វើលខូត នឹងអវត្តមាននៅបាល់ទាត់ពិភពលោក២០១៤នេះ
ខ្សែប្រយុទ្ធអន្តរជាតិអង់គ្លេស ឌឺស្ស វើលខូត (Theo Walcott） នឹងអវត្តមានក្នុងព្រឹត្តិការណ៍ វើល ខាប់ នៅឆ្នាំនេះក្នុងប្រទេសប្រេស៊ីល គេអាចនិងមិនបានចូលលេងយ៉ាងហោចណាស់រយៈពេល៦ខែ ដោយសារតែបញ្ហា របួសជង្គង់ នេះបើយោងទៅតាមការបញ្ជាក់របស់ អាស្សេនល (Arsenal) ដែលជាក្លិបរបស់គេកាលពីថ្ងៃច័ន្ទ។
កីឡាករខ្សែប្រយុទ្ធអន្តរជាតិអង់គ្លេស ឌឺស្ស វើលខូត។ (រូបថត របស់ក្លិបអាសឺណល)
បាល់ទាត់ពិភពលោក - វើលខូដ បានរងរបួសសរសៃសន្លាក់យ៉ាងធ្ងន់ធ្ងរ នៅលើជង្គង់ឆ្វេងរបស់គេ អំឡុងដែលក្រុម អាស្សេនល ដែលកំពុងឈរលេខ១លើតារាង ព្រីមៀរ៍ លីក （Premier League） បានទទួលជ័យជម្នះ ២-០ ក្នុងការប្រកួត FA Cup លើទឹកដីខ្លួនឯងលើក្រុមស្ថិតក្នុងទីក្រុងឡុងដ៍តែមួយ ធូតតិនហ៊ាម ហ៊តស្ពឺ (Tottenham Hotspur) កាលពីថ្ងៃសៅរ៍ ទី៤ ខែមករា កន្លងទៅ។
សេចក្តីថ្លែងការណ៍មួយរបស់ក្លិប អាស្សេនល បានបញ្ជាក់ថា វើលខូដ ត្រូវបានរំពឹងថា នឹងអវត្តមានយ៉ាងហោចណាស់រយៈពេល៦ខែ ហេតុនេះ រូបគេនឹងត្រូវអវត្តមានសម្រាប់រដូវកាលដែលនៅសល់របស់ក្របខ័ណ្ឌ អង់គ្លេស និងយុទ្ធនាការ វើល ខាប់ នៅប្រទេសប្រេស៊ីល នៅក្នុងរដូវក្តៅនេះ។
កីឡាករវ័យ២៤ឆ្នាំរូបនេះ បានរងការឈឺចុកចាប់នៅត្រង់ជង្គង់របស់គេ នៅពេលជិតបញ្ចប់ការប្រកួតក្រោយ ពីធ្វើការដណ្តើមបាល់មួយ និងត្រូវបានគេសែងចេញពីទីលាន។
ខ្សែបម្រើ អារ៉ុន រ៉ាមស៊ីយ៍ (Aaron Ramsey) ដែលជាមិត្តរួមក្រុមនៅ អាស្សេនល បានសម្តែងការអាណិតអាសូរទៅលើ វើលខូដ នៅលើបណ្តាញសង្គមតាមរយៈការសរសេរថា៖ «ពិតជាការខកចិត្តសម្រាប់ វើលខូដ ហើយរូបគេនឹងវិលមកកាន់តែខ្លាំងជាងមុន ក្រោយពីបញ្ហានេះ។ វាពិតជាអស្ចារ្យណាស់សម្រាប់យើងក្នុងរដូវកាលនេះ។ សូមឲ្យមិត្តឆាប់ជាសះស្បើយណា។»
លោក រ៉ែយ ភើលើ (Ray Parlour) អតីតកីឡាកររបស់ និងជាអតីតខ្សែបម្រើរបស់ក្រុមបាល់ទាត់ជម្រើសជាតិអង់គ្លេស បាននិយាយថា ការអវត្តមាន វើលខូដ នឹងក្លាយជាការខកចិត្តដ៏ធំមួយសម្រាប់ទាំងក្លិប និងប្រទេសរបស់គេ។
លោក ភើលើ បានប្រាប់ទូរទស្សន៍ Sky Sports ឲ្យដឹងថា៖ «នេះជាការរងរបួសដ៏ធំមួយ សម្រាប់ក្រុម អាស្សេនល និង អង់គ្លេស ពីព្រោះខ្ញុំប្រាកដក្នុងចិត្តថា វើលខូដ នឹងចាប់ផ្តើមក្នុងជម្រើសដំបូងសម្រាប់ក្រុមអង់គ្លេសនៅប្រទេស ប្រេស៊ីល»។
លោកបានប្រាប់បន្ថែមទៀតថា៖ «វាជាការខកចិត្តដ៏ធំមួយសម្រាប់រូបគេផ្ទាល់ ពីព្រោះគេកំពុងតែលេងក្នុងក្រុមខ្លាំងមួយក្នុងពេលនេះ និងកំពុងតែសម្លឹងឆ្ពោះទៅកាន់ប្រទេសប្រេស៊ីល។ រូបគេពិតជាត្រូវតែខកចិត្ត អំពីទំហំនៃការរងរបួសមួយនេះ»។
ខណៈ ដែលស្ថិតនៅលើ ហ្វ្រង់កា កីឡាករ វើលខូដ បានរងនូវការចោលប្រាក់កាក់ ដបប្លាស្ទិក និងវត្ថុផ្សេងមួយទៀត ទៅលើខ្លួនពីសំណាក់អ្នកគាំទ្ររបស់ក្រុម ភ្ញៀវពេលជិតបញ្ចប់បញ្ចប់ការប្រកួត។
នាពេលមុនបន្តិចនេះ កាលពីថ្ងៃចន្ទកន្លងទៅ និងមុនពេលទំហំនៃការរងរបួសនេះ ត្រូវបានគេប្រកាសឲ្យដឹងជាសាធារណៈ សហព័ន្ធកីឡាបាល់ទាត់អង់គ្លេស បានធ្វើការបញ្ជាក់ថា វើលខូដ នឹងមិនប្រឈមមុខនឹងការចាត់វិធានការផ្នែកវិន័យឡើយសម្រាប់ការ ប្រើកាយវិការបង្ហាញពីលទ្ធផល ២-០ ពី ហ្វ្រង់កា របស់គេដែលហាក់មានបំណងដើម្បីបង្ហាញទៅកាន់អ្នកគាំទ្រនៃក្រុម ហ៊តស្ពឺ ៕
រូបថតបន្ថែមនៅពេលកីឡាកររូបនេះ រងរបួស៖
--------------------------------------
ដោយ៖ វន ដារា - ភ្នំពេញ ថ្ងៃទី១០ ខែមករា ឆ្នាំ២០១៤
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ