ហ៊ីង ប៊ុនហៀង ប្រតិកម្មតបអាមេរិកខ្លាំងៗ... ថានឹងប្ដេជ្ញាការពារ ហ៊ុន សែន និងគ្រួសារ
បើរដ្ឋាភិបាលសហរដ្ឋអាមេរិក ដាក់លោក ហ៊ីង ប៊ុនហៀង ចូលក្នុងបញ្ជីខ្មៅ នៃការបង្កកទ្រព្យសម្បត្តិ និងការហាមជាន់ទឹកដីអាមេរិនោះ ក៏ព្រោះតែប្រទេសមហាអំណាច បានរកឃើញថា លោកមេបញ្ជាការ កងអង្គរក្សនាយករដ្ឋមន្ត្រីរូបនេះ មានជាប់ពាក់ព័ន្ធដោយផ្ទាល់ និងនៅពីក្រោយ នៃការរំលោភសិទ្ធិមនុស្សដ៏ធ្ងន់ធ្ងរ និងការបង្ក្រាបនានា ដែលធ្វើឲ្យមានស្លាប់ និងរបួសជាច្រើន។
ផ្ទុយទៅវិញ នៅក្នុងប្រតិកម្មដោយផ្ទាល់ របស់លោក ទៅនឹងទណ្ឌកម្មខាងលើ លោក ហ៊ីង ប៊ុនហៀង ដែលជាមនុស្សជំនិត របស់លោក ហ៊ុន សែន បានថ្លែង ទៅកាន់សហរដ្ឋអាមេរិកថា លោកត្រៀមខ្លួនជានិច្ច ដើម្បី«វាយបកទៅលើជនអាមេរិកណា ដែលមិនគោរពនូវអធិបតេយ្យភាព នៃប្រទេសឯករាជ្យមួយ ព្រមទាំងមានមហិច្ឆតាឈ្លានពាន» មកលើប្រទេសកម្ពុជា ហើយដែលថែមទាំងបាន«គាំទ្រ និងញុះញង់ពួកក្បត់ជាតិ» ដែលមានក្នុងប្រទេសកម្ពុជា។
[...]
