បើទោះជាលោកបានច្រានចោល ថា«បទបញ្ជាសម្ងាត់»នោះ មិនមែនលោកជាអ្នកសរសេរក៏ដោយ តែនាយក​រដ្ឋមន្ត្រីបីទសវត្សន៍ជាង របស់កម្ពុជា បាន​ទទួលស្គាល់ នៅល្ងាចថ្ងៃនេះថា សំណេរនោះមានលក្ខណៈ «ត្រូវ​ចិត្ត»​លោក ហើយលោកក៏នឹងបញ្ជាទ័ព ឲ្យធ្វើដូច្នេះដែរ ប្រសិនណាជាលោក សម រង្ស៊ី វិលត្រឡប់​ចូលស្រុក​វិញ​នោះ។ លោក ហ៊ុន សែន នាយករដ្ឋមន្ត្រី-ប្រធានគណបក្សប្រជាជនកម្ពុជា បានថ្លែងខ្លាំងៗ តបទៅលោក សម រង្ស៊ី មេដឹកនាំ​ប្រឆាំង​ថា៖ «ខ្ញុំបញ្ជាក់ហើយ ស្តាប់ឲ្យច្បាស់ បើចូលត្រូវតែចាប់វៃខ្នោះ ដល់ក្នុងយន្តហោះ ហើយ​បញ្ជូន​ទៅគុកតែម្តង កុំព្រហើន អាល្ងង់»។

ប្រតិកម្មរបស់បុរសខ្លាំងកម្ពុជា បានធ្វើឡើងនៅល្ងាចនេះ ជាមួយនឹងសារព័ត៌មានក្នុងស្រុកមួយ នៅបន្ទាប់ពី​ការ​បង្ហោះ អត្ថបទ«ខ្លី» មួយកាលពីយប់​ម្សិលម៉ិញ នៅលើទំព័រហ្វេសប៊ុករបស់លោក សម រង្ស៊ី ដោយទំព័រ​ហ្វេសប៊ុក​នោះ បានហៅអត្ថបទនេះ ថាជា«បទបញ្ជាសម្ងាត់»របស់លោក ហ៊ុន សែន សរសេរទៅកាន់ «មេ​បញ្ជា​ការ​​កងកម្លាំង​ប្រដាប់អាវុធ» សម្រាប់អនុវត្តឲ្យចាប់ខ្លួនលោក សម រង្ស៊ី នៅពេលដែលអតីត​ប្រធាន​គណបក្ស​​សង្គ្រោះ​​ជាតិ​​រូបនេះ ត្រឡ​ប់វិលចូល មកក្នុងប្រទេសកម្ពុជាវិញ។

» អត្ថបទដែលទាក់ទង៖ សម រង្ស៊ី ទម្លាយ​«សារ ហ៊ុន សែន គ្រោង​ផ្ទុះ​អាវុធ​ពេល​លោក​វិល​ចូល​ស្រុក»

កម្ទេច... និងប្ដូរទិសយន្ដហោះ...

អត្ថបទនោះ ថែមទាំងបានសរសេរ ពីការបញ្ជា ឲ្យ«កម្ទេចចោល នូវកម្លាំងណាក៏ដោយ ដែលរារាំង​ការ​អនុវត្តន៍​ច្បាប់» និងប្រាប់​ឲ្យយន្ដហោះ ត្រូវប្ដូរ​ទិសហោះហើរ ដើម្បីអាចឲ្យកងកម្លាំងទាំងនោះ ចូលទៅចាប់ខ្លួនលោក សម រង្ស៊ី នៅ​ក្នុងយន្ដហោះតែម្ដង។ លោក សម រង្ស៊ី ដែលត្រូវ​បាន​​រដ្ឋាភិបាល​កម្ពុជា លើកលែង​ការរារាំង​ ការ​ធ្វើ​ដំណើរ​​ត្រឡប់​​ចូល​ស្រុកខ្មែរ​វិញ ខណៈលោកនៅតែត្រូវបានតុលាការកម្ពុជា កាត់ទោសឲ្យជាប់ពន្ធនាគារ​ជាច្រើន​ឆ្នាំដដែល។

អត្ថបទ«បទបញ្ជាសម្ងាត់» ដែល​បង្ហោះលើ​ហ្វេសប៊ុក​លោក សម រង្ស៊ី បានសរសេរថា៖ «សម រង្ស៊ី នៅតែ​ជា​អ្នក​មានទោស ដែលកម្លាំង​អនុវត្តច្បាប់ ត្រូវតែអនុវត្តតាម​សាល​ដីកា​តុលាការ ចាប់វាញាត់គុក​ឲ្យខាងតែបាន ទោះ​ដោយ​​​តម្លៃណា​ក៏ដោយ មិនអាចឲ្យអាមួយនេះរួចខ្លួនបានឡើយ។ ការចាប់ សម រង្ស៊ី ត្រូវធ្វើនៅលើ​យន្តហោះ​តែ​ម្តង ដោយ​ឲ្យ​​យន្តហោះ​ទៅចតនៅ​ព្រលាន​យោធា ប្រសិន​​នៅភ្នំពេញ។ ករណី នៅសៀមរាប ឬខេត្ត​ព្រះ​សីហនុ ត្រូវរកទីតាំង​ណា​​សម​​ស្រប​​ក្រៅ​ពីចំណត​​អ្នកដំណើរ។ បណ្តាអង្គភាព​នៃកងទ័ពស្រួច ត្រូវត្រៀម​អន្តរាគមន៍​​កម្ទេចចោល នូវកម្លាំង​ណា​ក៏​ដោយ ដែលរារាំង​​ការអនុវត្តន៍​ច្បាប់។»។

សំណេរខាងលើនេះ ត្រូវបានលោក ហ៊ុន សែន ច្រានចោល ថាលោកមិនមែនជាអ្នកសរសេរ ដោយសារ​តែ​សំណេរ​នេះ គ្មាន«ត្រា និង​ហត្ថលេខា»​របស់លោក។ លោកមានប្រសាសន៍ថា៖ «រង្ស៊ី ជាមនុស្សល្ងង់ណាស់ ដែល​ថាសារបទបញ្ជាកម្លាំងយោធា ដែលទទួលបាននោះ ថាជារបស់ខ្ញុំ។ កន្លែង​ណា ដែលថាជារបស់ខ្ញុំ? មាន​ត្រា​ និងហត្ថលេខា[ឬ]អត់? ពិតជាល្ងីល្ងើមែន។»។

ប៉ុន្តែលោកនាយករដ្ឋមន្ត្រី បានទទួលស្គាល់ និងសរសើរអ្នកសរសេរ«អត្ថបទ»នោះថា សរសេរដូច«យល់ចិត្ត»​លោក។ លោក ហ៊ុន សែន បានបន្តថា៖ «ប៉ុន្តែខ្ញុំសូមសរសើរ​អ្នកសរសេរបទបញ្ជាទ័ពនេះ ព្រោះការបញ្ជាទ័ព ក៏ខ្ញុំប្រើវិធីបែបនេះដែរ។ អ្នកសរសេរនេះ ដូចជាយល់ចិត្ត​របស់ខ្ញុំមែន។ ការបញ្ជា​ទ័ព​​គឺត្រូវតែអញ្ជឹងហើយ។ បើ​អ្នក​ក្លាហានឯង មិនហ៊ានចូលស្រុក កុំសន្យា។»។

«អរគុណទណ្ឌិត រង្ស៊ី»

យ៉ាងណា លោក ហ៊ុន សែន បានប្រកាសថា លោកនឹងមិនប្ដឹងលោក សម រង្ស៊ី បន្ថែមមួយករណីទៀត ទាក់ទង​នឹង​រឿងនេះទេ ដោយហេតុថា មេដឹកនាំ​ប្រឆាំងរូបនេះ មាន«ទោសស្រាប់»ទៅហើយ។

លោកបានបន្តប្រសាសន៍ថា៖ «រង្ស៊ី ចូលចិត្តប្រើប្រាស់ភាសាមួលបង្កាច់ លាបពណ៌ គេបែបនេះ បានចេះតែ​ជាប់​គុក។ បង្កើតរឿងមិនពិត ថាជារឿងពិត រាល់កំហុសរបស់ រង្ស៊ី គឺកើតឡើង ពីទង្វើរបស់ខ្លួនឯង។ សារបទ​បញ្ជា អ្នកណា​ក៏សរសេរបាន មកចោទថា ជារបស់នាយករដ្ឋមន្រ្តី។ សំណាងដែរ ខ្ញុំមិនប្តឹងផ្តល់ទេ ព្រោះ រង្ស៊ី ជា​មនុស្ស​​ដែល​មាន​ទោស ស្រាប់ទៅហើយ។ ខ្ញុំបញ្ជាក់ឲ្យច្បាស់ឡើងវិញថា ខ្ញុំនឹងអនុវត្តយុទ្ធវិធីនេះ នៅ​ពេល​រង្ស៊ី ចូល​ស្រុក ហើយ​សូម​អរគុណ​ទណ្ឌិត រង្ស៊ី ដែលបានបង្ហាញវិធីសាស្រ្ត ចាប់ខ្លួនលោកឲ្យដឹងបែបនេះ។»៕