មន្រ្តីជាន់ខ្ពស់គណបក្សប្រជាជនកម្ពជា លោក ឈាង វុន បានអះអាងថា ប្រសិនបើគណបក្សសង្គ្រោះជាតិ​នៅតែប្រកាន់​ជំហរថា គណបក្សខ្លួនឈ្នះឆ្នោតទៀតនោះ គឺមានន័យស្មើនឹងព្រះមហាក្សត្រព្រះបាទសម្តេច នរោត្តម សីហមុនី ជាអ្នក​ធ្វើខុស។ ព្រោះព្រះអង្គបានទទួលស្គាល់ជ័យជំនះ របស់គណបក្សប្រជាជនកម្ពុជា ។ ចំណែកមន្រ្តីគណបក្សសង្គ្រោះជាតិ បានចោទប្រកាន់ថា មូលហេតុដែលព្រះអង្គទ្រង់ព្រះតម្រិះបែបនេះ គឺដោយសារគណបក្សប្រជាជនកម្ពុជា បាន​រាយ​ការណ៍​ព័ត៌មានមិនពិតថ្វាយព្រះមហាក្សត្រ។

លោក ឈាង វុន ថ្លែងនៅមន្ទីររដ្ឋសភា។ (រូបថតរដ្ឋសភា)

ការជាប់គាំងនយោបាយនៅក្នុងប្រទេសកម្ពុជា បានអូសបន្លាយមកជាច្រើនខែមកហើយ រហូតមកទល់ពេលនេះ នៅតែ​មិនទាន់មានដំណោះស្រាយណាមួយអាចទម្លាយនូវបញ្ហានេះបាននៅឡើយ។ គណបក្សនីមួយៗដែលទទួលបាន​អាសនៈ​នៅ​ក្នុងរដ្ឋសភា សុទ្ធតែប្រកាន់គោលជំហរដោយអួតអាងពីជ័យជំនះរៀងៗខ្លួននៅក្នុងការបោះឆ្នោតនេះ។ គណបក្ស​ប្រជាជន​កម្ពុជាបានអះអាងថា ខ្លួនទទួលបានជ័យជំនះ ដោយមានការទទួសស្គាល់ពីគ.ជ.ប និងព្រះមហាក្សត្រ។ ចំណែក​គណបក្ស​ប្រឆាំងវិញក៏អះអាងថា ខ្លួនឈ្នះដែរ តែបានចោទប្រកាន់ថាខ្លួនបែរជាចាញ់ឆ្នោត គឺដោយសារតែគ.ជ.ប លួច​សន្លឹកឆ្នោត។

ថ្លែងនៅក្នុងវេទិកាអ្នកស្តាប់វិទ្យុអាស៊ីសេរីកាលពីយប់ថ្ងៃទី២៨ខែតុលា លោក ឈាន វុន មន្រ្តីជាន់ខ្ពស់គណបក្ស​ប្រជាជន​កម្ពុជា និងជា​អ្នកនាំពាក្យនៃរដ្ឋសភាជាតិ បានលើកឡើងថា គណបក្សប្រជាជនកម្ពុជា បានទទួលជ័យជំនះយ៉ាង​ពិត​ប្រាកដនៅក្នុងការ​បោះឆ្នោតជ្រើសតាំងតំណាងរាស្ត្រនីតិកាលទី ៥ កាលពីពេលកន្លងទៅ។ លោក ឈាង វុន បញ្ជាក់ថា ជ័យជំនះរបស់​គណបក្សប្រជាជនកម្ពុជា មានការទទួលស្គាល់ដោយគណកម្មាធិការជាតិរៀបចំការបោះឆ្នោត ក្រុម​ប្រឹក្សា​ធម្មនុញ្ញ និងជា​ពិសេសគឺព្រះមហាក្សត្រព្រះបាទសម្តេច នរោត្តម សីហមុនី តែម្តង ដែលព្រះអង្គបានទទួលស្គាល់តាម​រយៈការកោះ​អញ្ជើញអ្នកតំណាងរាស្រ្តគណបក្សប្រជាជនកម្ពុជាចំនួន ៦៨ រូបនិងអ្នកតំណាងរាស្រ្ត​គណបក្សសង្គ្រោះ​ជាតិ​តែ ៥៥ រូប​ឲ្យចូលរួមប្រជុំសភា។ មន្រ្តីរូបនេះ បានសង្កត់ធ្ញន់ថា ហេតុដូច្នេះហើយ «ប្រសិនបើគណបក្សប្រឆាំង​នៅតែ​ចចេះថា ខ្លួន​ទទួលបានជ័យជំនះទៀត នោះមានន័យថា ព្រះមហាក្សត្រទ្រង់ជាអ្នកខុស ដោយសារថា ព្រះមហាក្សត្រ​ទ្រង់ទទួលស្គាល់ គណបក្សប្រជាជនកម្ពុជាឈ្នះឆ្នោត»។

មន្រ្តីជើងខ្លាំងនៅក្នុងគណបក្សប្រជាជនកម្ពុជារូបនេះ បានបន្តថា ប្រជាជកម្ពុជាទាំងអស់ ដែលកើតមកជាកូនខ្មែរមានភព្វ​សំណាងខ្លាំងណាស់ ដែលមានព្រះមហាក្សត្រសោយរាជ្យប្រកដដោយទសពិធរាជធម៌ដូចបច្ចុប្បន្ន គឺលោកតែងតែផ្តល់​យុត្តិធម៌ជានិច្ចដល់កូនចៅរបស់ព្រះអង្គ។ លោក ឈាង វុន បន្តថា លោកមិនអាចទទួលយកបាននោះទេ នៅពេលដែល​មាននរណាមួយមករំលោភបំពាន ប្រមាថមើលងាយស្ថាប័នរាជបល្ល័ង្គ ឬអង្គព្រះមហាក្សត្រជាដាច់ខាត។

តបនឹងបញ្ហានេះ អ្នកនាំពាក្យគណបក្សសង្គ្រោះជាតិលោក យ៉ែម ប៉ុញ្ញរិទ្ធ បានថ្លែងប្រាប់ទស្សនាវដ្តី​មនោរម្យព័ងអាំងហ្វូ ថាមូលហេតុដែលព្រះមហាក្សត្រទ្រង់ព្រះទទួលស្គាល់ថា គណបក្សប្រជាជនកម្ពុជា ជាអ្នកទទួលបានជ័យជំនះ គឺដោយ​សារតែគណបក្សប្រជាជនរាយការណ៍ នួវព័ត៌មានខុសការពិត កុហក ចំពោះព្រះមហាក្សត្រ។ លោកថា គណបក្សកាន់​អំណាចទេ ដែលជាអ្នកប្រមាថចំពោះព្រះមហាក្សត្រ ព្រោះកុហកព្រះអង្គ។

លោក យ៉ែម ប៉ុញ្ញារិទ្ធ ដែលអ្នកតំណាងរាស្រ្តគណបក្សប្រឆាំងដែរ ក៏បានបញ្ជាក់ពីជំហររបស់បក្សខ្លួន ដោយនូវតែមិន​ចូលរួមប្រជុំសភា ដរាបណាយុត្តិធម៌នៅមិនទាន់កើតមានដល់ម្ចាស់ឆ្នោត។ យុត្តិធម៌ ដែលគណបក្សនេះទាមទារ គឺបង្កើត​គណកម្មការពិសេស ដើម្បីស៊ើបអង្កេតភាពមិនប្រក្រត្រីការបោះឆ្នោត។

តួអង្គព្រះមហាក្សត្រជាតួអង្គកំពូលនៅក្នុងប្រទេសកម្ពុជា ព្រះអង្គជាអជ្ញាកណ្តាលក្នុងការជួយ​សម្រុះសម្រួល​ដោះស្រាយ​នូវបញ្ហាប្រទេសជាតិធំៗ ជាពិសេសគឺបញ្ហាការជាប់គាំងនយោបាយ នៅពេលណាដែលអ្នកនយោបាយ​ខ្មែរ​ខ្វែងគំនិតគ្នា ដូចជាស្ថានការណ៍ជាប់គាំងនយោបាយ​ នៅក្នុងប្រទេសកម្ពុជានាពេលបច្ចុប្បន្ននេះ។ ក៏ប៉ុន្តែតួអង្គព្រះមហាក្សត្រ នរោត្តម សីហមុនី ក្នុងការដោះស្រាយបញ្ហានយោបាយនាពេលកន្លងមក ហាក់មិន​មានជាទម្ងន់សម្រាប់ឲ្យអ្នក​នយោបាយ​អនុវត្ត​ឡើយ ។ ម្យ៉ាងវិញទៀតពេលនេះ តួនាទីរបស់​ព្រះមហាក្សត្រត្រូវគេមើលឃើញថា ហាក់នៅឆ្ញាយ និងមិនសូវមានឥទ្ធិពល​ទាល់តែសោះ ចំពោះអ្នកនយោបាយខ្មែរបច្ចុប្បន្ន។

ការណ៍នេះ បានធ្វើឲ្យពលរដ្ឋមួយចំនួនហាក់មិនសូវពេញចិត្តនឹងសមត្ថភាពរបស់ព្រះមហាក្សត្របច្ចុប្បន្នឡើយ តែផ្ទុយ​ទៅវិញពួកគេបានលើកសរសើរពីអតីតព្រះមហាវីរក្សត្រកម្ពុជា ដែលព្រះអង្គបានសោយទិវង្គតទៅ ដោយអះអាងថា ការ​ជាប់គាំងនយោបាយនាពេលបច្ចុប្បន្ន ប្រសិនបើព្រះបាទ នរោត្តម សីហនុ នៅមានព្រះជន្មនៅឡើយ នឹងអាចដោះស្រាយ​បានជាក់ជាមិនខាន៕

-------------------------------------------------------
ដោយ៖ ជា ធីរិទ្ធ - ថ្ងៃទី ២៩ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ