ក្លិបទូកក្តោង អេវើតុន (Everton) បានចាប់ផ្តើមពិគ្រោះយោបល់ជាមួយនឹងអ្នកគាំទ្រទាំងអស់ ដូចអ្វីដែលក្លិបធ្លាប់បាន​សន្យា ដើម្បីរួមគ្នារចនាឡើងវិញ នូវស្លាកសញ្ញាថ្មីរបស់ពួកគេនៅរដូវកាលក្រោយ។

រូបសញ្ញាចាស់របស់ក្រុម អេវើតុន ដែលបិតជាប់នឹងរថយន្ដ។ (រូបថត actusports.fr)

កាលពីដើមរដូវកាលនេះ ក្លិបក៏បានធ្វើការសុំទោសដល់អ្នកគាំទ្រទាំងអស់ បន្ទាប់ពីអ្នកគាំទ្រភាគច្រើន មានការមិន​ពេញ​ចិត្តចំពោះការរចនាស្លាកសញ្ញាថ្មីនៅរដូវកាល ២០១៣/១៤ ហើយការរចនានោះត្រូវបានធ្វើឡើង ដោយមានអ្នកគាំទ្រ​ប្រមាណ ២ម៉ឺន២ពាន់នាក់ប៉ុណ្ណោះ ដែលបានផ្តល់ជាមតិយោបល់ចួលរួម។

ក្លិបអេវើតុន នឹងធ្វើការកែប្រែស្លាកសញ្ញាជាថ្មីម្តងទៀត នៅរដូវកាលក្រោយ ដែលជាការកែប្រែលើកទី១១ នៅក្នុង​ប្រវត្តិ​សាស្ត្ររបស់ក្លិប។ ហើយពួកគេនឹងផ្តល់សិទ្ធដល់អ្នកគាំទ្រទាំងអស់ មានសិទ្ធផ្តល់ជាមតិយោបល់ និងចូលរួមក្នុង​ការ​បោះ​ឆ្នោតសម្រេចយក១ណា ដែលខ្លួនស្រលាញ់ពេញចិត្ត។

ក្លិបនឹងអញ្ជើញ​អ្នកគាំទ្រទាំងអស់ នៅជុំវិញពិភពលោក ដើម្បីឲ្យចោទជាសំនួរតាមរយះប្រព័ន្ធអនឡាញ និងឲ្យចូលរួម​ផ្តល់ជាមតិក្នុងការរចនាជាក្រុមៗ។ ចំពោះស្លាកសញ្ញាដែលនឹងសម្រេចយកនៅវគ្គផ្តាច់ព្រ័ត្រ ធ្វើឡើងតាម​រយះការ​បោះ​ឆ្នោតនៅលើគេហទំព័ររបស់ក្លិប។

នាយកផ្នែកទំនាក់ទំនងរបស់ក្លិប លោកអាឡែន ម៉ាយើស៏ (Alan Myers) បាននិយាយថា៖ «ស្លាកសញ្ញានៅរដូវកាល ២០១៤/១៥ នឹងក្លាយជាស្លាកសញ្ញាសម្រាប់អ្នកគាំទ្រទាំងអស់គ្នា ហើយវានឹងគ្មានកំហុសឆ្គងទៀតនោះទេ។»

គាត់បានបន្តថា៖ «អ្វីទាំងអស់ដែលខ្ញុំបានចោទជាសំនួរឡើង ខ្ញុំចង់ឲ្យអ្នកគាំទ្រទាំងអស់ មានការជឿជាក់លើខ្ញុំ ឲ្យ​សក្ដិ​សមជាប្រិយមិត្តក្រុមអេវើតុន ហើយក្លិបនឹងផ្តល់ជូនឲ្យសមស្របបំផុត សម្រាប់អ្នកទាំងអស់គ្នាវិញ។»

លោក ម៉ាយើស៏ បានបន្ថែមថា៖ «គ្រប់អ្នកគាំទ្រឯកជន (ម្នាក់ៗ) ទាំងអស់ ប្រហែលជាមិនអាចពេញចិត្តគ្រប់ៗគ្នានោះទេ ប៉ុន្តែយ៉ាងហោចណាស់ពួកគេមានឱកាស ក្នុងការបញ្ចេញមតិ និងបោះឆ្នោត ដើម្បីយកស្លាកសញ្ញាដែលល្អ​ឥតខ្ចោះ​សម្រាប់​ក្រុមទាំងអស់គ្នា៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៧ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ