សម រង្ស៊ី ហៅក្រុមក្លែងលិខិតលោក ថាជាជន«យ៉ាប់»
យ៉ាងហោចណាស់ មានលិខិតចំនួនពីរ ត្រូវបានប្រព័ន្ធផ្សព្វផ្សាយ ស្និតនឹងរដ្ឋាភិបាល និងគណបក្សប្រជាជនកម្ពុជា យកមកផ្សាយ ដោយសុទ្ធតែអះអាងថា លិខិតទាំងនោះ ជាលិខិតផ្ទៃក្នុង របស់គណបក្សសង្គ្រោះជាតិ ដែលចុះហត្ថលេខា ដោយលោក សម រង្ស៊ី អតីតប្រធានគណបក្សនេះ។ បន្ទាប់ពីត្រូវបានអ្នកនាំពាក្យគណបក្ស អះអាងជាផ្លូវការ ថាសុទ្ធសឹងជាលិខិតក្លែងក្លាយរួច លិខិតទាំងនោះ ក៏ត្រូវបានអតីតប្រធានគណបក្សសង្គ្រោះជាតិ លោក សម រង្ស៊ី ខ្លួនលោកផ្ទាល់ ច្រានចោលដូចគ្នា និងថែមទាំងបានហៅ ក្រុមអ្នកនៅពីក្រោយ លិខិតក្លែងក្លាយទាំងនោះ ថាជាក្រុមជនថោកទាប គ្មានយុទ្ធសាស្ត្រ និងមានលក្ខណៈ«យ៉ាប់ណាស់»។
លោក សម រង្ស៊ី បានប្រតិកម្មដូច្នេះ នៅក្នុងកិច្ចសម្ភាសមួយ ជាមួយវិទ្យុសម្លេងសហរដ្ឋអាមេរិក កាលពីយប់ថ្ងៃទី១៣ ខែកុម្ភៈកន្លងមក និងបានអំពាវនាវ ទៅឲ្យកាន់ពលរដ្ឋកម្ពុជា កុំឲ្យតម្លៃមនុស្ស ដែលប្រើ«ល្បិចថោកទាបបែបនេះ»។ [...]
