ប្រសិនជា ក្នុងអំឡុងបាល់ទាត់ពិភពលោក ក្នុងប្រទេសរ៉ុស្ស៊ី កីឡាករ ណីម៉ា (Neymar) កំពូលខ្សែប្រយុទ្ធជាតិប្រេស៊ីល របស់ក្រុមបាល់ទាត់ប៉ារីស (Paris Saint-Germain) បានរងការរិះគន់មិនឈប់មិនឈរ សព្វគ្រប់បែបយ៉ាងនោះ ឈុតឆាកថ្មីមួយនេះ ដែលកំពុងចែកចាយនៅពាសពេញបណ្ដាញសង្គម អាចនឹងធ្វើឲ្យរូបភាព នៃក្ដីស្រឡាញ់របស់កីឡាករដ៏ល្បី ងើបឡើងមកវិញ។

ឈុតឆាកនេះ កើតឡើងកាលពីល្ងាចម្សិលម៉ិញ នៅក្រោយជំនួបរវាងក្រុមបាល់ទាត់ នីម (Nîmes ភាគខាងត្បូងបារាំង) និងក្រុម ប៉ារីស ដែលលទ្ធផលបានផ្ដល់ជ័យជំនះ ឲ្យក្រុមប៉ារីស ក្នុងគ្រាប់បាល់បាល់ ៤-២។ នៅពេលដែលកីឡាករ ណីម៉ា ហៀបដើរចូលទៅក្នុងបន្ទប់កីឡាករវិញនោះ ស្រាប់តែកុមារម្នាក់ ដែលមានវ័យ ប្រមាណជា៧ទៅ៨ឆ្នាំ បានស្ទុះចូលទៅក្នុងទីលានប្រកួត ហើយរត់ទៅឱបកីឡាករ យ៉ាងណែនក្នុងដៃទាំងទ្វេរ។

កីឡាករ ណីម៉ា បានលើកកុមារពរឡើង ខណៈអ្នកគាំទ្រវ័យក្មេង បានបង្ហូទឹកភ្នែក យ៉ាងរញ្ជួយចិត្ត។ ក្នុងទិដ្ឋភាពបែបនេះ កំពូលកីឡាករខ្សែប្រយុទ្ធ របស់ក្រុមប៉ារីស បានបន្តឱបកុមារយ៉ាងយូរ នៅក្នុងដៃខ្លួន មុននឹងដោះអាវ ហុចទៅឲ្យកុមារ។ ឈុតឆាកបានបញ្ចប់ទៅ ដោយកីឡាករជាតិប្រេស៊ីល បានបីកុមារ មកឲ្យឪពុកម្ដាយកុមារ នៅកន្លែងទស្សនិកជនវិញ៕

Magnifique moment entre @neymarjr et un jeune supporter #NOPSG pic.twitter.com/UrgyCJ27Nv

— Paris Saint-Germain (@PSG_inside) 1 septembre 2018