កីឡាករប្រដាល់មិនដែលចាញ់របស់អាមេរិក ហ្វឡយ ម៉ាយវេដឺ (Floyd Mayweather) បានស្ថិត​នៅកំពូលតារាងបញ្ជី​ឈ្មោះកីឡាករអាជីព ដែលរកចំណូលបានខ្ពស់ជាងគេប្រចាំឆ្នាំ ជាលើកទី២របស់គាត់, នេះបើតាមការចេញផ្សាយ របស់​ទស្សនាវដ្តីបរទេសមួយ កាលពីថ្ងៃពុធ។

កីឡាករប្រដាល់ ហ្វឡយ ម៉ាយវេដឺ របស់អាមេរិក។

ម៉ាយវេដឺ មានកំណត់ត្រាដ៏អស្ចារ្យមួយ ពោលគឺវ៉ៃ៤៤លើក ឈ្នះទាំង៤៤លើក គ្មានស្មើ និងគ្មានចាញ់។ ការប្រកួតចុង​ក្រោយរបស់គាត់ បានយកឈ្នះពិន្ទុទៅលើអ្នកប្រដាល់ រ៉ូបឺត ក្វឺរ៉េរ៉ូ (Robert Guerrero) កាលពីថ្ងៃទី០៤ ខែឧសភា​កន្លង​ទៅ។

ចំណូលរបស់គាត់មួយភាគធំ បានមកពីការចុះកិច្ចសន្យា ជាមួយនឹងស្ថានីយទូរទស្សន៏ ដែលទិញសិទ្ធផ្សាយបន្តផ្ទាល់ ដែលមានតម្លៃប្រមាណជា៣២លានដុល្លា ក្នុងមួយប្រកួត។

ក្នុងឆ្នាំ២០១៣នេះ ម៉ាយវេដឺទទួលបានចំណូលសរុបប្រមាណជា៩០លានដុល្លា ហើយជាចំណូលមួយខ្ពស់ដាច់គេ ក្នុង​ចំណោមកីឡាករអាជីពទាំង៥០នាក់ ដែលស្ថិតក្នុងតារាងចំណាត់ថ្នាក់រកចំណូលបានច្រើនជាងគេ។

កីឡាករវាយកូនហ្គោល ថៃកឺ វូដ (Tiger Woods) ដែលធ្លាប់តែឈរនៅចំណាត់ថ្នាក់លេខ១ជារៀងរាល់ឆ្នាំចាប់ពីឆ្នាំ២០០៤ ដល់ឆ្នាំ២០១១នោះ បានធ្លាក់ដល់ចំណាត់ថ្នាក់លេខ៥ ហើយឆ្នាំនេះគាត់ទទួលចំណូល បានត្រឹមតែ៤០.៨លាន​ដុល្លា​ប៉ុណ្ណោះ។

កីឡាករបាល់បោះ ឡេប្រន់ ជេមស៏ (LeBron James) របស់ក្រុមម៉ៃមី ហៀដ (Miami Heat) ដែលបច្ចុប្បន្នជាកីឡាករ​ដែល​មានតម្លៃខ្លួនថ្លៃជាងគេបង្អស់ក្នុងលីកបាល់បោះអ៊ិនប៊ីអេ (NBA) នោះ ស្ថិតនៅចំណាត់ថ្នាក់លេខ២ ហើយគាត់រក​ចំណូល​បាន៥៦.៥លានដុល្លា។

ជេមស៏ បានក្លាយជាកីឡាករបាល់បោះដំបូងគេ ដែលបានទទួលចំណាត់ថ្នាក់កំពូលទាំង២ (កីឡាករដែលរកចំណូល​បាន​ច្រើនជាងគេ) ចាប់តាំងពីអតីតកីឡាករបាល់បោះជើងចាស់ ស្សាឃ្វីល អូនែល (Shaquille O'Neal) ធ្លាប់ទទួលបាន​ចំណាត់ថ្នាក់នេះម្តង កាលពីឆ្នាំ២០០៤។

ចំណែកឯចំណាត់ថ្នាក់លេខ៣ បានទៅលើកីឡាករបាល់ឱប ឌ្រូ ប្រីស (Drew Brees) ដែលលេងឲ្យក្រុម ញ៉ូអូឡៀន ហ្សិន (New Orleans Saints)។ ហើយក្នុងឆ្នាំ២០១៣នេះ គាត់មានចំណូលប្រមាណជា៣៧លានដុល្លាសហរដ្ឋអាមេរិក៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៦ ខែឧសភា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ