មេដឹកនាំកូរ៉េខាងជើង លោក គីម ជុង-អ៊ុន (Kim Jong-Un) បានបោះជំហាន ចូលក្នុង «បេសកកម្មអត្តឃាត» មួយ។ នេះ ជាប្រសាសន៍ខ្លាំងៗ របស់លោក ដូណាល់ ត្រាំ (Donald Trump) ប្រធានាធិបតីអាមេរិក នៅចំពោះអង្គមហាសន្និបាត អង្គការសហប្រជាជាតិ ក្នុងថ្ងៃអង្គារទី១៩ ខែកញ្ញានេះ។ លោក ត្រាំ បានហៅលោក គីម ជុង-អ៊ុន ជាថ្មី នៅក្នុងការថ្លែងរបស់លោកថា ជា«បុរសគ្រាប់ផ្លោង»។

លោក ត្រាំ បានថ្លែងឡើងថា៖ «បណ្ដារដ្ឋ"យូកូង" គឺជាការគម្រាមមួយ សម្រាប់"ប្រជាជាតិផ្សេងទៀត និងប្រជាជនរបស់ពួកគេ"»។ 

មហាសន្និបាត របស់អង្គការសហប្រជាជាតិ កំពុងប្រព្រឹត្តិទៅ ចាប់ពីថ្ងៃអង្គារនេះ ក្នុងទីក្រុងញ៉ូយក។ ប៉ុន្តែមហាសន្និបាតនេះ ត្រូវបានគេមើលឃើញថា បានធ្វើឡើងស្របពេលនឹងបរិយាកាស នៃការគម្រាមកំហែង ផ្នែកអាវុធនុយក្លេអ៊ែរ​ របស់ប្រទេសកូរ៉េខាងជើង និងជោគវាសនា នៃកិច្ចព្រមព្រៀង​មិនរីកសាយ​អាវុធប្រល័យលោក ជាមួយនឹងប្រទេស អៀរ៉ង់។

ក្នុងការថ្លែងរបស់លោក ជាលើកដំបូង នៅក្នុងមហាសន្និបាតនេះ ប្រធានាធិបតីអាមេរិក ថែមទាំងបានព្រមានទៅកាន់ «បច្ចាមិត្រ» ផ្សេងទៀត របស់សហរដ្ឋអាមេរិកថា កងទ័ពអាមេរិក នឹងក្លាយខ្លួន ក្នុងពេលខាងមុខនេះ ជាកម្លាំងដ៏ខ្លាំងបំផុត មិនដែលធ្លាប់មានពីមុនមក។

លោក ត្រាំ បញ្ចាក់ថា៖ «សហរដ្ឋអាមេរិក មានកម្លាំងសព្វគ្រប់បែបយ៉ាង និងមានការអត់ធ្មត់ជាទីបំផុត។ តែបើគេរុញសហរដ្ឋអាមេរិក ឲ្យចាំបាច់ធ្វើការការពារខ្លួន និងសម្ព័ន្ធមិត្តរបស់ខ្លួននោះ យើងនឹងមិនមានជម្រើសអ្វី ក្រៅពីកំទេចប្រទេសកូរ៉េខាងជើង ទាំងមូល។»៕

Pres. Trump: If the US must defend itself or its allies, “we will have no choice but to totally destroy North Korea” https://t.co/BgSUML4in6 pic.twitter.com/oHlSgHuawv

— CNN (@CNN) 19 septembre 2017