កឹម សុខា អង្គុយបត់ជើងសំពះម្ដាយ ក្នុងថ្ងៃខួបកំណើត
បើរាប់អាយុតាមរបៀបខ្មែរ (ឬនៅអាស៊ីខាងកើត) ប្រធានគណបក្សសង្គ្រោះជាតិ លោក កឹម សុខា មានអាយុ៦៤ ចូល៦៥ឆ្នាំហើយ (តាមបែបលោកខាងលិច លោក កឹម សុខា មានអាយុ១ឆ្នាំក្មេងជាង) នៅថ្ងៃនេះ។ គឺនៅថ្ងៃទី២៧ ខែមិថុនា ឆ្នាំ១៩៥៣ ត្រូវជាឆ្នាំម្សាញ់ ដែលទារក កឹម សុខា បានចាប់កំណើត ក្នុងឃុំឧត្ដមសូរិយា ស្រុកត្រាំកក់ ខេត្តតាកែវ។
ផ្ទុយពីការជូនពរ ដែលត្រូវបានធ្វើឡើង ដោយក្រុមអ្នកគាំទ្រ និងបណ្ដាមេដឹកនាំជាតិ និងអន្តរជាតិជាច្រើននោះ លោក កឹម សុខា ខ្លួនលោកបានជ្រើសរើសការបង្ហោះរូបថត ឃើញរូបលោកស្លៀកពាក់ខោអាវសមញ្ញ អង្គុយបត់ជើងសំពះម្ដាយរបស់លោក ជាមួយនឹងសារខ្លីៗ ចំនួនបីឃ្លា ដូចខាងក្រោម៖
ថ្ងៃនេះកាលពី៦៤ឆ្នាំមុន (ថ្ងៃទី២៧ ខែមិថុនា ឆ្នាំ១៩៥៣) គឺជាថ្ងៃដែលម៉ែ បានផ្ដល់កំណើតឲ្យកូន កូនបានឃើញពន្លឺព្រះអាទិត្យ។ អ្នកម៉ែ តែងតែប្រៀនប្រដៅកូន ឲ្យកូនខិតខំសិក្សារៀនសូត្រ ទោះបីគ្រួសារយើងក្រីក្រក្ដី។
[...]
