បក្សសង្គ្រោះជាតិ គ្រោង​កែ​ច្បាប់​កំណត់​ប្រាក់​ឈ្នួល​អប្បបរិមា ១៥០ដុល្លារ

ខណៈពេលមានការជួបជជែកគ្នា រវាងក្រសួងការងារ អង្គការអន្តរជាតិ នយោជក និងសហជីពកម្មករនានា ជុំ​វិញ​ការ​កំណត់​ប្រាក់បៀវត្សន៍អប្បបរិមា សម្រាប់កម្មករនោះ តំណាងរាស្ត្ររបស់គណបក្សសង្គ្រោះជាតិ បានចេញមកអះអាងថា ក្រុម​របស់​ខ្លួន​ក្នុង​រដ្ឋសភា នឹងគ្រោងធ្វើវិសោធនកម្មច្បាប់ការងារ ដើម្បីកំណត់ប្រាក់ឈ្នួលនេះ យ៉ាងតិចបំផុត១៥០ដុល្លារ ក្នុង​មួយ​ខែ។
Loading...
  • ដោយ: អ៊ុម វ៉ារី ដោយ អ៊ុម វ៉ារី (ទាក់ទង៖ [email protected]) - ភ្នំពេញ ថ្ងៃទី១៧ កញ្ញា ២០១៤
  • កែប្រែចុងក្រោយ: September 18, 2014
  • ប្រធានបទ: វិបត្តិកម្មករ
  • អត្ថបទ: មានបញ្ហា?
  • មតិ-យោបល់

ស្របពេលដែលបញ្ហាប្រាក់ឈ្នួល១៧៧ដុល្លានេះ កំពុងក្លាយជាប្រធានបទថ្មី សម្រាប់ក្រុមកម្មកនិយោជិត និង​និយោជក រួមទាំងភាគីរដ្ឋាភិបាលកំពុងប្រឈមមុខយក្យដាក់គ្នានោះ មន្រ្តីនៃគណបក្សសង្គ្រោះជាតិ (CNRP) បានប្រកាសជាផ្លូវការថា ក្រុមខ្លួននឹងធ្វើវិសោធនកម្មច្បាប់ការងារ កំណត់ប្រាក់បៀវត្សន៍​អប្បបរិមា​តិចបំផុត ត្រឹម១៥០ដុល្លារ សម្រាប់កម្មករ និយោជិកក្នុងវិស័យកាត់ដេរ។

អ្នកនាំពាក្យគណបក្សសង្គ្រោះជាតិ លោក យឹម សុវណ្ណ នៅចំពោះអ្នកសារព័ត៌មាន បានធ្វើការកត់​សម្គាល់​ថា បើធៀបទៅនឹងប្រទេសជិតខាងប្រាក់ខែកម្មករនៅកម្ពុជា ពិតជាមានកម្រិតទាបជាង ព្រោះតែបញ្ហា​ពុក​រលួយ បក្សពួកនិយម និងភាពទន់ខ្សោយនៃប្រព័ន្ធតុលាការ លើបុគ្គលមានអំណាចមួយចំនួន។

លោក សុវណ្ណ បានបន្តដូច្នេះថា៖ «គណបក្សសង្គ្រោះជាតិ នឹងធ្វើការតស៊ូមតិបន្តទៀត គឺពិនិត្យ ពិចារណា ទៅលើការធ្វើ វិសោធនកម្មច្បាប់ការងារ ដែលកំណត់ប្រាក់បៀវត្សរ៍អប្បបរិមាយ៉ាងតិច ១៥០ដុល្លារ។ ហើយ​ទន្ទឹមនឹងនេះ យើងនឹងជួយបរិយាកាសផ្នែកវិនិយោគទុន ធ្វើយ៉ាងណាទប់ស្កាត់អំពើពុករលួយ ពោល គឺ​ជំរុញ​ឲ្យមានការគោរពច្បាប់ ត្រឹមត្រូវ។»។

ការថ្លែងរបស់មន្ត្រីគណបក្សសង្គ្រោះជាតិ និងជាតំណាងរាស្ត្រខាងលើ បានធ្វើឡើងស្របពេល​ដែលថ្ងៃទី​១៧ ខែកញ្ញា នេះ ជាថ្ងៃបើកយុទ្ធនាការទាមទារប្រាក់ខែគោល ១៧៧ដុល្លារ របស់ក្រុមសហជីព និង​កម្មករ នៅ​តាម​បណ្តា​រោងចក្រនានា នៅទូទាំងប្រទេស។ ពួកគេបានធ្វើយុទ្ធនាការនេះ តែក្នុង​រយៈពេល​កន្លះ​ម៉ោង នា​ពេល​​សម្រាកអាហាថ្ងៃត្រង់ប៉ុណ្ណោះ។ ដោយឡែក តំណាងរបស់សហជីព ក៏កំពុងចូល​ជួប​ប្រជុំ​ជាមួយ រដ្ឋមន្រ្តី​ក្រសួងការងារ និងបណ្តុះបណ្តាលវិជ្ជាជីវៈ ដើម្បី​ដោះស្រាយពីបញ្ហា​ប្រាក់​​ឈ្នួល​១៧៧ដុល្លានេះ​ដែរ។

នៅឯខេត្តព្រៃវែងឯណោះវិញ ក្នុងថ្ងៃទី១៧ ខែកញ្ញានេះ បុគ្គលិកពីររូប នៃសម្ព័ន្ធសហជីពប្រជាធិបតេយ្យ​កម្មករ​កាត់ដេរកម្ពុជា ហៅកាត់ថា ស៊ីខៅឌូ (CCAWDU) លោក សុត សៀម និង លោក ឃុន សុខុម ត្រូវ​បាន​ក្រុម​អាជ្ញាធរធ្វើការឃាត់ខ្លួនបញ្ជូនទៅ សាលាស្រុកកំចាយមារ ស្របពេលដែលក្រុមខ្លួន និងកម្មករ​ផ្សេង​ទៀត​​កំពុង​ធ្វើកូដកម្ម។

ចំពោះការលើកឡើងរបស់គណបក្សសង្គ្រោះជាតិខាងលើ នៅមិនទាន់ឃើញប្រតិកម្មតប ពីខាង​រដ្ឋាភិបាល ឬពីខាងនយោជកនៅឡើយ រហូតមកដល់រសៀលថ្ងៃដដែលនេះ។

សូមបញ្ជាក់ដែរថា តំណាងសហជីពបានប្រកាសថា នឹងអាចទទួលយកបាន ល្គឹកណាកម្មករកាត់ដេរ​ទាំង​អស់ មានប្រាក់ខែយ៉ាងហោចណាស់ ត្រឹម១៥០ដុល្លារ។ ឯភាគីនិយោជក អាចបន្ថែមត្រឹមតែ១០ ទៅ ១៥​ដុល្លារ លើប្រាក់ឈ្នួលបច្ចុប្បន្ន១០០ដុល្លារ ក្នុងមួយខែប៉ុណ្ណោះ។ គាំទ្រនឹងការលើកឡើង របស់និយោជក ក្រសួងការងារប្រកាសថា ប្រាក់ឈ្នួលប្រចាំខែនោះ អាចដំឡើងបានត្រឹមតែ១១០ ដុល្លារ។

តែយ៉ាងណាក៏ដោយ ទាំងអង្គការសង្គមស៊ីវិល ទាំងសហជីព ទាំងក្រសូងស្ថាប័នពាក់ព័ន្ធ បានសម្ដែងក្ដី​សង្ឃឹមថា នាខែតុលាខាងមុខនេះ ប្រាក់ឈ្នួលអប្បបរមា របស់កម្មករក្នុងវិស័យឧស្សាហកម្មវាយនភ័ណ្ឌ នឹងត្រូវបានកំណត់ ឲ្យចេញរូបរាងជាផ្លូវការ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...