ជំនួបតំណាងកម្មករ និងអគ្គិសនីកម្ពុជា រំពឹងជួយកម្មករបន្ថែម
ទោះបីជាតំណាងសហជីពកម្មករទាំងអស់ សាទរជាមួយនឹងគម្រោង ក៏ដូចជាអនុសាសន៍របស់ប្រមុខរដ្ឋាភិបាលក្នុងការបញ្ចុះតម្លៃភ្លើងសម្រាប់កម្មករក៏ដោយ ក៏នៅមានបញ្ហាខ្លះដែលត្រូវដោះស្រាយ ដូចជាករណីប្រាក់កក់កម្មករ និងករណីម្ចាស់ផ្ទះជួលជាដើម។ ទាំងនេះជាចំណុចសំខាន់ដែលត្រូវលើកយកមកជជែកពិភាក្សាគ្នា នៅក្នុងជំនួបកាលពីថ្ងៃទី១៥ ខែមករា ឆ្នាំ២០១៥នេះ រវាងអគ្គនាយកអគ្គិសនីកម្ពុជា លោក កែវ រតនៈ និងតំណាងសហជីពកម្មករចំនួន៦រូប ដើម្បីស្វែងរកដំណោះស្រាយ និងយកមកអនុវត្តឲ្យបានសម្រេប ក្នុងពេលឆាប់ៗនេះ។
លោក ហ្វា សាលី ប្រធានសហព័ន្ធសហជីពជាតិ ដែលជាភាគីមួយ នៅក្នុងជំនួបនោះ បានថ្លែងឲ្យដឹងនៅព្រឹកថ្ងៃទី១៦ ខែមករានេះថា អគ្គនាយកអគ្គិសនីកម្ពុជា បានផ្តល់ដំណោះស្រាយ និងភាពងាយស្រួលបន្ថែមទៀតដល់កម្មករ [...]