នៅក្នុងការប្រកួតបើកឆាកដំបូង រវាងក្រុមបាល់ទាត់ជម្រើសជាតិ ប្រេស៊ីល និងក្រូអាស៊ី នៅក្នុងការប្រកួតដណ្ដើម​ពានរង្វាន់ពិភពលោក ឆ្នាំ២០១៤នេះ កីឡាករដែលរកគ្រាប់បាល់ឲ្យប្រទេសម្ចាស់ផ្ទះ ជាកីឡាករវ័យក្មេងមួយរូប ឈ្មោះ ណីម៉ា (Neymar) ដែលកំពុងរះយ៉ាងចែងចាំង នៅក្នុងក្រុមបាល់ទាត់អាជីព បាសឺឡូណា (Barcelona) របស់​ប្រទេស​អេស្ប៉ាញ។

កីឡាករ ណីម៉ា ទូលបាល់នៅលើក្បាល។ (រូបថត fifa)

បាល់ទាត់ពិភពលោក - ការប្រកួតបាល់ទាត់បើកឆាកនេះ ត្រូវបានកត់សម្គាល់ដោយ ការទាត់ចូលទីប្រេស៊ីលខ្លួនឯង​របស់​កីឡាករ ម៉ាសឺឡូ (Marcelo)  ដែលទាត់ឲ្យក្រុមបាល់ទាត់អាជីព រៀលម៉ាឌ្រីត (Real Madrid) របស់ប្រទេស​អេស្ប៉ាញ។ ការទាត់ចូល​ទីខ្លួនឯង របស់កីឡាកររូបនេះ មិនត្រឹមតែនាំពិន្ទុឲ្យក្រូអាស៊ី បានមួយពិន្ទុមុនប៉ុណ្ណោះទេ តែ​ក៏​បានចូលមកបំបែក​ឯកត្តកម្មឲ្យប្រទេសប្រេស៊ីល ដែលល្បីខាងកីឡាបាល់ទាត់នេះដែរ ព្រោះនៅក្នុងប្រវត្តិ​បាល់​ទាត់​ប្រេស៊ីល មិនដែល​មានកីឡាករណាម្នាក់ ទាត់ចូលទីខ្លួនឯងនោះទេ។

ប៉ុន្តែមិនជាបញ្ហាទេ ព្រោះប្រទេសល្បីខាងបាល់ទាត់ ដូចជាប្រេស៊ីល មិនខ្វះកីឡាករល្អៗ ជំនាញខាងទាត់បាល់ត្រង់​ដូចបន្ទាត់នោះឡើយ។ កីឡាករ ណីម៉ា អាយុ២២ឆ្នាំ ដែលកំពុងទាត់ឲ្យក្រុមបាល់ទាត់អាជីព បាសឺឡូណា បានជួយ​សង្គ្រោះក្រុមជម្រើសជាតិរបស់ខ្លួន ដល់ទៅពីរគ្រាប់។ ក្នុងនោះមួយគ្រាប់ ត្រូវបានកីឡាករវ័យក្មេងរូបនេះ ទាត់ពី​ចំងាយ​ប្រមាណ​ជា២០ម៉ែត្រ រាបទាបផ្ទាល់ដី បង្កការលំបាកដល់អ្នកចាំទីរបស់ក្រុមជម្រើសជាតិ ក្រូអាស៊ី លោតទៅ​ចាប់​ទាំងប្រហោងធ្លុង នៅក្នុងពាក់កណ្ដាលម៉ោងដំបូង។

បាល់មួយគ្រាប់ទៀត ជាបាល់ពិន័យ១១ម៉ែត្រ បន្ទាប់ពីអាជ្ញាកណ្ដាលមើលឃើញថា កីឡាករខ្សែការពាររបស់ ក្រូអាស៊ី បានប្រព្រឹត្តិកំហុសទៅលើកីឡាករខ្សែប្រយុទ្ធ របស់ប្រេស៊ីល។ ប៉ុន្តែបាល់ពិន័យនេះ ទោះជា ណីម៉ា បាន​ទាត់បញ្ចូលទី​ក៏ពិតមែន តែអ្នកចាំទីរបស់ ក្រូអាស៊ី ក៏មិនឲ្យបាល់នេះអាចចូលបានដោយស្រួលដែរ ព្រោះវានៅ​ខ្វះ​កម្លាំងតែបន្ដិចប៉ុណ្ណោះ បាល់ពិន័យនេះ នឹងត្រូវបានអ្នកចាំទី ក្រូអាត ចាប់បាន។

លទ្ធផលចុងបញ្ចប់នៃការប្រកួតបើកឆាកនេះ បើទោះជាប្រេស៊ីល បំបាក់ ក្រូអាស៊ី ៣ ទល់នឹង ១ ក៏ពិតមែន ប៉ុន្តែ​មិន​មែន ក្រូអាស៊ី អន់ដល់ថ្នាក់ហៅមិនលឺនោះទេ។ ផ្ទុយទៅវិញ បាល់ពិន័យ១១ម៉ែត្រ ដែលអាជ្ញាកណ្ដាល​មើល​ឃើញថា ជាកំហុសរបស់កីឡាករ ក្រូអាស៊ី នោះ កំពុងត្រូវបានអ្នកជំនាញខាងបាល់ទាត់ រិះគន់ថា ជាការផាក​ពិន័យ​ដែល​លំអៀង ទៅរកប្រេស៊ីល ឬអាចនិយាយបានទៀតថា ភ្នែកអាជ្ញាកណ្ដាលជនជាតិជប៉ុនរូបនេះ មានបញ្ហា៕

សូមទស្សនាវីដេអូ សង្ខេបពីការប្រកួតឡើងវិញ៖