រហូតមកដល់ពេលបច្ចុប្បន្ន នៅលើផ្លូវលេខ ៣៣៦ ស្ថិតក្នុងចំណុចផ្សារដើមគ នៅតែមាន ការកកស្ទះដដែល ថែមទាំង​មានអ្នកលក់ដូរ កាន់តែច្រើនជាងមុន ទៀតផង។ បើតាមការឲ្យដឹង ពីអាជីវករនៅលក់ដូរ ផ្ទាល់នៅតាមផ្លូវ ៣៣៦ នាថ្ងៃ​ទី០១ ខែឧសភានេះថា គាត់ពិតជាត្រូវបាន គេដេញចេញមែន កាលពីមុនចុលឆ្នាំ តែអ្នកលក់ទាំងនោះ គ្មានជម្រើស ក៏​ត្រឡប់មកលក់វិញ។ អ្នកខ្លះ បានរៀបរាប់ថា ពេលមកលក់លើកនេះ ដូចជាមកឲ្យលុយគេអញ្ចឹង មួយថ្ងៃ គាត់ត្រូវ​ចំណាយ ឲ្យសន្តិសុខផ្សារ ពី២០០០រៀល ទៅ៦០០០រៀល ទោះជាថ្ងៃខ្លះ លក់មិនដាច់ក៏ដោយ។

ផ្ទុយទៅវិញ សម្រាប់អ្នកដែលដើរផ្សារ ទិញឥវ៉ាន់ក្នុងផ្សារដើមគនេះ មិនបានខ្វល់ ពីភាពលំបាក របស់អ្នក​លក់ដូរ​ទាំង​នេះ​ទេ តែអ្នកទិញ បែរជារអ៊ូរទាំថា លក់ដូរគ្មានគិតទេ បណ្តោយផ្លូវ ក៏ចេះលក់ដែរ។ បើសូម្បីតែដើរ ក៏ដើរមិនរួចដែរ កុំថា​ឡើយ​ជិះម៉ូតូ ឬកង់ ព្រោះនៅលើផ្លូវទាំងមូល គ្មានកន្លែងទំនេរ។ អ្នកស្រី ផាត រដ្ឋា ដែលកំពុងដើរ ទិញឥវ៉ាន់ក្នុងផ្សារនេះ បានឲ្យទស្សនាវដ្តីមនោរម្យ.អាំងហ្វូដឹងថា គាត់ធ្លាប់បានលឺ ការអះអាង របស់លោកអភិបាល ខណ្ឌទួលគោក ជា​សារធារណៈ ថាគ្មានទៀតទេ នូវការកកស្ទះ។ តែថ្ងៃនេះ គាត់មកផ្សារ បណ្តើរម៉ូតូ ក៏មិនរួចផង។

ស្ត្រីមេផ្ទះខាងលើ បានបញ្ជាក់ថា បើអាជ្ញាធ្វើមិនបាន តាមពាក្យខ្លូនឯង ហេតុអ្វីចាំបាច់ ចុះផ្សាយតាមទូរទស្សន៍ ជា​សារធារណៈ ឲ្យពលរដ្ឋសប្បាយចិត្តធ្វើអ្វី ព្រោះគ្មានពលរដ្ឋណា ចង់បានពាក្យសម្តីកុហក របស់អាជ្ញាធរនោះទេ គឺចង់​បាន​តែ​ពាក្យពិតប៉ុណ្ណោះ។

តាមការឲ្យដឹង ពីអ្នកជិតខាង ដែលនៅម្តុំផ្សារនេះ បានឲ្យដឹងថា វាជាកាពិត ព្រោះមានការពិបាកដើរមែន នៅពេល​ចូល​ទិញ​ឥវ៉ាន់ម្តងៗ។ អ្នកទាំងនោះ បញ្ជាក់ថា បើព្រឹក កកកុញដោយសារអ្នកលក់ដូរ នៅតាមផ្លូវ ចំណែកឯពេលល្ងាច មិនសូវ​មានអ្នកលក់ដូរ បែរជាមានឡានដឹកបន្លែធំៗ ចូលតាមផ្លូវនេះទៅវិញ។ អ្នករស់នៅម្តុំនោះ បានឲ្យដឹងថា កាលពីមុន​ឡាន​ធំៗទាំងនោះ ធ្លាប់ចូលមកក្នុងផ្សារ បានចាប់ពីម៉ោង៨ យប់ទៅ ប៉ុណ្ណោះ តែពេលនេះមិនដឹងថា បានការអនុញ្ញាត ពីខាង​ណា​ទេ ទើបអាចចូលផ្សារបាន ទាំងថ្ងៃ ដោយមិនខ្វល់ពីអ្នកទិញឥវ៉ាន់ថា មានបញ្ហាកកស្ទះ ក្នុងផ្សារ និងការធ្វើ​ដំណើរ​ឡើយ។

ក្នុងពេលភ្លាមៗ បន្ទាប់ពីមានការមិនពេញចិត្ត ពីសំណាក់ប្រជាពលរដ្ឋទាំងនេះ ទស្សនាវដ្តី មិនអាចសុំការបំភ្លឺ ពីអាជ្ញាធរ​ក្នុងខណ្ឌនេះ បានទេ ដោយសារជាថ្ងៃឈប់សម្រាក។ ដោយឡែក ចំពោះឡានដឹកទំនិញ ធុនធ្ងន់ ដែលចូលមកក្នុង រាជធានី​ទាំថ្ងៃបែបនេះ ក៏មិនអាចសុំការបំភ្លឺ ពីម្ចាស់ឡាន ឬអ្នកពាក់ព័ន្ធបានដែរ៕