សហគមន៍ប្រមេ គ្រោងចាប់អ្នកបើកឡានដែលឈូសឆាយដីពួកគាត់ទុកដោះស្រាយ
- ដោយ: ក. វិច្ចនី អត្ថបទ និងយកការណ៍៖ ក. វិច្ចនី ([email protected]) - ភ្នំពេញ ថ្ងៃទី ៣០ ធ្នូ ២០១៤
- កែប្រែចុងក្រោយ: December 31, 2014
- ប្រធានបទ: ដីធ្លី
- អត្ថបទ: មានបញ្ហា?
- មតិ-យោបល់
-
ដោយអស់សង្ឃឹម ក្នុងទាមទារយកដីធ្លីរបស់ខ្លួនពីក្រុបហ៊ុន ឡាន ហ្វេង និងក្រុមហ៊ុន រ៉ូយហ្វេង និងមិនមានការយកចិត្តទុកដាក់ពីរដ្ឋាភិបាល និងអង្គការសង្គមស៊ីវិលមួយចំនួន ដែលមិនអើពើជួយដោះស្រាយវិបត្តិដីធ្លីឲ្យពួកគាត់នោះ ប្រជាសហគមន៍ប្រមេ នៅឃុំប្រមេ ស្រុកត្បែងមានជ័យ ខេត្តព្រះវិហារ បានឈានចូលដល់របត់ថ្មីមួយ៖ «នឹងទៅយាមចាំដីរបស់ខ្លួន ដើម្បីរារាំងមិនគេឈូសឆាយយក ជាពិសេសរារាំងមិនឲ្យឡានឈូសឆាយដី ចូលទៅធ្វើសកម្មភាពរបស់ពួកគេ»។
នៅក្នុងពេលនេះ ពលរដ្ឋដែលជាម្ចាស់ដីកំពុងមានជម្លោះទាំងនោះ ម្នាក់ៗត្រូវចំណាយពេលវេលាទៅយាមដីរបស់ខ្លួនជារៀងរាល់ថ្ងៃ ព្រោះខ្លាចគេយកដីរបស់ពួកគាត់ធ្វើជាកម្មសិទ្ធិ។ តំណាងប្រជាសហគមន៍ប្រមេមួយរូប អ្នកស្រី ពឿន ជឿន បានលើកឡើងថា ពួកគាត់អស់វិធីនឹងដោះស្រាយជំលោះនេះហើយ ព្រោះធ្លាប់បានដាក់លិខិតទៅរដ្ឋសភាចំនួនពីរបីដងដែរ ដើម្បីឲ្យជួយដោះស្រាយ ប៉ុន្តែមិនមានឃើញមកជួយធ្វើអន្តរាគមន៍សោះ។ អ្នកស្រីបានបន្ថែមថា បើគ្មានដំណោះស្រាយដូច្នេះ មានតែមកចាំយាមដីរាល់ថ្ងៃ ហើយចាំចាប់អ្នកបើករថយន្ដដែលមកឈូសឆាយនោះទុក ដើម្បីឲ្យក្រុមហ៊ុនមកដោះស្រាយបញ្ហាឲ្យបានឆាប់។
សកម្មភាពថ្មីរបស់ក្រុមប្រជាសហគមន៍ បានបណ្ដាលឲ្យអាជ្ញាធរខេត្តស្រុក និងមន្ទីរដែនដី ដឹកនាំកម្លាំងចម្រុះ និងប្រដាប់ដោយអាវុធ មកធ្វើការបង្រ្កាបពលរដ្ឋទាំងនោះ កាលពីថ្ងៃទី២៩ ខែធ្នូ កាលពីល្ងាចម្សិលម៉ិញនេះ ប៉ុន្តែមិនបានបង្ករឲ្យមានរបួសស្នាមអ្វីនោះទេ។
បើតាមសម្តីរបស់អ្នកស្រី ពឿន ជឿន ដដែល បានថ្លែងប្រាប់ទស្សនាវដ្តីមនោរម្យ.អាំងហ្វូទៀតថា កាលពីល្ងាចម៉ិញនេះក្រុមសហគមន៍ប្រមេជាង ៩០ នាក់បានតវ៉ាយ៉ាងខ្លាំង ជាមួយក្រុមហ៊ុនឡានហ្វេង និងរ៉ូយហ្វេង យ៉ាងតឹងសសៃករ ហើយពួកគេបានប្តេជ្ញាចិត្ត ស៊ូស្លាប់ អត់បាយក្រហាយទឹក ធ្វើការទាមទារជាមួយក្រុមអាជ្ញាធរ និងតំណាងក្រុមហ៊ុន ប៉ុន្តែបញ្ហានៅតែមិនអាចដោះស្រាយបាន។ លុះដល់នៅព្រឹកថ្ងៃទី ៣០ ខែធ្នូនេះ ក្រុមប្រជាសហគមន៍បានទៅរងចាំនៅតំបន់ដី ដែលមានជំលោះនោះម្តងទៀត ប៉ុន្តែអ្នកតំណាងក្រុមហ៊ុន និងអាជ្ញាធរមិនបានមកជួបជាមួយប្រជាពលរដ្ឋដើម្បីដោះស្រាយបញ្ហាឡើយ ហើយប្រជាពលរដ្ឋបាននាំយកឡានឈូសឆាយដីមួយគ្រឿង និងអ្នកបើកឡានម្នាក់ ទៅដាក់នៅសាលាឃុំប្រមេហើយ កាលពីម៉ោង ១២:០០ ថ្ងៃត្រង់នេះ។
ទស្សនាវដ្ដីមនោរម្យ.អាំងហ្វូ មិនអាចទាក់ទងខាងអាជ្ញាធរឃុំប្រមេ ស្រុកត្បែងមានជ័យ ខេត្តព្រះវិហារ និងក្រុមហ៊ុនទាំងពីរបានទេ ដើម្បីសុំការបកស្រាយបានទេ នៅពេលនេះ។
ដីដែលក្រុងហ៊ុន ឡាន ហ្វេង និងក្រុមហ៊ុន រ៉ូយ ហ្វេង កំពុងរំលោភយកនេះ បានប៉ះពាល់ដល់ប្រជាពលរដ្ឋជាងបីភូមិ តាំងពីឆ្នាំ ២០១២មក។ ដីធ្លីទាំងនោះ សុទ្ធសឹងតែជាដីធ្វើស្រែចំការ និងដីព្រៃអាស្រ័យផល សំរាប់ប្រជាសហគមន៍ទាំងនោះ ក្នុងការរកឃ្មុំ រកជ័រ កាច់វ័ល្ល លក់ដើម្បីរកប្រាក់មកផ្គត់ផ្គង់ជីវភាព៕