ខ្សែប្រយុទ្ធ ហ្គារី ហូផឺ (Gary Hooper) រកគ្រាប់បាល់បាន ២គ្រាប់ ជួយឲ្យក្រុមស្សែលទិក (Celtic) យកឈ្នះ ៤-១ ទៅលើ​ក្រុម អ៊ីនវើណែស ស៊ីធី (Gary Hooper) និងក្លាយជាម្ចាស់ជើងឯក ស្កុតធីសព្រីមែលីក (Scottish Premier League) កាល​ពីថ្ងៃអាទិត្យកន្លងទៅ។

ក្រុមស្សែលទិក ដែលទទួលបានជ័យជំនះ នៅក្នុងពានរង្វាន់ស្កុតធីសព្រឺមែលីក។

ជ័យជំនះមួយនេះ បានធ្វើឲ្យក្រុមដែលមានមូលដ្ឋាននៅក្នុងទីក្រុងក្លាសកូវ (Glasgow) ទទួលបានពានរង្វាន់របស់ខ្លួន ទោះ​បីជាសល់ការប្រកួតចំនួន ៤លើកទៀតក៏ដោយ។ ហើយក្រុមស្សែលទិក នឹងត្រូវប្រកួតផ្តាច់ព្រ័ត្រពានរង្វាន់ ស្គតធីសខាប់ (Scottish Cup) ជាមួយនឹងក្រុម ហៃបឺនៀន (Hibernian) នៅចុងខែឧសភាផងដែរ។

ក្រុមមួយនេះ បានទទួលពានលើកទី៤៤ របស់ខ្លួន និងមានភាពងាយស្រួលជាងឆ្នាំមុន ខណៈដែលគូប្រជែងចាស់ ក្រុម​រ៉ែងចឺ (Rangers) ត្រូវបានសហព័ន្ធបាល់ទាត់ប្រទេសស្គតឡែន ដាក់ពិន័យឲ្យទៅលេងនៅលីកលំដាប់ទី៣ ដោយសារតែ​ជួបវិបត្តិហិរញ្ញវត្ថុ។

ស្សែលទិក មាន ៧២ពិន្ទុ ក្នុងការប្រកួត ៣៤លើក ហើយពួកគេមាន ១៥ពិន្ទុនាំមុខក្រុមលេខ២ ម៉ាដឺវែល (Motherwell)។ ជាមួយនឹងជ័យជំនះ និងជាម្ចាស់ជើងឯក ស្គតធីសព្រីមែលីកនេះ ពួកគេនឹងទទួលបានសិទ្ធ ចូលលេងក្នុងក្របខ័ណ្ឌ​ឆែមពានលីក (Champions League) នៅរដូវកាលក្រោយ។

កីឡាករអង់គ្លេស ហ្គារី ហូផឺ បានរកគ្រាប់បាល់ទី១ បានសម្រេចនៅនាទី ទី៦១ និងគ្រាប់បាល់ទី២ រកបានដោយកីឡាករ ខ្សែបម្រើកណ្តាល លីដឡេ (Ledley) នៅនាទី ទី៦៦ ខណៈដែល ហ្គារី ហូផឺ បានបន្ថែម១គ្រាប់ទៀត នៅនាទី ទី៧៣។ ខ្សែ​ប្រយុទ្ធអន្តរជាតិក្រិក សាម៉ារ៉ាស (Samaras) បានទាត់បាល់បញ្ចូលទីបានសម្រេច១គ្រាប់ទៀត នៅនាទី ទី៨៨ បន្ទាប់ពី​កីឡាករខ្សែបម្រើ អារុន ដូរែន (Aaron Doran) តាមបាន១គ្រាប់មកវិញ នៅម៉ោងបង្គ្រប់បន្ថែម។

គ្រូបង្វឹកក្រុមស្សែលទិក លោក ណេល ឡេណិន (Neil Lennon) បាននិយាយថា «អ្វីដែលយើងទទួលបានឆ្នាំនេះ បាន​បង្ហាញឲ្យយើងឃើញថា យើងអាចប្រកួតប្រជែងក្នុងកំរិតមួយ ដែលល្អបំផុត ហើយក្រុមរបស់យើងនៅតែគ្របដណ្តប់ ដោយការនាំមុខគូប្រជែងជាច្រើនពិន្ទុ។ នេះជាអ្វីៗ ដែលយើងតែងតែចង់បានជារៀងរាល់ឆ្នាំ។»

គ្រូបង្វឹករូបនេះ បានបន្ថែមថា «យើងក៏នៅមានចំណុចមួយចំនួនទៀត ដែលនៅមានភាពទន់ខ្សោយ ហើយយើងក៏កំពុង​តែព្យាយាម ស្វែងយល់ពីកីឡាករនីមួយៗ និងធ្វើយ៉ាងណាឲ្យមានភាពប្រសើរឡើងគ្រប់តំបន់ទាំងអស់»៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២២ ខែមេសា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ