ក្រុមកាំភ្លើងធំ អាសឺណល (Arsenal) បានបង្ហាញពីទម្រង់លេងគួរឲ្យភ្ញាក់ផ្អើល បន្ទាប់ពីពួកគេប្រកួតលក្ខណៈទេសចរណ៏ នៅ​តំបន់អាស៊ី ដោយបានទទួលជ័យជំនះទាំង៣ ក្នុងការប្រកួត៣លើកដំបូង។

គ្រូបង្វឹងរបស់ក្រុមបាល់ទាត់ជប៉ុន ណាហ្គូយ៉ា និងលោក វឹងជ័រ នៃក្រុមអាសឺណល ចាប់ដៃគ្នា។

បន្ទាប់ពីបំបាក់ឥណ្ឌូនេស៊ី (Indonesia Dream Team) ៧-០ និងលត់វៀតណាម (Vietnam XI) ៧-១ រួចមក អាសឺណល​បានយកឈ្នះក្រុម ណាហ្គូយ៉ា ហ្គ្រាមផឺស (Nagoya Grampus) របស់ប្រទេសជប៉ុន ដោយលទ្ធផល ៣-១ ទៀត កាលពី​យប់ថ្ងៃច័ន្ទ។

ខ្សែប្រយុទ្ធអន្តរជាតិបារាំង អូលីវីយើ ជីរ៉ូដ (Olivier Giroud) នៅតែជាអ្នកទាត់បញ្ចូលទីបានគ្រប់ការប្រកួតដដែល បន្ទាបពី​គាត់លោតតែតបើកឆាក ឲ្យអាសឺណលនាំមុខម្ចាស់ផ្ទះមុនបានសម្រេចនៅនាទីទី៣ ដើមវគ្គទី១ បន្ទាប់ពីទទួលបាល់បាន​យ៉ាងល្អ ពីខ្សែបម្រើថូម៉ាស រ៉ូស៊ីស្គី (Tomas Rosicky)។

ខ្សែបម្រើសញ្ជាតិជប៉ុន រីយ៉ូ ម៉ីយៃជី (Ryo Miyaichi) បានបន្ថែមគ្រាប់ទី២ ឲ្យលោកអាសិង វិងហ្គឺ (Arsene Wenger) មាន​ការកក់ក្តៅនៅនាទីទី២៦ ដោយការទាត់បាល់ពិន័យប៉េណាល់ទី១១ម៉ែត្រ បន្ទាប់ពីខ្សែការពារ​ក្រុមម្ចាស់ផ្ទះធ្វើ​ឲ្យមាន​កំហុស​ឆ្គង ទៅលើជីរ៉ូដ នៅក្នុងប្រអប់គ្រោះថ្នាក់។

ចាប់ផ្តើមបាន១០នាទី ក្នុងវគ្គទី២ ខ្សែបម្រើអន្តរជាតិអង់គ្លេស ថេអូ វ៉ាលខត (Theo Walcott) បានបន្ថែមគ្រាប់ទី៣ ឲ្យក្រុម​ភ្ញៀវជាបន្តទៀត។ ប៉ុន្តែទោះជាយ៉ាងណា ក្រុមណាហ្គាយ៉ា ដែលជាអតីតក្រុមរបស់លោកវិងហ្គឺ ធ្លាប់ដឹកនាំមុន​ផ្ទេរ​មក​អាសឺណលឆ្នាំ១៩៩៦នោះ បានវាយបក១គ្រាប់វិញនៅនាទីទី៧២ ដោយខ្សែប្រយុទ្ធគីស្ស៊ូ យ៉ាណូ (Kisho Yano)។

ក្រុមរបស់លោកអាសិង វិងហ្គឺ នឹងត្រូវប៉ះក្រុម យូរ៉ាវ៉ា រ៉ែដដាយម៉ុន (Urawa Red Diamonds) របស់ជប៉ុន១ក្រុមទៀត នៅថ្ងៃ​ទី២៦ ខែកក្កដាខាងមុខនេះ មុនពេលដែលត្រូវធ្វើដំណើរទៅកាន់ទឹកដីអង់គ្លេសវិញ ដើម្បីចូលរួមប្រកួតពានរង្វាន់​អិមីរ៉េដខាប់ (Emirates Cup) ជាមួយក្រុមណាប៉ូលី (Napoli) របស់អ៊ីតាលី នៅថ្ងៃទី០៣ ខែសីហា និងក្រុមហ្គាឡាតាសារៃ (Galatasaray) របស់ទួរគី នៅថ្ងៃទី០៤ ខែសីហា។

មុនបើករដូវកាលថ្មី កាំភ្លើងធំអាសឺណល នឹងត្រូវប៉ះក្រុមគូប្រជែងធំក្នុងលីក ម៉ែនឆេស្ទើ ស៊ីធី (Manchester City) ក្នុងការ​ប្រកួតមិត្តភាពចុងក្រោយ នៅថ្ងៃទី១០ ខែសីហា និងសប្តាហ៏បន្ទាប់ក្រុមមួយនេះ ត្រូវប៉ះក្រុមខែល អាស្តុន វីឡា (Aston Villa) ក្នុងការប្រកួតបើកឆាកសប្តាហ៏ទី១ នៃពានរង្វាន់ព្រីមែលីក (Premier League)៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៣ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ