ក្រុម​ស​ហព័ន្ធ​និស្សិត​បញ្ញវន្ត​កម្ពុជា៖ ទោះ​មាន​ការ​ចាប់​ខ្លួន ក៏​មិន​រាថយ

បើទោះបីជាមានការចាប់ខ្លួន បេក្ខជនតំណាងរាស្រ្តជាប់ឆ្នោត គណបក្សប្រឆាំងជាបន្តបន្ទាប់ ក្រោយព្រឹត្តិការណ៍​ប៉ះ​ទង្គិចគ្នា​ កាលពីថ្ងៃទី១៥ ខែកក្កដា ឆ្នាំ២០១៤កន្លងមកនោះក៏ដោយ តំណាងសហព័ន្ធនិស្សិតបញ្ញវន្តកម្ពុជា នៅតែ​ប្រកាន់ជំហរ ធ្វើការដង្ហែរក្បួនដាក់ញ្ញាតិ នៅតាមបណ្តាស្ថានទូតនានា ក្នុងប្រទេសកម្ពុជាដដែល ជុំវិញករណីទឹកដីខ្មែរកម្ពុជាក្រោម។
Loading...
  • ដោយ: អ៊ុម វ៉ារី ដោយ អ៊ុម វ៉ារី (ទាក់ទង៖ [email protected]) - ភ្នំពេញថ្ងៃទី២១ កក្កដា ២០១៤
  • កែប្រែចុងក្រោយ: July 21, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

បើទោះបីជាមានការចាប់ខ្លួន បេក្ខជនតំណាងរាស្រ្តជាប់ឆ្នោត គណបក្សប្រឆាំងជាបន្តបន្ទាប់ ក្រោយព្រឹត្តិការណ៍​ប៉ះ​ទង្គិចគ្នា​ កាលពីថ្ងៃទី១៥ ខែកក្កដា ឆ្នាំ២០១៤កន្លងមកនោះក៏ដោយ តំណាងសហព័ន្ធនិស្សិតបញ្ញវន្តកម្ពុជា នៅតែ​ប្រកាន់ជំហរ ធ្វើការដង្ហែរក្បួនដាក់ញ្ញាតិ នៅតាមបណ្តាស្ថានទូតនានា ក្នុងប្រទេសកម្ពុជាដដែល ជុំវិញករណីទឹកដី​ខ្មែរកម្ពុជាក្រោម។


សន្និសីទសារព័ត៌មាន របស់ក្រុមសម្ព័ន្ធយុវជន។ (រូបថត MONOROOM.info/ C. Nita)

សេរីភាពសម្តែងមតិ - ក្រុមសហព័ន្ធនិស្សិតបញ្ញវន្តកម្ពុជា និងព្រះសង្ឃខ្មែរកម្ពុជាក្រោម បានបញ្ជាក់ជំហរថា នឹង​មិន​រាថយឡើយ ទោះបីជាមានការបង្ក្រាបពីក្រុមសន្រិសុខ ឬក្រុមសមត្ថកិច្ច ក្នុងដំណាក់កាលនៃការហែរញត្តិ ឬត្រូវ​បាន​អាជ្ញាធរចាប់ដាក់ពន្ធនាគារក៏ដោយ។ លោក ម៉ៅ ពិសេស បានបញ្ជាក់បន្ទាប់ពីបញ្ចប់ជំនួបប្រជុំ​ ជាមួយសាលា​រាជធានីភ្នំពេញ និងស្របពេលដែលលេចលឺព័ត៌មានថា សាលារាជធានីភ្នំពេញ គ្រោងប្ដឹងក្រុមបាតុករទៅ​តុលាការ​ដើម្បីផ្ដន្ទាទោស ប្រសិនបើសហព័ន្ធនិស្សិតបញ្ញវន្តកម្ពុជា និងព្រះសង្ឃខ្មែរកម្ពុជាក្រោម នៅតែចចេសហែរក្បួន ជា​ពិសេស មានការជួបជុំប្រមូលផ្តុំតវ៉ា នៅមុខស្ថានទូតវៀតណាមប្រចាំកម្ពុជា និងក្នុងករណីធ្វើឲ្យប៉ះពាល់​ដល់​សណ្ដាប់​ធ្នាប់សាធារណៈនោះ។

ក្នុងការដង្ហែញត្តិនាព្រឹកថ្ងៃទី២១ ខែកក្កដា ឆ្នាំ២០១៤នេះ នឹងធ្វើទៅកាន់ស្ថានទូត នៃប្រទេសមហាអំណាចប្រចាំនៅ​កម្ពុជាចំនួនប្រាំពីរមាន ស្ថានទូតបារាំង ស្ថានទូតអាមេរិក ស្ថានទូតអង់គ្លេស ស្ថានទូតរុស្ស៊ី ស្ថានទូតចិន ស្ថានទូត​សហភាពអឺរ៉ុប និងស្ថានទូតវៀតណាម។ ចំពោះស្ថានទូតមហាអំណាច នឹងទទួលយកញត្តិ ដោយឡែក​ស្ថានទូត​វៀតណាម អាចនឹងមិនទទួល ដោយសារហេតុផលសន្តិសុខ។

ក្រុមអ្នកតវ៉ា នៅតែជំរុញអោយអ្នកនាំពាក្យស្ថានទូតវៀតណាម លោក ត្រឹង វ៉ាន់ថុង កែតម្រូវខ្លឹមសារសំដីរបស់ខ្លួន​ដែល​បានលើកឡើងថា «ទឹកដីខ្មែរកម្ពុជាក្រោម គឺជាទឹកដីរបស់វៀតណាមតាំងពីដូនតា ហើយថាបារាំងមិនបាន​កាត់ទឹកដីខ្មែរកម្ពុជាក្រោមអោយវៀតណាមនោះឡើយ»។ ប៉ុន្តែសារព័ត៌មានក្នុងស្រុកមួយចំនួន បានផ្សព្វផ្សាយថា មន្ត្រីវៀតណាមរូបនោះ បានកែសម្ដីរបស់ខ្លួន ពី«ទឹកដីខ្មែរកម្ពុជាក្រោម ជារបស់វៀតណាម» មកជា«ទឹកដីខ្មែរ​កម្ពុជា​ក្រោម គ្រប់គ្រង់ដោយវៀតណាម» ជាយូរលង់ណាស់មកហើយទៅវិញ។

ក្រុមអ្នកតាមដានស្ថានការណ៍សង្គម បាននិយាយថា ការជួបជុំសម្ដែងមតិតរបស់ក្រុមសហព័ន្ធនិស្សិត បញ្ញវន្ដកម្ពុជា គ្រាន់តែជាការអនុវត្តសិទ្ធិរបស់ពួកគេ ដែលមានចែងការពារដោយរដ្ឋធម្មនុញ្ញ និងច្បាប់ស្ដីពីការធ្វើបាតុកម្ម ដោយ​សន្ដិវិធី​ប៉ុណ្ណោះ។ នៅក្នុងច្បាប់ស្ដីពីការធ្វើបាតុកម្ម ដោយសន្តិវិធី បានឲ្យនិយមន័យសកម្មភាព របស់ក្រុម​អ្នកតវ៉ា​ដូច្នេះថា៖ «បាតុកម្មដោយសន្តិវិធីសំដៅលើការប្រមូលផ្តុំគ្នា ឬការដង្ហែក្បួន​ដោយមនុស្សមួយក្រុម ដើម្បីទាមទារ តវ៉ា ឬសម្ដែង​ជាសាធារណៈនូវមនោសញ្ចេតនា គំនិត ឬឆន្ទៈរបស់ក្រុមខ្លួន​តាម​រូបភាព ឬមធ្យោបាយផ្សេងៗ​ដោយ​សន្តិវិធី។»

សូមរំលឹកថា នេះជាលើកទីពីរ ដែលសហព័ន្ធនិស្សិត បញ្ញវន្តកម្ពុជា រួមជាមួយក្រុមយុវជន និស្សិត ប្រជាពលរដ្ឋ និងព្រះសង្ឃខ្មែរក្រោមមួយចំនួន បន្ទាប់ពីបរាជ័យលើកទីមួយ នៅមុខស្ថានទូតវៀតណាមកាលពីថ្ងៃទី៨ ខែកក្កដា ឆ្នាំ២០១៤កន្លងមក។

ការប្រមូលផ្តុំនាពេលនោះ ត្រូវបានអាជ្ញាធរបំបែក និងវាយបង្ក្រាប។ ការបំបែកនេះ ត្រូវបានក្រុមអង្គការសង្គម​ស៊ីវិល​មួយចំនួនរិះគន់ថា ជាការរំលោភសិទ្ធិសេរីភាពបញ្ចេញមតិ និងសិទ្ធិជួបជុំរបស់ពលរដ្ឋ ព្រមទាំងរំលោភទៅលើ​ច្បាប់​ស្ដីពីការធ្វើបាតុកម្មដោយសន្តិវិធី។ ច្បាប់នោះ មានចែងទៀតថា៖ «ប្រសិនបើ​ដំណើរ​ការ​នៃការធ្វើបាតុកម្ម​ដោយ​សន្តិវិធីបង្កជាអំពើ ហិង្សាបណ្ដាលឲ្យអន្តរាយដល់ទ្រព្យសម្បត្តិឯកជនក្តី ឬទ្រព្យសម្បត្តិ​សាធារណៈក្តី ការ​ជួស​ជុល​ការខូចខាត ត្រូវជាបន្ទុករបស់ជនល្មើសនិងអ្នកសមគំនិត។ មួយវិញទៀត ជនណា​ដែល​បានប្រព្រឹត្តល្មើស បណ្ដាល​ឲ្យអាជ្ញាធរមានសមត្ថកិច្ច ឬបាតុករ ឬបុគ្គលដទៃទៀតមានរបួសស្នាម ឬបណ្ដាល​ឲ្យ​ស្លាប់ ជននោះនឹង​ត្រូវ​ផ្ដន្ទា​ទោស​តាមច្បាប់ព្រហ្មទណ្ឌជាធរមាន៕»

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...