ប្រធានបក្សអំណាចខ្មែរ ប្ដឹងអតីតប្រធានបក្ស ពីបទបរិហារកេរ្តិ៍
បណ្ដឹងពីបទបរិហារកេរ្តិ៍ ត្រូវបានប្រធានបច្ចុប្បន្ន នៃគណបក្សអំណាចខ្មែរ ដាក់ឡើងទៅស្ថាប័នអយ្យការអម សាលាដំបូងរាជធានីភ្នំពេញ ប្ដឹងអតីតប្រធាន នៃគណបក្សនេះ។ លោក សួង សុភ័ណ្ឌ ជាប្រធានគណបក្ស បានដាក់ពាក្យបណ្ដឹងនេះ នៅព្រឹកថ្ងៃទី១៤ ខែកញ្ញា ឆ្នាំ២០១៨នេះ ប្តឹងលោក សួន សេរីរដ្ឋា បន្ទាប់ពីអតីតប្រធានគណបក្សរូបនេះ បានចោទប្រធានបច្ចុប្បន្ន ថាជាអ្នកក្លែងបន្លំលិខិតលាលែង ពីប្រធានគណបក្សរបស់លោក (សួន សេរីរដ្ឋា) នៅក្នុងសន្និសីទសារព័ត៌មាន កាលពីថ្ងៃម្សិលមិញ។
លោក សួង សុភ័ណ្ឌ បានអះអាងថា ការដាក់បណ្ដឹងនេះ ធ្វើឡើងដោយបង្ខំចិត្ត។ លោកបានលើកយកមាត្រា ៣០៥ នៃក្រមព្រហ្មទណ្ឌកម្ពុជា មកបញ្ជាក់ថា៖ «គ្រប់ការអះអាងបំផ្លេីស ឬ ការទំលាក់កំហុសដោយអសុទ្ធចិត្តលេីអំពេីណាមួយ ដែលនាំអោយប៉ះពាល់ដល់កិត្តិយស ឬ កិត្តិស័ព្ទនៃបុគ្គល ឬ នៃស្ថាប័ន គឺជាការបរិហារកេរ្តិ៍»។
កាលពីព្រឹកថ្ងៃទី១៣ ខែកញ្ញា ឆ្នាំ២០១៨ ម្សិលមិញ លោក សួន [...]
