ ទាក់ទិនទៅនឹងការបោះឆ្នោតជ្រើសតាំងតំណាងរាស្រ្ត នីតិកាលទីប្រាំកន្លងទៅនេះ ក្នុងទីស្នាក់ការគណបក្សសាខាទួលគោក ថ្ងៃទី១៥ខែសីហានេះ អនុប្រធានគណបក្ស​សង្គ្រោះ​ជាតិ លោក កឹម សុខា បានលើកឡើងពីការធ្វើមហាបាតុកម្ម ថាមិនទាន់ដល់ពេលវេលានោះទេ ព្រោះបច្ចុប្បន្នរាល់​ការ​ដោះស្រាយទាំងអស់ កំពុងស្ថិតនៅក្នុងចន្លោះច្បាប់ និងនីតិវិធីដែលត្រូវដោះស្រាយជាបន្តរបន្ទាប់។ លោកបន្ថែមថា ជា​មួយគ្នានេះដែរ គណបក្សសង្គ្រោះជាតិ គណបក្សប្រជាជនកម្ពុជា និង គ.ជ.ប នៅកំពុងតែស្វែងរកបន្តរនូវ​ដំណោះស្រាយ​ដ៏សមស្រប ដោយសន្តិវិធីមួយ។

ក្នុងឱកាសនោះដែរ លោកបានពន្យល់ថា បញ្ហាធ្វើបាតុកម្មអហិង្សានេះ មិនមែនរូបលោក និងគណបក្សសង្គ្រោះជាតិ ជា​អ្នកផ្តួចផ្តើមនោះទេ តែវាជាគំនិតដែលផុសចេញពីប្រជាពលរដ្ឋជាម្ចាស់ឆ្នោត តែរូបលោក និងគណបក្សសង្គ្រោះជាតិ នឹង​នៅពីមុខបាតុករ នៃបាតុកម្មដោយអហិង្សានេះ។

ស្របពេលជាមួយគ្នានេះ តាមសេចក្តីជូនដំណឹងរបស់គណបក្សសង្គ្រោះជាតិ សម្រាប់ប្រជាពលរដ្ឋក្រៅប្រទេស ដែល​គាំទ្រគណបក្សសង្គ្រោះជាតិនោះ បានរៀបចំគម្រោងធ្វើបាតុកម្មអហិង្សា នៅពីរកន្លែងទីទៃពីគ្នានាពេលខាងមុខនេះ។ បាតុកម្មអហិង្សាទីមួយនាថ្ងៃទី១៩ ខែសីហា ស្ថិតនៅមុខទីស្នាក់ការកណ្តាលអង្គការសហប្រជាជាតិ នាទីក្រុងញូវយ៉ក សហរដ្ឋអាមេរិក និងបាតុកម្មអហិង្សាទីពីរនាថ្ងៃទី២៦ ខែសីហា នៅមុខវិមានអង្គការសហប្រជាជាតិក្នុងទីក្រុងហ្ស៊ឺណែវ ប្រទេសស្វ៊ីស។

សូមបញ្ជាក់ថា បាតុកម្មអហឹង្សា ជាសិទ្ធិនៃការជួបជុំរបស់ប្រជាពលរដ្ឋ ដែលមានចែង និងការពារដោយេដ្ឋធម្មនុញ្ញ ដែល​ជាច្បាប់កំពូលរបស់កម្ពុជា។ ពលរដ្ឋគ្រប់និន្នាការនយោបាយទាំងអស់ អាចធ្វើបាតុកម្មដោយអហិង្សាបាន ហើយមិនត្រូវ​បានក្រុមណាមួយ ឬបក្សណាមួយរារាំង ទប់ស្កាត់ មកបំភិតបំភ័យនោះបានឡើយ។ ផ្ទុយទៅវិញ អាជ្ញាធរមានសមត្ថកិច្ច ត្រូវមានភារកិច្ចជួយសម្រួល ឲ្យការជួបជុំបញ្ចេញមតិនេះ បានប្រព្រឹត្តិទៅដោយគ្មានការប្រទាំងប្រទើស។

តាំងពីថ្ងៃបោះឆ្នោត ថ្ងៃទី២៨ខែកក្កដាមក បញ្ហាធ្វើបាតុកម្មអហិង្សាមួយនេះ បានក្លាយជាប្រធានបទមួយយ៉ាង​ក្ដៅគគុក​មួយ រហូតដល់មានការចល័តកងទ័ព និងសម្ភារៈសិកធុនធ្ងន់ ចូលមកកាន់រាជធានី យ៉ាងសន្ធឹកសន្ទាប់នោះផង។ បញ្ហាដ៏​រសើបនេះ ក៏បានធ្វើឲ្យបណ្តាអ្នកតាមដានស្ថានការណ៍នយោបាយ ក្នុងប្រទេសកម្ពុជា លើកយកមកធ្វើជាចំណោទ ក្នុង​ការសួរឆ្លើយយ៉ាងរស់រវើក នៅក្នុងប្រព័ន្ធផ្សព្វផ្សាយសង្គមហ្វេសប៊ុក (facebook) នោះដែរ។

អ្នកតាមដានស្ថានការណ៍ មួយភាគដែលផ្អៀងទៅរកគណបក្សប្រឆាំង និងមិនចូលចិត្តការដឹកនាំរបស់លោក ហ៊ុន សែន នាយករដ្ឋមន្រ្តីចាំផ្ទះ ដែលបានកាន់អំណាចតាំងពី២៨ឆ្នាំមកហើយនោះ បាននិយាយថា ពួកគេបានត្រៀមខ្លួនរួចជាស្រេច ក្នុងការចូលរួមនៅក្នុងបាតុកម្មនេះ។ មួយចំនួនទៀត បាននិយាយថា ចង់ឲ្យមានការដោះស្រាយដោយសន្តិភាព និង​សន្តិវិធី ជាសវាងការធ្វើបាតុកម្មនេះ ដែលអាចនាំមកវិញ នូវការបែកបាក់ និងការកាប់សម្លាប់ជាតិសាសន៍ខ្លួនឯង។ ផ្ទុយ​ទៅវិញ ក្រុមដែលស្និតនឹងគណបក្សប្រជាជានកម្ពុជាវិញ បានស្វែងរកគ្រប់វិធី និងហេតុផលគ្រប់បែបយ៉ាង ដើម្បីបញ្ជៀស​កុំឲ្យមានមហាបាតុកម្មនេះកើតឡើង។

នៅក្នុងព្រឹត្តិការណ៍ចុងក្រោយបំផុត ក្នុងថ្ងៃទី១៥ខែសីហានេះដដែល មន្ត្រីជាន់ខ្ពស់របស់គណបក្សប្រជាជនកម្ពុជា លោក​ជៀម យៀប បានសរសេរលិខិតមួយ បដិសេធសំណើរតាមលិខិតរបស់លោក សុន ឆៃ មន្ត្រីការងាររបស់គណបក្ស​សង្គ្រោះជាតិ  ដែលចង់ឲ្យមានការជួបគ្នា រវាងក្រុមការងារទាំងពីរគណបក្សជាបន្តទៅទៀត។ លិខិតលោកជៀម យៀប បានបញ្ជាក់ថា គណបក្សប្រជាជន សម្រេចយក​គណៈកម្មាធិការ​​ជាតិ​រៀបចំ​ការបោះឆ្នោត (​គ​.​ជ​.​ប​) ជា​អាជ្ញាកណ្តាល និង​ជា​អ្នកសម្រេច ហើយថាការជួបគ្នារវាងគណបក្សទាំងពីរ ដែលគ្មានការចូលរួមពី គ.ជ.ប ក៏គ្មានលទ្ធផលល្អដែរ។ ការឆ្លើយ​ឆ្លងគ្នានេះ បានធ្វើឲ្យគេមើលឃើញ ពីដំណើរឈានទៅបង្កើតគណកម្មាការចម្រុះឯករាជ្យនោះ ទំនងត្រូវបានជាជាប់គាំង ហើយដំណោះស្រាយដែលនឹងបញ្ជៀសការធ្វើមហាបាតុកម្ម កាន់តែរួមតូចចង្អៀតឡើង៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី១៥ សីហា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ