ព្រឹត្តិការណ៍ដែលទំនងជាភេវរកម្មមួយ បានកើតឡើងនៅកណ្ដាលទីលានធានអានម៉េននៃទីក្រុងប៉េកាំងប្រទេសចិន នៅ​ថ្ងៃចន្ទនេះ។ រថយន្ដមួយគ្រឿង បានបានបើកបុករនាំងផ្ទុះឆេះជាភ្លើង ហើយទម្លុះហ្វូងមនុស្ស មុននឹងទៅ​ឈប់នៅ​ក្បែរ​ស្ពានមួយ នៃទីលាន។ អាជ្ញាធរបានបិតបរិវេណជុំវិញកន្លែងកើតហេតុ ហើយហាមប្រាមរាល់ការផ្សាយ​រូបភាព ឬវីដេអូពី​ព្រឹត្តិការណ៍នេះ។

ទិដ្ឋភាពភ្លើងឆេះបង្ហុយជាផ្សែងខ្មួលខ្មាញ់ ឡើងទៅលើ នៃរថយន្ដហ្សីប នៅកណ្ដាលទីលានធៀនអានម៉េន។ (រូបថតចម្លង​ពីអេក្រង់វីដេអូ)

ទីក្រុងប៉ារីស - និមិត្តរូបនៃរដ្ឋអំណាចចិន ទទួលរងគ្រោះនឹងការវាយប្រហារមួយ ដែលទំនងជា«ភេវរកម្ម» នៅវេលាថ្ងៃ​ត្រង់ថ្ងៃចន្ទនេះ។ រថយន្ដមួយគ្រឿង បានបុកទម្លុះហ្វូងមនុស្ស នៅលើទីលាន ធៀនអានម៉េន ដែលជាច្រកចូលរាជវាំង​ចាស់​របស់ទីក្រុងប៉េកាំង។ តាមការផ្សាយឲ្យដឹងរបស់ប្រព័ន្ធផ្សព្វផ្សាយផ្លូវការរបស់ចិន បានឲ្យដឹងជាជំហានដំបូងថា មនុស្ស៣នាក់ បានស្លាប់នៅក្នុងរថយន្ដដែលផ្ទុះឆេះជាអណ្ដាតភ្លើងឡើង និង១១នាក់ផ្សេងទៀតរងរបួស។ ប៉ុន្តែដំណឹង​ចុងក្រោយបានឲ្យដឹងថា ចំនួនអ្នកស្លាប់បានឡើងដល់ទៅ៥នាក់ និងរងរបួស៣៨នាក់។

កន្លែងកើតហេតុ​ និងទីលាន ត្រូវបានអាជ្ញាធរបិតឃាំងទាំងស្រុង

ព្រឹត្តិការណ៍នេះ បានធ្វើឲ្យរញ្ជួយដល់រដ្ឋអំណាចចិន ដែលជាហេតុធ្វើឲ្យកងកម្លាំងសមត្ថកិច្ចបានចុះធ្វើប្រតិកម្មភ្លាមៗ នៅ​នឹងកន្លែង ក៏ដូចជាធ្វើសកម្មភាពរាំងខ្ទប់យ៉ាងខ្លាំងមួយ នៅតាមកន្លែងផ្សេងទៀត។ អាជ្ញាធរបានបញ្ជាឲ្យដកចេញ នូវរូប​ថតទាំងឡាយណា ដែលទាក់ទងនឹងរថយន្ដឆេះជាអណ្ដាតភ្លើងនេះ ហើយដែលត្រូវបានផ្សព្វផ្សាយ នៅតាមបណ្ដាញ​អាំងធើណែតក្រោយព្រឹត្តិការណ៍ភ្លាមៗ។ បើទោះជាមូលហេតុ ស្ថិតនៅជាអាថ៌កំបាំងនៅឡើយ តែវាត្រូវបានគេគិតថា អាចជាស្នាដៃនៃ​សកម្មជននៃក្រុមណាមួយ ដែលចង់បង្ហាញពីការតវ៉ាររបស់ក្រុមគេ ហើយបានជ្រើសរើសទីកន្លែង នៅ​ចំកណ្ដាលបេះដូងនៃទីក្រុង ជាពិសេសជាកន្លែងដែលសម្បូរទៅដោយទេសចរណ៍ផងនោះ។

ទីលានធៀនអានម៉េន ដែលល្បីឈ្មោះតាំងពីព្រឹត្តិការណ៍ បង្ក្រាបបាតុកម្មឆ្នាំ១៩៨៩ ត្រូវបានដាក់ក្រោម​ការត្រួតពិនិត្យ​ដ៏តឹងតែង របស់កងកម្លាំងសន្តិសុខ។ ប៉ុន្តែអ្វីដែលបង្កការភ្ញាក់ផ្អើលកាន់តែខ្លាំងនោះ គឺបរិវេណនៃទីលានទាំងមូល ត្រូវ​បានបិតតាំងពីម៉ោង១២និង៥នាទី នៅពេលដែលហេតុការណ៍បានកើតឡើងហើយភ្លាមៗ។ ជនទេសចរណ៍ទាំងអស់ ត្រូវបានគេ​ជម្លៀស​ចេញភ្លាមៗពីទីនោះ ហើយខ្សែរថភ្លើងក្រោមដី ដែលនាំទៅកាន់ទីលាន ក៏ត្រូវបានបញ្ជាឲ្យផ្អាកដែរ។ អ្នកការសែត​មួយរូបរបស់ទីភ្នាក់ងារសារព័ត៌មានបារាំង ដែលនៅមិនឆ្ងាយពីទីនោះ បានរាយការណ៍ថា ភ្នាក់ងារ​នគរបាល​បាន​ដាក់​របាំងខ្ពស់ៗ ព័ទ្ធជុំវិញទីកន្លែងកើតហេតុ ដើម្បីបិតបាំងរថយន្ដហ្សីប ដែលកំពុងឆេះ។

អ្នកការសែតបារាំងពីរនាក់ត្រូវបានចាប់ឃាត់ខ្លួន នៅពេលដែលពួកគេព្យាយាមទៅជិតកន្លែងកើតហេតុ។ តែបន្តិច​ក្រោយ​មក ពួកគេត្រូវបានដោះលែងមកវិញ តែរូបភាពដែលអ្នកកាសែតទាំងពីរបានថត ត្រូវបានគេលប់ចោលទាំងអស់។

ទោះបីប្រទេសចិនជាប់ឈ្មោះល្បី ខាងរិតបន្តឹងផ្នែកសន្តិសុខខ្លាំងជាងគេយ៉ាងណាក៏ដោយ តែហេតុការណ៍នេះ​ត្រូវ​បាន​គេគិតថា ជា«ភេវរកម្ម»ដែលវាយប្រហារនិមិត្តរូបនៃរដ្ឋអំណាចចិន ជាពិសេសទីកន្លែងដែលមានតាំងនូវរូបថត លោក​ប្រធានម៉ៅដ៏ធំជាងគេ។ បន្ទាប់ពីព្រឹត្តិការណ៍បង្ក្រាបនៅឆ្នាំ១៩៨៩នោះមក ទីលានធៀនអានម៉េន ធ្លាប់ទទួលរងនូវការ​ប្រឆាំងតវ៉ាជាច្រើនដង ក្នុងនោះការតវ៉ារបស់ជនជាតិទីបេ ប្រមាណជា១២០នាក់នៅឆ្នាំ២០០៩ និងមានប៉ុនប៉ងដុតសម្លាប់​ខ្លួនបានកើតឡើង កាលពីខែតុលាឆ្នាំ២០១១ជាដើម៕

រូបថត និងវីដេអូបន្ថែមដែលបណ្ដាញផ្សព្វផ្សាយបស្ចឹមលោក ថតបាន៖

--------------------------------------------------
ដោយ ឈូករ័ត្ន - ថ្ងៃទី២៨ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ