បន្ទាប់ពីបំបាក់ក្រុមឥណ្ឌូនេស៊ី ៧-០ កាលពីថ្ងៃអាទិត្យចុងសប្តាហ៏មុន ក្រុមយក្សរបស់អង់គ្លេសអាសឺណល (Arsenal) បាន​លត់ក្រុមជម្រើសជាតិវៀតណាម ៧-១ ទៀត ក្នុងការប្រកួតមិត្តភាពកំដៅសាច់ដុំ នៅទីក្រុងហាណូយ នា​កីឡា​ដ្ឋាន​ជាតិមីឌីញ (My Dinh Stadium) កាលពីយប់ថ្ងៃពុធ។

ការប្រកួតរវាងក្រុមអាសឺណល និងក្រុមជម្រើសជាតិវៀតណាម។

នៅមុខទស្សនិកជនប្រមាណជាង៤ម៉ឺននាក់ ខ្សែប្រយុទ្ធអន្តរជាតិបារាំង អូលីវើយើ ជីរ៉ូដ (Olivier Giroud) បានរកគ្រាប់​បាល់បញ្ចូលទីបាន៣គ្រាប់តែម្នាក់ឯង នៅត្រឹមតែវគ្គទី១តែប៉ុណ្ណោះ។ ជីរ៉ូដ បានបើកឆាកទាត់បញ្ចូលទីគ្រាប់ទី១ នៅនាទី​ទី៥ និងបន្ថែម២គ្រាប់ទៀត នៅមុនវគ្គទី១បញ្ចប់។

ជីរ៉ូដ ដែលផ្ទេរមកពីក្រុមម្ចាស់ជើងឯកបារាំងម៉ុងប៉េលីយើ (Montpellier) មកកាន់ក្រុមអាសឺណល កាលពីខែមិថុនា ឆ្នាំ​២០១២ បានរកគ្រាប់បាល់បញ្ចូលទីបាន៥គ្រាប់ហើយ ក្នុងការប្រកួតមិត្តភាពនៅអាស៊ី២ប្រកួតដំបូងនេះ បន្ទាប់ពីគាត់ទាត់​ចូលទីក្រុមឥណ្ឌូនេស៊ី ២គ្រាប់ដែរ កាលពីការប្រកួតនៅក្នុងទីក្រុងចាកាតា។

អាសឺណល នៅតែបន្តគ្របដណ្តប់យ៉ាងខ្លាំងទៅលើក្រុមវៀតណាមនៅវគ្គទី២។ កីឡាករអាឡិចអុកឡាត់ ឆាំបឺឡែន (Alex Oxlade-Chamberlain) បានបន្ថែម១គ្រាប់ទៀត បន្ទាប់ពីកែបាល់វគ្គទី២ បាន៤នាទី។ កីឡាករមកពីឈុតយុវជន​អាសឺណល ឆាប់បា អ័កផុម (Chuba Akpom) ក៏រកបាន២គ្រាប់ទៀតដែរ នៅនាទីទី៥៤ និងនាទីទី៦០។

ខ្សែបម្រើអេស្ប៉ាញ មីកែល អាតេតា (Mikel Arteta) ដែលផ្ទេរពីក្រុមអេវើតុន (Everton) មកកាន់កាំភ្លើងធំ អាសឺណល កាលពីឆ្នាំ២០១១ បានបង្ហើយគ្រាប់ទី៧បានសម្រេច នៅនាទីទី៧៥។

ខ្សែប្រយុទ្ធវៀតណាម ត្រាន់ ម៉ាញ់ដុង (Tran Manh Dung) បានបំបែកពងមាន់បានសម្រេច១ គ្រាប់នៅនាទីទី៧៨ ជួយ​ឲ្យក្រុមម្ចាស់ផ្ទះ បន្លឺសម្លេងយ៉ាងខ្លាំង។ ទោះបីជាដឹងថាចាញ់ហើយ ក៏ដោយ ខ្សែប្រយុទ្ធរូបនេះ នៅតែរត់អបអរ​ដោះ​អាវ​ចេញ ដូចបានឈ្នះពានរង្វាន់យ៉ាងដូច្នោះដែរ។

ខណៈដែលនៅចុងម៉ោងមានភ្លៀងធ្លាក់កាន់តែខ្លាំង អ្នកចាំទីវៀតណាម ត្រាន់ ប៊ូងូក (Tran Buu Ngoc) ត្រូវពិន័យ​កាត​ក្រហមនៅនាទីទី៨៩ ដោយសារចេញចាប់បាល់ក្រៅប្រអប់ទី ហើយក៏ត្រូវជំនួសដោយខ្សែការពារ ដាវ វ៉ាន់ផុង (Dao Van Phong) ធ្វើជាអ្នកចាំទីជំនួសវិញ។ ប៉ុន្តែទោះជាយ៉ាងណា ពុំមានក្រុមណាមួយ រកគ្រាប់បាល់បញ្ចូលទីគ្នាទៀតបាន​នោះ​ទេ៕

សូមទស្សនាការប្រកួតនេះ ដោយសង្ខេបឡើងវិញ៖

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៨ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ