ប្រជាពលរដ្ឋចំនួន២៥០គ្រួសារ រស់នៅក្នុងភូមិចំនួនបី ស្ថិតនៅក្នុងឃុំតាំងសំរោង ស្រុកភ្នំស្រួច ខេត្តកំពង់ស្ពឺ ដែល​មានទំនាស់ដីធ្លីដ៏រ៉ាំរ៉ៃ ជាមួយក្រុមហ៊ុន ម៉ាស្ទ័រអ៊ិនធឺណាសិនណល ខបភើរេសិនគ្រូប ដែលជាសាច់ញាតិ​អតីត​អភិបាល​ខេត្ត បានដាក់ពាក្យស្វែងរកការអន្តរាគមន៍ អំពីសំណាក់អង្គការក្រៅរដ្ឋាភិបាល ឲ្យជួយស្វែងរកដំណោះ​ស្រាយ បន្ទាប់ពីអាជ្ញាធររបស់រដ្ឋាភិបាល បានបដិសេធពុំដោះស្រាយ។

រូបបង្ហាញពីទេសភាពរបស់ស្រុកស្រែរបស់ប្រទេសកម្ពុជា នាពេលរសៀល។ (រូបភាពឯកសារ)

ដីធ្លី - អ្នកស្រី សៅ ពុំ តំណាងប្រជាពលរដ្ឋ រស់នៅក្នុងភូមិតាំងសំរោងបានថ្លែងឲ្យដឹងថា ពលរដ្ឋចំនួនបីភូមិដូចជា​ភូមិតាំងសំរោង ភូមិក្រាំងបឹង និងភូមិខ្នងក្រាំង ដែលមានចំនួន ២៥០ គ្រួសារ បានធ្វើស្រែចំការនៅលើដីរបស់​ខ្លួន​ចំនួន ៩៥០ ហិកតាតាំងពីឆ្នាំ ១៩៨៥។ ប៉ុន្តែនៅក្នុងឆ្នាំ ២០០៧ លោក កង ហ៊ាង ដែលជាអភិបាលខេត្តបានផ្តល់ដី សម្បទានសេដ្ឋកិច្ចខ្នាតតូច លើដីរបស់ពួកអ្នកស្រីចំនួន ៩១០ ហិកតា ឲ្យទៅក្រុមហ៊ុន ម៉ាស្ទ័រអ៊ិនធឺណាសិនណល ខបភើរេសិនគ្រូប ដែលជាក្រុមហ៊ុនកូនប្រុសរបស់គាត់។

អ្នកស្រីបានរៀបរាប់ថា៖ «ពួកយើងបានប្តឹងគ្រប់ស្ថាប័នរដ្ឋាភិបាល ប៉ុន្តែគេមិនដោះស្រាយ រហូតដល់អភិបាលខេត្ត​ឡើងថ្មី គាត់និយាយថា ដីជម្លោះជាមួយលោក កង ហ៊ាង ទុកឲ្យលោក កង ហ៊ាង ជាអ្នកដោះស្រាយ តើឲ្យពួកយើង​ស្វែងរកដំណោះស្រាយ តាមវិធីណា? ជម្រើសចុងក្រោយ គឺមានតែពឹងអង្គការក្រៅរដ្ឋាភិបាល ឲ្យជួយដឹងលឺ។»។

អ្នកស្រីបានថ្លែងឲ្យដឹងទៀតថា ពលរដ្ឋបានឈប់ធ្វើស្រែនៅលើដីនោះ តាំងពីឆ្នាំ ២០១១ ដោយសារតែធ្វើស្រែ​ហើយ​ខាងក្រុមហ៊ុន គេឈូសស្រូវទុំចោល និងហាមមិនឲ្យពលរដ្ឋចូលទៅប្រមូលផល ប៉ុន្តែឆ្នាំនេះ ពលរដ្ឋ​បានសម្រេចចិត្ត​ហើយថា ត្រូវតែចូលទៅធ្វើស្រែនៅក្នុងនោះ។ អ្នកស្រីបានថ្លែងឲ្យដឹងទៀតថា៖ «យើងទ្រាំយូរហើយ ម្តងនេះទោះបី​ជា​កើត​ស្អីក៏ដោយ ត្រូវតែប្រឈមមុខដាក់គ្នា នេះគឺជាដីយើង ហេតុអីបានជាយកទៅឲ្យក្រុមហ៊ុន ហើយនេះជា​កំហុស​របស់រដ្ឋាភិបាល យើងធ្វើស្រែជាង៣០ឆ្នាំ មិនធ្វើប័ណ្ណកម្មសិទ្ធិឲ្យទេ ប៉ុន្តែអាប័ណ្ណបោះឆ្នោត​ហ្នឹងធ្វើឲ្យលឿន​ណាស់»។

អស់ជំនឿលើអាជ្ញាធរ និងចាញ់បោកក្រុមយុវជនស្ម័គ្រចិត្ត ...

អ្នកស្រី សៅ យុយ អាយុ ៦៤ ឆ្នាំ បានថ្លែងឲ្យដឹងថា ប្រជាពលរដ្ឋអស់ជំនឿទៅលើអាជ្ញាធរ ពីព្រោះបានរងចាំអស់​រយៈពេលជាច្រើនឆ្នាំមកហើយ ហើយថែមទាំងចាញ់បោកក្រុមយុវជនស្ម័គ្រចិត្តទៀត។ គេថាគេវាស់ដីឲ្យ បន្ទាប់​ពី​បោះឆ្នោតហើយ ប្រសិនបើពលរដ្ឋបោះឆ្នោត ឲ្យគណបក្សប្រជាជនកម្ពុជា ប៉ុន្តែរហូតមកដល់ពេលនេះ ពុំឃើញមុខ​ពួកគេទេ។ អ្នកស្រីបានថ្លែងឲ្យដឹងទៀតថា៖ «ពួកយើងបានធ្វើអស់ហើយ ដូច្នេះម្តងនេះយើងធ្វើតាមវិធីរបស់យើង​វិញ»។

អ្នកស្រីបានថ្លែងឲ្យដឹងទៀតថា នៅក្នុងជម្លោះដីធ្លីនេះកាលពីឆ្នាំ ២០១១ នៅពេលដែលពលរដ្ឋនាំគ្នាតវ៉ា ការចូល​ឈូសឆាយរបស់ក្រុមហ៊ុន បានបណ្តាលឲ្យស្រ្តី២នាក់រលួតកូន និងពលរដ្ឋចំនួន ៣៥នាក់បានរងរបួស។ អ្នកស្រី​បានថ្លែងឲ្យដឹងថា៖ «អាជ្ញាធរបានផ្តល់ដីសម្បទាន ឲ្យទៅក្រុមហ៊ុននោះ ទាំងបិទភ្នែកដោយមិនដឹងថា ដីនោះ គឺជា​ដីរបស់កសិករធ្វើស្រែរាល់ឆ្នាំ អាជ្ញាធរជាអ្នកបង្កើតជម្លោះ»។

យោងតាមឯកសារ ដែលចុះហត្ថលេខាដោយលោក ច័ន្ទ សារុន អតីតរដ្ឋមន្ត្រីក្រសួងកសិកម្ម រុក្ខាប្រមាញ់ និង​នេសាទ នៅក្នុងឆ្នាំ ២០០៩ បានឯកភាពតាមសំណើរ របស់អភិបាលខេត្តកំពង់ស្ពឺ ក្នុងការផ្តល់សិទ្ធិឲ្យក្រុមហ៊ុន ម៉ាស្ទ័រអ៊ិនធឺណាសិនណល ខបភើរេសិនគ្រូប ធ្វើការវិនិយោគដាំដើមអាកាស្យា ប្រេងខ្យល់ ដំឡូងមី និងស្វាយចន្ទី លើផ្ទៃដីចំនួន ៩១០ ហិកតា។

ក្រុមអាឡេអាឡឺ ...

លោក កង ហ៊ាង អតីតអភិបាលខេត្តកំពង់ស្ពឺ បានថ្លែងឲ្យដឹងថា រាល់កាធ្វើវិនិយោគ គឺធ្វើទៅតាមច្បាប់ ហើយលោក​ក៏ពុំមែនជាអ្នកអនុម័ត ឲ្យក្រុមហ៊ុនតែម្នាក់ឯងនោះដែរ គឺត្រូវឆ្លងកាត់គណកម្មាធិការអន្តរក្រសួង៣ទៅ៤លើក ទើប​យល់ព្រមឲ្យទៅក្រុមហ៊ុនវិនិយោគ។ លោកបានថ្លែងឲ្យដឹងថា៖ «យើងពុំដែលយកដីរបស់ប្រជាជន ទៅឲ្យក្រុមហ៊ុន​នោះទេ ដីនោះគឺជាដីសាធារណៈរបស់រដ្ឋ ចុះបើដីគាត់មែនម៉េចយូរហើយមិនប្តឹង? មិនដឹងជាក្រុមអាឡេអាឡឺ មកពី​ណា។ កូនប្រុសខ្ញុំគ្មានពាក់ព័ន្ធក្នុងដីនោះទេ។»។

លោក ចាន់ សុវ៉េត មន្ត្រីស៊ើបអង្កេតជាន់ខ្ពស់ សមាគមការពារសិទ្ធិមនុស្សអាដហុក បានថ្លែងឲ្យដឹងថា ពលរដ្ឋដែល​ដាក់ពាក្យមកស្វែង រកពីអន្តរាគមន៍ពីអង្គការក្រៅរដ្ឋាភិបាល ដោយសារតែគាត់បានព្យាយាមស្វែងរកការអន្តរាគមន៍ ពីអាជ្ញាធរច្រើនលើកច្រើនសារមកហើយ ប៉ុន្តែអាជ្ញាធរពុំបានយកចិត្តទុកដាក់ក្នុងរឿងរបស់គាត់ ហើយថែមទាំង​ចោទពលរដ្ឋថា ជាជនអនាធិបតេយ្យទៀត។ លោកបានថ្លែងបញ្ជាក់ថា ៖ «រឿងនេះអាជ្ញាធរត្រូវធ្វើការស៊ើប​អង្កេត​ឲ្យបានច្បាស់ ដើម្បីផ្តល់យុត្តិធម៌ដល់ពួកគាត់ ដែលបានរស់នៅតាំងពីឆ្នាំ ១៩៨៥មកនោះ ប៉ុន្តែរឿងនេះ វា​អយុត្តិធម៌​ណាស់ ដែលអាជ្ញាធរចោទពួកគាត់ថា ជាក្រុមអានាធិបតេយ្យនោះ។ ដូច្នេះ តើឲ្យស្វែងរកដំណោះស្រាយ​យ៉ាងម៉េច​កើត?»៕