ប្រទេសកូរ៉េខាងជើង បានសុំទៅបងប្អូនគូរសត្រូវរបស់ខ្លួន ឲ្យបញ្ឈប់នូវរាលសកម្មភាពបង្កហេតុ តាមផ្លូវយោធា ប្រសិន​បើចង់អោយតំបន់ឧស្សាហកម្ម កាអេស៊ុង (Kaesong) មានដំណើរការជាធម្មតាឡើងវិញ។ តំបន់ឧស្សាហកម្មនេះ ត្រូវបាន​ផ្អាកសកម្មភាពតាំងពីភាពតានតឺង បានកើនឡើងនៅក្នុងឧបទ្វីបកូរ៉េកន្លងមក។

ផ្លូវឆ្ពោះទៅកាន់តំបន់ឧស្សាហកម្ម កាអេស៊ុង។

ប្រសិនបើកូរ៉េខាងត្បូង ខ្វាយខ្វល់ពិតមែន ពីអនាគតរបស់ កាអេស៊ុងនោះ ប្រទេសនេះត្រូវចាត់វិធានការ ដើម្បីបញ្ឈប់​នូវ​រាល់សកម្មភាពអមិត្ត និងការបង្កហេតុតាមផ្លូវយោធា ដែលសុទ្ធសឹងជាមូលហេតុធ្វើឲ្យមានស្ថានភាពដូចសព្វថ្ងៃ។ នេះ​ជា​ការប្រកាសរបស់អ្នកនាំពាក្យ នៃគណកម្មាធិការការពារជាតិ ដែលជាសេនាធិការដ្ឋានដ៏សំខាន់មួយ របស់របប​កុម្មុយនីស និងដឹកនាំដោយអគ្គមគ្គុទេសវ័យក្មេង គីម ជុងអ៊ុន (Kim Jong-Un)។

ដកស្រង់សម្ដីដោយ ភ្នាក់ងារព័ត៌មានផ្លូវការរបស់របប (KCNA) អ្នកនាំពាក្យរូបនោះ បានបន្ថែមថា «បញ្ឈប់នូវកាយវិការ​ទាំងនេះ នឹងជាជំហានមួយ ដើម្បីបើកឡើងវិ នូវចរាចរណ៍ ខ្សែទំនាក់ទំនង និងដំណើរការជាធម្មតា សម្រាប់តំបន់​ឧស្សាហកម្ម កាអេស៊ុង»។

តាំងពីថ្ងៃទី៣ខែមេសាមក ប្រទេសកូរ៉េខាងជើង បានហាមពលរដ្ឋកូរ៉េខាងត្បូង មិនចូលទៅក្នុងតំបន់ឧស្សាហកម្មនេះ ដែលស្ថិតនៅក្នុងទឹកដីរបស់ខ្លួន ផ្នែកខាងត្បូង ចម្ងាយប្រមាណជា ១០គីឡូម៉េត្រពីព្រំដែន។ នៅថ្ងៃទី៨ខែមេសា បុគ្គលិក​កម្មករប្រមាណជាជាង៥៣ពាន់នាក់ ត្រូវបានដកចេញពីតំបន់នោះ ខណៈពេលដែលភាពតានតឹងបានកើនឡើងយ៉ាងខ្លាំង បណ្ដាលមកពីការគម្រាមនូវការវាយប្រហារនុយក្លេអ៊ែរ របស់ប្រទេសកូរ៉េខាងជើង ប្រឆាំងនឹងកូរ៉េខាងត្បូង និងសហរដ្ឋ​អាមេរិក សម្ព័ន្ធមិត្តរបស់ប្រទេសនេះ។

ដូចគ្នានេះដែរ កាលពីសប្ដាហ៍មុន ប្រទេសកូរ៉េខាងត្បូង ក៏បានដកបុគ្គលិកកម្មករជាជនជាតិខ្លួន ចំនួន៨៥០នាក់ ពីតំបន់​នោះដែរ។

តំបន់ឧស្សាហកម្ម កាអេស៊ុង ត្រូវបានបង្កើតឡើង នៅក្នុងរង្វង់នៃចំណងការទូត«កាំរស្មីព្រះអាទិត្យ» ដែលនាំមុខដោយ​ប្រទេសកូរ៉េខាងត្បូង រវាងពីឆ្នាំ១៩៩៨ មកដល់ឆ្នាំ២០០៨ ដើម្បីជម្រុញឲ្យមានកាន់តែខ្លាំងឡើង នូវទំនាក់ទំនង​រវាង​ប្រទេសបងប្អូនគូរសត្រូវទាំងពីរ ដែលនៅតែប្រឈមមុខដាក់គ្នាតាំងពី សង្គ្រាមកូរ៉េឆ្នាំ១៩៥០-១៩៥៣នោះមក។ ប្រទេស​ទាំងពីរមិនបានចុះកិច្ចព្រមព្រៀងសន្តិភាពអ្វីមួយ ដើម្បីបញ្ឈប់សង្គ្រាមនេះទេ តែនៅពេលនោះ គ្រាន់តែបានចុះសន្ធិសញ្ញា​ផ្អាកការឈប់បាញ់គ្នាប៉ុណ្ណោះ៕

-------------------------------------------------
ដោយ ៖ កេសរកូល - ភ្នំពេញ ថ្ងៃទី០៥ ខែឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ