ប្រទេសត្រូវតែមាន អង្គការសង្គមស៊ីវិល ដែលមានប្រសិទ្ធិភាពដើរតួនាទីជាមូលដ្ឋាន ក្នុងការធានាថា ប្រជាពលរដ្ឋទាំងអស់មានឱកាស ដើម្បីជួយគ្នាទៅវិញទៅមក និងចែករំលែកប្រយោជន៍ នៃការអភិវឌ្ឍ របស់​ប្រទេស​មួយនេះ។ (...) អង្គការសង្គមស៊ីវិល ដើរតួនាទីយ៉ាងសំខាន់ក្នុងការជួយប្រយុទ្ធប្រឆាំងនឹងជំងឺ ការការពារ​ទ្រព្យ​សម្បតិ្ត បរិស្ថាន និងកសាងទំនុកចិត្ត នៅក្នុងសេដ្ឋកិច្ច។» នេះជាការបញ្ជាក់របស់ លោក វីលៀម អ៊ីធូត (William E.Todd) ឯក​អគ្គរដ្ឋទូតអាមេរិកប្រចាំប្រទេសកម្ពុជា ក្នុងឱកាសដែលលោកជួបពិភាក្សាការងារជាមួយ ក្រុមប្រមុខអង្គការ​ស៊ីវិល សំខាន់មួយចំនួន នៅកម្ពុជា ក្នុងពេលចុងក្រោយនេះ។

ឯកអគ្គរដ្ឋទូតអាមេរិកប្រចាំប្រទេសកម្ពុជារូបនេះ បានអត្ថាធិប្បាយបន្ថែមថា រូបលោក ក៏ដូចជាសហរដ្ឋអាមេរិក រីករាយ និងស្វាគមន៍ ក្នុងការសហការជាមួយគ្រប់ក្រុមអង្គការសង្គមស៊ីវិល ទាំងអស់ ដើម្បីស្វែងរកដំណោះ​ស្រាយ​ដែលប្រសើរឡើង ក្នុងគោលដៅធ្វើឲ្យប្រជាជន កម្ពុជា និងប្រទេសកម្ពុជា ទទួលបានអនាគត ដ៏សម្បូររុងរឿង។

ជាបន្តបន្ទាប់ ក្រុមអង្គការសង្គមស៊ីវិលមួយចំនួន បានត្អូញត្អែរថារដ្ឋបាលថ្នាក់ជាតិ និងរដ្ឋបាលថ្នាក់ក្រោមជាតិ បាន​ធ្វើកិច្ចការមួយចំនួន ដោយខ្វះតម្លាភាព និងមិនបានផ្តល់ការសហការល្អ ក្នុងភាពជាដៃគូជាមួយក្រុម​អង្គការសង្គម​ស៊ីវិល ដែលមានជំនាញពាក់ព័ន្ធនោះទេ។ តែសម្រាប់រដ្ឋាភិបាល បានលើកឡើងជាហូរហែរថា ក្រុមអង្គការអង្គការ​សង្គមស៊ីវិល គឺជាដៃគូមិនអាចខ្វះបានរបស់រដ្ឋាភិបាល ក្នុងការដឹកនាំប្រទេស។

ជុំវិញករណីនេះលោក កែម ឡី អ្នកតាមដានស្ថានការណ៍សង្គមកម្ពុជាបានពន្យល់ថា ទាំងរដ្ឋាភិបាល ក្រុមអង្គការ​សង្គម​ស៊ីវិល និងភាគីឯកជន ក៏ដូចជាប្រជាពលរដ្ឋ គឺសុទ្ធសឹងជាសមាសភាពសំខាន់ នៅក្នុងការអភិវឌ្ឍសង្គមន៍ជាតិ ដូច្នេះតួអង្គទាំងនេះគឺជាតួអង្គមិនអាចខ្វះបាន នៅក្នុងសង្គមប្រជាធិបតេយ្យ។

អ្នកតាមដានស្ថានការណ៍សង្គមកម្ពុជារូបនេះ បញ្ជាក់ថា៖ «មានរឿងច្រើនដែលរដ្ឋាភិបាលធ្វើបាន តែក៏មានរឿង​ច្រើនធ្វើមិនបាន ត្រូវការសង្គមស៊ីវិល និងដៃគូឯកជន។ (...) អញ្ចឹងដៃគូទាំងបីនឹងមិនអាចខ្វះគ្នាបានទេ។ តែបើដៃគូរ​ទាំងបី​ហ្នឹង ស្រាក់ដៃគ្នាធ្វើការក៏ដោយ ក៏មិនទទួលបានជោគជ័យដែរ ប្រសិនបើភាគីទាំងនោះ មិនយក​ប្រជាពលរដ្ឋ​ជាស្នូល៕»